تۇركيا يندونەزياعا 48 وتاندىق جويعىش ۇشاعىن ەكسپورتتايدى
استانا. KAZINFORM - تۇركيا قورعانىس ونەركاسىبىندەگى بەسىنشى بۋىنعا جاتاتىن وتاندىق 48 دانا «KAAN» جويعىش ۇشاعىن يندونەزياعا ەكسپورتتايتىنىن مالىمدەدى، دەپ حابارلايدى TRT اقپاراتتىق اگەنتتىگى.
- بۇل وتە ماڭىزدى جانە قۋانتاتىن جەتىستىك. ۇلتتىق قورعانىس ونەركاسىبىمىزدىڭ دامۋى مەن قازىرگى مۇمكىندىكتەرىن كورسەتەتىن بۇل كەلىسىم تۇركيا ءۇشىن دە، يندونەزيا ءۇشىن دە پايدالى بولادى دەپ ۇمىتتەنەمىن، - دەدى تۇركيا پرەزيدەنتى رەجەپ تايىپ ەردوعان ءوزىنىڭ «X» پلاتفورماسىندا.
پرەزيدەنت تۇركيا تاريحىنداعى «رەكوردتىق ەكسپورت كەلىسىمىن» جۇزەگە اسىرعانى ءۇشىن قورعانىس ونەركاسىبى مەن تۇرىك ايەروعارىش ونەركاسىبىن جانە وسى پروتسەسكە قاتىسقان بارلىق مەكەمەلەردى قۇتتىقتادى.
ايتا كەتەيىك، بەسىنشى بۋىنعا جاتاتىن «KAAN» جويعىش ۇشاعى راداردان قاشاتىن مۇمكىندىكتەرگە يە جانە ءارقايسىسى 13000 كيلوگرام كۇش بەرەتىن قوس قوزعالتقىشپەن جۇمىس ىستەيدى. وسى مۇمكىندىكتەردىڭ ارقاسىندا ۇشاق 1,8 Mach جىلدامدىعىنا جەتە الادى. سونىمەن قاتار تۇرىك ايەروعارىش ونەركاسىبى جاساندى ينتەللەكت، جەتىلدىرىلگەن سەنسورلىق جۇيەلەر مەن ۇشقىشسىز ۇشۋ اپپاراتتارىمەن جۇمىس ىستەۋ قابىلەتىن بىرىكتىرەتىن التىنشى بۋىن مودەلىن جاساۋدا.
