تۇركيا پرەزيدەنتى شۇعىل جيىن وتكىزدى

Ердоған
Фото: Анадолы

استانا. KAZINFORM - تۇركيادا مۋنيتسيپالدى سايلاۋ ءوتتى. بۇل سايلاۋ الدىنداعى ۇگىت-ناسيحات جۇمىستارىمەن ەلدەگى تۇراقتى جاعدايدى ايتارلىقتاي شايقالتتى. تۇركيانىڭ ىشكى ساياساتى تاعى دا دۇربەلەڭگە ءتۇستى.

بۇعان دەيىن پارلامەنتتە ءسوز سويلەگەن ۇلتشىل قوزعالىس پارتياسىنىڭ جەتەكشىسى ديەۆلەت باحچەلي قىلمىستىق توپتاردىڭ جەكەلەگەن وكىلدەرى مەن بۇرىنعى ءتارتىپ ساقشىلارى ەلدە توڭكەرىس ۇيىمداستىرۋدى جوسپارلاپ وتىرعانىن ايتقان.

وسىعان وراي 14-مامىردان 15-مامىرعا قاراعان ءتۇنى تۇركيا پرەزيدەنتى رەجەپ تايىپ ەردوعان ەلدىڭ ۇلتتىق بارلاۋ ۇيىمىنىڭ باسشىسى يبراگيم كالين مەن ادىلەت ءمينيسترى يىلماز تۋنچتىڭ قاتىسۋىمەن شۇعىل جيىن وتكىزدى.

ءتۇرلى تۇرىك باسىلىمدارىندا حابارلانعانداي، 9-مامىردا ساياسي قاستاندىق جاسادى دەگەن كۇدىكپەن انكارا پوليتسيا دەپارتامەنتىنىڭ 4 جوعارى لاۋازىمدى قىزمەتكەرى ۇستالدى. ولاردىڭ ەسىرتكى ساۋداسىمەن، قارۋ-جاراقپەن، شەكارانى زاڭسىز كەسىپ وتۋمەن جانە ءارتۇرلى قىلمىستارمەن بايلانىستى ۇيىمداسقان قىلمىستىق توپتارعا قاتىسى بار. 13-مامىردا كۇدىكتىلەردىڭ تۇرعىلىقتى جەرىندە ءتىنتۋ جۇرگىزىلىپ، كەيبىر سيفرلىق ماتەريالدار تاركىلەندى.

كەيبىر جەرگىلىكتى ب ا ق- تىڭ ەلدە جوسپارلانعان توڭكەرىس تۋرالى رەزونانستى تاقىرىپتارىن نازارعا العان تۇركيا ىشكى ىستەر مينيسترلىگىنىڭ باسشىسى الي يەرليكايا كەيبىر قاستاندىق پەن بانديتيزمنىڭ كەز كەلگەن كورىنىسىنە قاتىستى ءتيىستى شارالار قولدانىلاتىنىن ايتتى.

«تەرروريستىك ۇيىمدارمەن جانە ۇيىمداسقان قىلمىستىق توپتارمەن ىنتىماقتاساتىندارعا قاجەتتى شارالاردى قابىلدايمىز. الەۋمەتتىك جەلىنى پايدالانىپ، قوعامدا الاۋىزدىق تۋعىزىپ، «ويىن ويناۋعا» تىرىساتىنداردىڭ باسىن كوتەرۋگە جول بەرمەيمىز. مۇنداي كورىنىستەردىڭ جولى كەسىلەدى»، - دەدى ا. يەرليكايا.

سوڭعى جاڭالىقتار