تۇركيادا مۋزىكا ءۇشىن جاڭا سالىق ەنگىزىلەدى
استانا. قازاقپارات - تۇركيادا ەندى قوعامدىق ورىنداردا مۋزىكا قوسىپ، پايدالانعانى ءۇشىن سالىق الىنادى، دەپ حابارلايدى 24KZ.
جاڭا ەرەجە بويىنشا شاشتاراز، ءدامحانا، تويحانا، ءتىپتى بازارداعى راديودان شىققان اۋەنگە كاسىپ يەسى اۆتورلىق تولەماقى تولەۋگە ءتيىس. جاڭا زاڭعا ساي قوعامدىق ورىنداردا مۋزىكا قوسقان كاسىپ يەسى جىل سايىن ءار شارشى مەترگە 6000 ليرا كولەمىندە رويالتي تولەۋى ءتيىس. بۇل اۆتوردىڭ شىعارماشىلىق ەڭبەگىن ادىلەتتى باعالاپ، جەكەمەنشىك قۇقىعىن قورعاۋ ءۇشىن قابىلدانعان شەشىم. ونەر سالاسىنىڭ وكىلدەرى باستامانى قولداپ وتىر.
كوپتەگەن ونەر يەسى الەۋمەتتىك تۇرعىدان قورعالماعان جانە قيىن جاعدايدا ءومىر سۇرەدى. ال كەيبىر كاسىپكەرلەر ءبىر ساعاتتىق تابىسىنا تەڭ كەلەتىن اقشامەن ءبىر جىل بويى پايدالانعان ءاننىڭ اقىسىن تولەۋدەن باس تارتادى. ەگەر مەكەمەدە مۋزىكا شىرقالسا، زاڭ بويىنشا اۆتورلىق تولەماقى تولەنۋى ءتيىس. ول كوبىنە ەلەكتر قۋاتى شىعىنىنان دا از بولادى. مۇنداي تولەمنەن قاشۋ - ادىلەتسىزدىك.
الايدا بيزنەس وكىلدەرى: «مۇنداي تولەم شاعىن كاسىپورىندارعا قيىنعا سوعادى»، - دەيدى. اسىرەسە الىم مولشەرىن ەسەپتەۋ جولىنا كوڭىلدەرى تولماي وتىر.
ييگيت ابباس، كاسىپكەر:
- مىسالى، مەنىڭ شاشتارازىم 90 شارشى مەتر. جاڭا زاڭ بويىنشا مەن جىلىنا شامامەن 15 مىڭ دوللار تولەۋىم كەرەك. بۇل تابىسىمنىڭ ايتارلىقتاي بولىگىن الىپ كەتەدى. مۋزىكاسىز شاش قۇرعاتقىشتىڭ دىبىسى شىداتپاس. اقىلعا قونىمدى شەشىم ەمەس. ءبىزدىڭ دە كۇن كورۋىمىز قاجەت قوي.
ال جاڭا ەرەجەنى ەلەمەگەن كاسىپكەرلەرگە ءۇش ەسە ارتىق ايىپپۇل سالىنىپ، بانكتىك شوتتارى بۇعاتتالۋى مۇمكىن. ءتىپتى كەي جاعدايدا 1 جىلدان 5 جىلعا دەيىن باس بوستاندىعىنان ايىرۋ جازاسى دا قاراستىرىلعان. سوندىقتان مۋزىكا ەندى تۇركياداعى كاسىپكەرلەر ءۇشىن جاي كوڭىل كوتەرۋ قۇرالى ەمەس، ناقتى ەسەپ پەن جاۋاپكەرشىلىك جۇكتەيتىن جاڭا زاڭدىق مىندەتكە اينالماق.
