تۇركيادا العاش رەت ۇشاق توقتاماي ورىندارىنان تۇرعان جولاۋشىلارعا ايىپپۇل سالىندى

استانا. قازاقپارات - Pegasus Airlines اۋە كومپانياسىنىڭ سوفيا- ىستانبۇل باعىتىنداعى PC272 رەيسىندە ءتارتىپ بۇزعان بىرنەشە جولاۋشى العاش رەت اكىمشىلىك جاۋاپكەرشىلىككە تارتىلدى.

HavaSosyalMedya اۆياتسيالىق اگەنتتىگىنىڭ حابارلاۋىنشا، Boeing 737-800 ۇشاعى سابيحا گوكچەن اۋەجايىنا قونعان سوڭ، اۋە كەمەسى تولىق توقتاماعانىنا قاراماستان بىرنەشە جولاۋشى ورىندارىنان تۇرىپ، جۇك سورەلەرىنەن زاتتارىن الا باستاعان. بورتسەرىكتەر قاۋىپسىزدىك تالاپتارىن ساقتاۋعا شاقىرىپ، ورىندارىنا وتىرۋدى تالاپ ەتكەن. الايدا كەيبىر جولاۋشىلار ەسكەرتۋلەرگە باعىنباعان.

سالدارىنان بورتقا پوليتسيا شاقىرىلىپ، اۋەجايدا قۇقىق بۇزۋشىلارعا قاتىستى اكىمشىلىك حاتتامالار تولتىرىلىپ، ايىپپۇل سالىندى.

تۇركيادا 2024 -جىلدان باستاپ ەنگىزىلگەن جاڭا ەرەجەلەرگە سايكەس، ۇشاق تولىق توقتاماي تۇرىپ ورنىنان تۇرۋ، باگاج بولىگىن اشۋ نەمەسە ەكيپاجدىڭ نۇسقاۋلارىن ەلەمەۋ - اكىمشىلىك قۇقىقبۇزۋشىلىق بولىپ سانالادى. بۇل تالاپتار ىشكى جانە حالىقارالىق رەيستەرگە بىردەي قولدانىلادى.

تۇركيانىڭ ازاماتتىق اۆياتسيا جونىندەگى باس ديرەكتسياسىنىڭ دەرەگىنشە، مۇنداي ءتارتىپ بۇزۋشىلىق ءۇشىن جولاۋشىلارعا 2603 تۇرىك ليراسىنا دەيىن (شامامەن 35 مىڭ تەڭگە) ايىپپۇل سالىنادى.

بۇدان بولەك، اۋە كومپانيالارى قۇقىق بۇزۋشىلاردى «قارا تىزىمگە» ەنگىزىپ، بولاشاقتا رەيستەرگە بيلەت ساتىپ الۋىنا شەكتەۋ قويا الادى.

ەسكە سالا كەتەيىك، بۇعان دەيىن تۇرىك اۆياكومپانيالارى جولاۋشىلاردىڭ ەرتە تۇرۋىنا بايلانىستى ايىپپۇل جۇيەسىن ەنگىزەتىنى تۋرالى حابارلانعان بولاتىن. بۇل تاجىريبە ەندى ناقتى جۇزەگە اسىرىلا باستادى.