تۇركيادا قاڭعىباس جانۋارلار ماسەلەسىن شەشۋ ماقساتىندا كەشەندى باعدارلاما باستالادى

استانا. KAZINFORM - تۇركيادا قاراۋسىز يتتەر ماسەلەسى وزەكتى بولىپ تۇر، دەپ حابارلايدى Kazinform-نىڭ مەنشىكتى ءتىلشىسى.

ەلدە كىشكەنتاي بالالار مەن قارت ادامدار ءجيى يتتەردىڭ شابۋىلىنا ۇشىرايدى، مۇنداي وقيعالاردان سوڭ ادامدار قازا بولاتىن جاعدايلار دا كەزدەسىپ جاتادى. وسىعان بايلانىستى تۇركيا ۇكىمەتى حالىقتىڭ قاۋىپسىزدىگىن قامتاماسىز ەتۋ ءۇشىن قاجەتتى شارالار قابىلداۋدى جوسپارلاپ وتىر.

تۇركيانىڭ ىشكى ىستەر ءمينيسترىنىڭ ورىنباسارى ءمۇنير كاراوعلۋ قاراۋسىز جانۋارلار ماسەلەسى ەلدەگى ەڭ كۇردەلى الەۋمەتتىك پروبلەمالاردىڭ ءبىرى ەكەنىن اتاپ ءوتتى. ول ۆەدومستۆونىڭ بۇل ماسەلەنى شەشۋگە بارلىق كۇش-جىگەرىن جۇمسايتىنىن جانە بۇل ماسەلەنى تولىق جويۋدى ماقسات ەتىپ قويعانىن ايتتى.

جاقىن ارادا قاڭعىباس جانۋارلاردى اۋلاپ، ولاردى قالپىنا كەلتىرۋ، ۆاكسيناتسيالاۋ جانە جاڭا يەلەرىن تابۋ بويىنشا كەشەندى باعدارلاما ىسكە قوسىلماق. كاراوعلۋ ايتقانداي، ەگەر كەيبىر جانۋارلارعا جاڭا ءۇي تابىلماسا، ولارعا ارنايى ايماقتاردا ءومىر ءسۇرۋ ءۇشىن جايلى جاعدايلار جاسالادى.

مينيستر ورىنباسارى بۇل ءتاسىل تەك جانۋارلارعا گۋمانيتارلىق كوزقاراسپەن قاراۋعا عانا ەمەس، ادامداردىڭ قاۋىپسىزدىگىن قامتاماسىز ەتۋگە جانە ەكولوگيالىق جاعدايدى جاقسارتۋعا باعىتتالعانىن ايتتى. ۆەدومستۆو ەرىكتىلەر مەن قايىرىمدىلىق ۇيىمدارىمەن بىرگە جۇمىس ىستەپ، جانۋارلارعا ىڭعايلى ءومىر ءسۇرۋ ءۇشىن بارلىق قاجەتتى جاعدايدى جاسايدى.

جەرگىلىكتى بيلىك قاراۋسىز جانۋارلار ءۇشىن قاۋىپسىز جانە لايىقتى جاعدايلار جاساۋ ءۇشىن ينفراقۇرىلىمدى دايىنداۋعا كىرىستى. بۇل باعدارلاما تۇركيادا كوپتەگەن قالانى قامتىعان جانە قوعامدا الاڭداۋشىلىق تۋدىرعان پروبلەما شەشۋ جولىندا ماڭىزدى قادام بولماق.

ىشكى ىستەر مينيسترلىگى بۇل باعىتتاعى جۇمىستار ۇزاق مەرزىمدى پەرسپەكتيۆادا جالعاساتىنىن جانە جانۋارلاردىڭ عانا ەمەس، ازاماتتاردىڭ دا قاۋىپسىزدىگىن قامتاماسىز ەتۋگە باعىتتالعانىن اتاپ ءوتتى.

ايتا كەتەيىك، تۇركيادا حالىق ەكى توپقا ءبولىنىپ، كوشەلەردەگى يتتەردى اۋلاۋ ماسەلەسىن تالقىلاپ جاتىر. كەيبىرەۋلەر جانۋارلاردى قورعايدى جانە ولارعا تاماق بەرەدى، ال باسقالارى ولاردىڭ سانىن ازايتۋدى تالاپ ەتەدى. قاراۋسىز يتتەر توپتالىپ، تۇرعىندارعا بەلگىلى ءبىر قيىندىقتار تۋعىزادى. مىسالى، يتتەردە قۇتىرۋ اۋرۋى انىقتالعاننان كەيىن تۇركيادا بىرنەشە اۋىل كارانتينگە جابىلدى. سونداي-اق، جاقىندا تۇركيادا قاراۋسىز يتتەر 12 جاسار بالانى ءولتىردى.

بۇعان دەيىن تۇركيا پرەزيدەنتى رەدجەپ تايىپ ەردوعان قاڭعىباس يتتەر ماسەلەسىن شەشۋ ءۇشىن اۋقىمدى ناۋقان باستالعانىن جانە مەملەكەتتىك ورگانداردى باتىل قادامدارعا شاقىرعان بولاتىن.

ايتا كەتەلىك تۇركيا ءىرى الەۋمەتتىك جەلىلەردى ءوز اۋماعىندا كومپانيا اشۋعا مىندەتتەيدى.

اۆتور

نازىم بولەسوۆا