تۇركيا ورمۋز بۇعازى جابىلعان جاعدايدا بالاما جولداردى انىقتاپ جاتىر
استانا. KAZINFORM - تۇركيا «ورتا ءدالىز» جانە «دامۋ جولى» سياقتى لوگيستيكالىق جوبالاردى جۇزەگە اسىرۋ ۇستىندە. بۇل تۋرالى ەلدىڭ كولىك مينيسترلىگىنىڭ باسشىسى ابديۋلكادير ۋرالوگلۋ مالىمدەدى، دەپ حابارلايدى ت ا س س.
ورمۋز بۇعازى پارسى شىعاناعى مەن ومان شىعاناعىن بايلانىستىرىپ وتىر، بۇل ايماقتا مۇناي مەن گازعا باي باحرەين، يراك، يران، قاتار، كۋۆەيت جانە ساۋد ارابياسى ورنالاسقان.
- ورمۋز بۇعازى جابىلعان جاعدايدا بىزدە قۇرلىق جانە تەڭىز جولدارى بولۋى كەرەك. سوندىقتان ءبىز «ورتالىق ءدالىز» جانە «دامۋ جولى» جوبالارىن جۇزەگە اسىرۋ ءۇشىن قاجەتتىنىڭ بارلىعىن جاساپ جاتىرمىز. ءبىزدىڭ اۋماق ارقىلى «دامۋ جولىنىڭ» 2,1 مىڭ شاقىرىمى ءوتىپ جاتىر، ءبىز وعان 24 ميلليارد دوللارعا جۋىق ينۆەستيتسيا سالامىز. ءبىز سونداي-اق ورتا ءدالىزدى نىعايتۋعا ۇمتىلىپ جاتىرمىز، ونىڭ 2,2 مىڭ شاقىرىمى ءبىزدىڭ اۋماق ارقىلى وتەدى. ونىڭ بەلگىلى ءبىر بولىكتەرىنىڭ قۇرىلىسىن اياقتادىق، - دەپ كەلتىردى ءمينيستردىڭ ءسوزىن Hürriyet گازەتى.
ۋرالوگلۋنىڭ ايتۋىنشا، «دامۋ جولى» سالىنعاننان كەيىن ەۋروپاعا جۇكتەردى جەتكىزۋ مەرزىمى 25 كۇنگە، ال ورتا ءدالىز ارقىلى - 13 كۇنگە دەيىن قىسقارادى.
ورتا (ترانسكاسپي) حالىقارالىق كولىك باعىتى قىتايدان ەۋروپا ەلدەرىنە قازاقستان، تۇرىكمەنستان، ازەربايجان، گرۋزيا، تۇركيا ارقىلى وتەدى. تاسىمالداۋعا تەمىر جول جانە تەڭىز كولىگى (كاسپي تەڭىزى ارقىلى) جۇمىلدىرىلعان. باعدار ۇزاقتىعى - 11 مىڭ ك م، وتكىزۋ قابىلەتى - جىلىنا 4,5 ميلليون توننادان 27 ميلليون تونناعا دەيىن.
ەۋروپا مەن ازيا اراسىنداعى ۇزدىكسىز كولىك بايلانىسىن قامتاماسىز ەتەتىن «دامۋ جولى» جوباسىن يراك بيلىگى 2023 -جىلى باستادى. «دامۋ جولى» اياسىندا يراكتى كورشىلەس ەلدەرمەن بايلانىستىراتىن جوعارى جىلدامدىقتى اۆتوموبيل جولدارىنا قوسىلعان 1200 شاقىرىمنان استام تەمىر جولدار جاڭارتىلىپ، سالىنادى. 2024 -جىلدىڭ ءساۋىر ايىندا تۇركيا، يراك، ب ا ءا جانە قاتار اراسىندا حالىقارالىق كولىك- لوگيستيكالىق جۇيە قۇرۋ جوباسى بويىنشا مەموراندۋمعا قول قويىلدى. ول 17 ميلليارد دوللارعا باعالانىپ وتىر.
بۇعان دەيىن يران ساۋدا كەمەلەرى ءۇشىن ورمۋز بۇعازىن جاپپاۋعا ۋادە بەرگەنىن جازعان بولاتىنبىز.
