تۇركيادا تەرروريزمگە كۇدىكتى 33 ادام قاماۋعا الىندى

استانا. KAZINFORM - تۇركيانىڭ 20 پروۆينتسياسىندا تەرروريزمگە كۇدىكتى 33 ادام قامالدى، دەپ جازادى ازەرتادج.

تۇركيا ىشكى ىستەر ءمينيسترى الي ەرليكايا ەلدىڭ 20 پروۆينتسياسىندا جۇرگىزىلگەن اۋقىمدى انتيتەرروريستىك وپەراتسيانىڭ اياقتالعانىن حابارلادى.

ءمينيستردىڭ مالىمەتىنشە، جاندارمەريا كۇشتەرىنىڭ سوڭعى ەكى اپتاداعى جۇمىسى ناتيجەسىندە FETض («پاراللەلدى مەملەكەت» تەرروريستىك ۇيىمى) ۇيىمىمەن بايلانىسى بار دەگەن كۇدىكپەن 50 ادام ۇستالعان، ولاردىڭ 33 ءى سوت شەشىمىمەن قاماۋعا الىنعان.

كۇدىكتىلەرگە تەرروريستىك ۇيىمعا قاتىسۋ، وعان قارجىلاي قولداۋ كورسەتۋ، سونداي-اق الەۋمەتتىك جەلىلەردە تەرروريستىك يدەولوگيانى ناسيحاتتاۋ بويىنشا ايىپتار تاعىلعان.

الي ەرليكايانىڭ ايتۋىنشا، 2025-جىلدىڭ باسىنان بەرى تۇركيادا FETض ۇيىمىنىڭ 910 مۇشەسى قاماۋعا الىنىپ، تاعى 1000 نان استام ادامعا ەلدەن شىعۋعا تىيىم سالىنعان.

بۇدان بۇرىن حابارلانعانداي، تۇركيانىڭ 41 پروۆينتسياسىندا تەرروريزمگە قاتىسى بار 360 تان استام كۇدىكتى قۇرىقتالدى.