تۇركيادا الەمدەگى ەڭ ءىرى اتوم ەلەكتر ستانسياسى سالىنىپ جاتىر

استانا. قازاقپارات - تۇركيا كەلەسى جىلى «اككۋيۋ» اتوم ەلەكتر ستانتسياسىنىڭ ءبىرىنشى رەاكتورىن ىسكە قوسادى، دەپ حابارلايدى 24KZ.

قازىر 4 ەنەرگوبلوكتىڭ قۇرىلىسى قاتار ءجۇرىپ جاتىر. بۇل ستانسيا ەلدىڭ وڭتۇستىك ايماعىنىڭ دامۋىنا ۇلكەن سەرپىن بەرەدى.

2010 -جىلى رەسەي مەن تۇركيا ۇكىمەتى ارنايى كەلىسىمگە قول قويعان ەدى. قۇرىلىستى كەلىسىم اياسىندا رەسەيلىك «روسوتام» كورپوراتسياسى 2018 -جىلى باستادى. تۇركيا العاشقى اتوم ەلەكتر ستانسياسىن سالىپ جاتىر. «اككۋيۋ» دەپ اتالاتىن بۇل نىسان الەمدەگى ەڭ ۇلكەن ستانسيا بولادى. اۋماعى 10 شارشى شاقىرىمنان اسادى. مۇندا رەسەيلىك عالىمداردىڭ جەتەكشىلىگىمەن 4 رەاكتور تۇرعىزىلادى. قۇرىلىس جۇمىستارى كۇندىز-ءتۇنى توقتاعان ەمەس. شامامەن 34 مىڭ ادام جۇمىلدىرىلعان.

قۇرىلىس الاڭىندا بەتون مەن ارماتۋرا وندىرەتىن زاۋىتتاردان بولەك، تىكۇشاق قوناتىن الاڭ مەن جۇك تۇسىرەتىن كەمە ايلاعى بار. سونىمەن قاتار قۇرىلىس باستالعالى تۋريستەر تاراپىنان قىزىعۋشىلىق ارتقان. سەبەبى بۇل جەر ساياحاتشىلار اراسىندا تانىمال انتاليا مەن الانياعا وتە جاقىن.

سەرگەي بۋتسكيح، «اككۋيۋ نۋكلەار» ا ق باس ديرەكتورى:

- جوبا ءوڭىردىڭ الەۋمەتتىك جاعدايىنا وڭ اسەر ەتتى. ءتىپتى قالالاردىڭ كەلبەتى وزگەرىپ، ۇلعايىپ كەلەدى. جاڭا كەنتتەر ءوسىپ شىقتى. جۇمىس ورىندارى اشىلىپ، وسىنداعى كاسىپورىندار وندىرەتىن تاۋار كولەمى دە ۇلعايدى.

اتوم ەلەكتر ستانسياسى جارتى عاسىردان استام ىركىلىسسىز قىزمەت ەتەدى. «سونىڭ ارقاسىندا بىرنەشە مىڭ ادام ەكى قولعا ءبىر كۇرەك تابادى»، - دەيدى ماماندار.

نۇرلان جۇماعۇلوۆ، Energy Monitor قوعامدىق قورىنىڭ ديرەكتورى:

- اتوم ەلەكتر ستانسياسى 50 جىلدان اسا جۇمىس ىستەيدى. دەمەك جەرگىلىكتى ماماندار كەمى 50 جىل جۇمىسپەن قامتىلادى جانە ەڭ باستىسى، قۇرىلىس كەزىندە جاقىن ماڭداعى ينفراقۇرىلىم داميدى.

ماسەلەن، قازىرگى تاڭدا جاڭا اۋەجاي سالىندى. تۋريستەر سانى كوبەيدى. ياعني ءبىر اتوم ەلەكتر ستانسياسى مەرسين ايماعىنىڭ وركەندەۋىنە سەرپىن بەردى. ستانسيا عيماراتى سىرتقى اسەرلەرگە ءتوزىمدى. بيىكتىگى 10 مەتر بولاتىن سۋناميگە، ماگنيتۋداسى 9 باللدىق جەر سىلكىنىسىنە، ءتىپتى 20 توننالىق ۇشاق قۇلاسا دا توتەپ بەرەدى. ال تولىق قۋاتىنا شىققاندا ساعاتىنا 35 ميلليارد كۆت ەلەكتر ەنەرگياسى وندىرىلەدى. ياعني تۇركياداعى ەنەرگيا قاجەتتىلىگىنىڭ % 10- ءىن نەمەسە 15 ميلليون تۇرعىنى بار ىستانبۇل قالاسىن ەلەكترمەن قامتاماسىز ەتەدى.

ساراپشىلار: «بۇل الەمدەگى ەڭ قاۋىپسىز نىسانداردىڭ ءبىرى بولادى»، - دەپ وتىر.

سەرگەي بۋتسكيح، «اككۋيۋ نۋكلەار» ا ق باس ديرەكتورى:

- بۇل نىسان 3+ تەحنولوگياسى بويىنشا سالىنىپ جاتىر. 3+ دەگەنىمىز - فۋكۋسيموداعى اپاتتان كەيىن جان-جاقتى ساراپتالىپ جاسالعان قاۋىپسىزدىك دەڭگەيى. بۇل جەردە كۇردەلى تەحنولوگيالىق پروتسەسس ەنگىزىلگەن. رەاكتوردىڭ سىرتقى قورعانىش قاباتى بولادى. سونداي-اق بالقىپ شىققان قوسپانى ۇستاپ قالاتىن تۇتقىشى بار. ول ىشتەگى زاتتاردى سىرتقا شىعارمايدى. ا ە س- ءتىڭ قورشاعان ورتاعا قاۋپى جوق. اتموسفەراعا زياندى قالدىقتار شىعارمايدى. ەنەرگەتيكالىق تۇرعىدا دا ءتيىمدى. ماسەلەن، 3 ۆاگون كومىر بەرەتىن ەنەرگيانى 3 گرام يادرولىق وتىننان الۋعا بولادى. العاشقى بلوكتى 2025 -جىلى ىسكە قوسۋ كوزدەلىپ وتىر.

تۇركيا بيلىگى اتوم ەنەرگەتيكاسىن بارىنشا دامىتپاق. كەلەشەكتە ەلدىڭ بىرنەشە وڭىرىندە ستانسيالار سالىنادى.