تۇركيادا ەنتوني بلينكەن ساپارى قارساڭىندا الدەبىرەۋلەر ا ق ش اۋە بازاسىنا باسىپ كىرمەك بولدى
بىرنەشە كۇن بۇرىن تۇرىكتىڭ ادام قۇقىقتارى جانە بوستاندىقتارى (IHH) گۋمانيتارلىق كومەك قورى پالەستيناعا قولداۋ كورسەتۋ ءۇشىن ىستانبۇلدان جولعا شىققان ەدى. ولار ۇيىمداستىرعان «پالەستيناعا ەركىندىك كونۆويى» قوزعالىسىنىڭ مۇشەلەرى اداناداعى ا ق ش-قا قاراستى ينجيرليك بازاسى الدىندا يزرايلدىڭ پالەستيناعا جاساعان شابۋىلىنا نارازىلىق ءبىلدىردى، دەپ حابارلايدى قازاقپارات انادولى اگەنتتىگىنە سىلتەمە جاساپ.
تۇركيانىڭ ءارتۇرلى پروۆينتسياسىنان كەلگەن ۇكىمەتتىك ەمەس ۇيىم وكىلدەرى مەن جاي ازاماتتار اقش اۋە كۇشتەرىنە قاراستى 39-شى اۋە بازاسى ورنالاسقان ينجيرليك قولباسشىلىعى الدىندا باس قوستى.
ولار قولىنا تۇركيا مەن پالەستينا تۋىن ۇستاپ، يزرايل مەن ا ق ش-قا قارسى ۇراندار ايتىپ، نارازىلىق ءبىلدىردى.
وسى ۋاقىتتا توپتاعى كەي ادامدار ينجيرليك بازاسىنا كىرۋگە تىرىستى. ولاردىڭ ارەكەتىنە پوليتسيا توسقاۋىل قويدى.
سول جەردە ءسوز سويلەگەن «ادام قۇقىقتارى جانە بوستاندىقتارى» گۋمانيتارلىق كومەك قورى ءتوراعاسى بۇلەنت يىلدىرىم ينجيرليككە نە ءۇشىن كەلگەندەرىن ءتۇسىندىردى.
ونىڭ ايتۋىنشا، وسىندا كەلۋ ارقىلى امەريكانى يزرايلگە قولداۋ كورسەتۋدەن اۋلاق بولۋعا شاقىرماق بولعان.
«اشۋىمىزدىڭ قاتتىلىعى سونشا، ءوزىمىزدى ۇستاي الار ەمەسپىز. ءبىراق تۇركيا قولىنان كەلگەننىڭ ءبارىن جاساپ جاتىر. يسلام الەمى بۇكىل ەۋروپادا، امەريكادا نارازىلىعىن كورسەتىپ جاتىر. بۇل قارسىلىق ءارى قاراي كۇش الىپ، كوبەيە بەرەدى دەپ ۇمىتتەنەمىز»، - دەدى ول.
ونىڭ ايتۋىنشا، قوزعالىس ءوز مالىمدەمەسىن جاسادى. امەريكا مۇنى كوردى جانە ەستىدى.
«ەندى ميتينگ الاڭىنان ءۇنسىز كەتەمىز. ولار كەلىسىمدى قازىر جاسايدى دەپ ۇمىتتەنەمىن. ايەلدەر مەن بالالاردى سوعىس الاڭىنان امان شىعارۋعا تىرىسامىز»، - دەدى ول.
يىلدىرىم ينجيرليك بازاسىنا وزىمەن بىرگە كەلگەندەردەن ايماقتان كەتۋدى سۇرادى.
«ءبىزدىڭ مىندەتىمىز - جارالانعانداردى، ايەلدەر مەن بالالاردى قاۋىپسىز جەرگە الىپ كەتۋ. ءبىز ءوز نارازىلىعىمىزدى بىلدىردىك، اشۋىمىزدى كورسەتتىك. بۇدان بىردەڭە شىعادى دەپ ۇمىتتەنەمىن»، - دەدى ول.
ميتينگ كەزىندە كەي ادامدار تاس، بوتەلكە جانە وتشاشۋ لاقتىرىپ، ينجيرليك بازاسىنا كىرمەك بولدى.
«پوليتسياعا تاس نەمەسە باسقا نارسە لاقتىرعانداردىڭ بىزگە ەش قاتىسى جوق، بۇل - ۇيات تىرلىك. قازىر بۇل جەردەن كەتپەسەڭدەر، تۇركيا ەكىگە بولىنەدى. تۇركيا قازىر پوليتسياسىمەن، اسكەرىمەن جانە بۇكىل بولىمشەلەرىمەن بىرگە گازا جاعىندا. كەتىڭدەر» - دەدى يىلدىرىم.
پوليتسەيلەر بازاعا كىرگىسى كەلگەندەرگە سۋ مەن بۇرىش گازىن شاشىپ، توسقاۋىل قويدى.
وسى مالىمدەمەدەن كەيىن كەي ادامدار تاراپ كەتسە، كەيبىرى بازاعا كىرۋ ارەكەتىن جالعاستىردى.
ەسكە سالا كەتەيىك، ەرتەڭ تۇركيا استاناسىنا ا ق ش مەملەكەتتىك حاتشىسى ەنتوني بلينكەن كەلەدى دەپ كۇتىلىپ وتىر.
