تۇركيادا دەموگرافيالىق رەفورما جاسالدى

استانا. قازاقپارات- تۇركيا ۇكىمەتى بالا تۋۋ كورسەتكىشىنىڭ كۇرت تومەندەۋىنە بايلانىستى مەملەكەتتىك قىزمەتكەرلەرگە جارتىلاي جۇمىس ىستەۋ قۇقىعىن بەرەتىن جاڭا ەرەجە ەنگىزدى. وعان سەبەپ بيىل ەلدەگى تۋۋ كوەففيسيەنتى ايتارلىقتاي تومەندەپ، ەسەسىنە حالىقتىڭ قارتايۋ پروتسەسى ارتقان.

 ال جاڭا رەفورما اتا-انالارعا بالا تاربيەسىنە كوبىرەك ۋاقىت بولۋگە مۇمكىندىك بەرىپ، جۇمىس پەن وتباسىن ۇيلەستىرۋگە جاعداي جاساماق. بيلىك بۇل شارانى حالىق سانىن تۇراقتاندىرۋ مەن الەۋمەتتىك قولداۋدىڭ ءبىر بولىگى رەتىندە قاراستىرىپ وتىر.

 رەجەپ تايپ ەردوعان، تۇركيا پرەزيدەنتى:

 - اپتاسىنا 20 ساعاتتىق جۇمىس نەگىزىندەگى بۇل جاڭا ەرەجە اتا-انالاردىڭ بالا تاربيەسىنە كوبىرەك ۋاقىت بولۋىنە جانە وتباسىلىق بايلانىستاردى نىعايتۋعا ىقپال ەتەدى. بۇگىن كەشكە جاريالاناتىن جاڭا تارتىپكە سايكەس مەملەكەتتىك قىزمەتكەرلەر ءسابي دۇنيەگە كەلگەن ساتتەن باستاپ مەكتەپكە بارعانعا دەيىن جارتىلاي جۇمىس ىستەي الادى.

 سوڭعى جىلدارى تۇركيادا ءبىر نەمەسە ەكى بالامەن شەكتەلۋ ۇيرەنشىكتى جاعدايعا اينالعان. جاستار اراسىندا بالا سۇيۋگە دەگەن قۇلشىنىستىڭ ازايعانى بايقالادى. بۇعان ەۋروپالىق ءومىر سالتى مەن ەكونوميكالىق قيىندىقتار سەبەپ. قازىرگى تاڭدا مەملەكەتتىك قىزمەتكەرلەرگە 16 اپتالىق دەكرەتتىك دەمالىس بەرىلەدى. ال العاشقى بالاعا مەملەكەتتەن بەرىلەتىن ءبىر رەتتىك تولەم - نەبارى 300 ليرا، ياعني شامامەن 3600 تەڭگە.

تۇركيا حالقىنىڭ سانى 86 ميلليوننان اسقانىمەن، ەگدە جاستاعى تۇرعىنداردىڭ ۇلەسى %11- تەن جوعارى. دەگەنمەن قوعامدا جاڭا زاڭدى قولداۋشىلار دا جانە وعان قارسىلار دا بار.

ايلين نازلىاكا، رەسپۋبليكالىق حالىقتىق پارتيا ءتوراعاسىنىڭ ورىنباسارى:

 - جاڭا ەرەجە جارتىلاي جۇمىس ىستەۋ مۇمكىندىگى «انا مەن اكە ءۇشىن تەڭدەي» دەپ كورسەتەدى. الايدا ءبارىمىز جاقسى بىلەمىز: تۇركيادا بالا تاربيەسى كوبىنە اناعا جۇكتەلەتىن مىندەت رەتىندە قاراستىرىلادى. سوندىقتان بۇل مۇمكىندىكتى كوبىنە ايەلدەر پايدالانادى. بۇل ءوز كەزەگىندە ايەلدەردىڭ ەكونوميكالىق تاۋەلسىزدىگىنە، قوعامدىق ومىرگە قاتىسۋىنا جانە كاسىبي دامۋىنا كەرى اسەر ەتۋى مۇمكىن.

 24.kz