تۇركيا ەردوعاننىڭ اسكەري وكىلەتتىگىن كەڭەيتۋى مۇمكىن
استانا. KAZINFORM - تۇركيانىڭ ۇلتتىق جينالىسىندا پرەزيدەنت رەجەپ تايىپ ەردوعاننىڭ اسكەري سالاداعى وكىلەتتىگىن كەڭەيتەتىن زاڭ جوباسى قارالىپ جاتىر، دەپ حابارلايدى Kazinform ءتىلشىسى.
بيلىكتەگى ادىلەت جانە دامۋ پارتياسىنىڭ (AKP) دەپۋتاتتارى ۇلتتىق ماجىلىسكە ۇسىنعان قۇجاتىندا جوعارى اسكەري قولباسشىلاردىڭ قىزمەت مەرزىمىن 72 جاسقا دەيىن ۇزارتۋ مۇمكىندىگى قاراستىرىلعان.
زاڭ قابىلدانسا، مەملەكەت باسشىسى تۇركيا قۇرلىق، اۋە جانە اسكەري-تەڭىز كۇشتەرى قولباسشىلارىنىڭ وكىلەتتىگىن جەكە ءوزى ۇزارتا الادى. وسىعان ۇقساس ەرەكشەلىك بۇرىن قارۋلى كۇشتەر باس شتابىنىڭ باستىعىنا دا جاسالعان بولاتىن.
Sِzcü گازەتىنىڭ حابارلاۋىنشا، ۇسىنىلعان جاڭاشىلدىق جاسى بۇرىن بەلگىلەنگەن زەينەتكەرلىككە شىعۋ شەگىنە جاقىنداپ قالعان قازىرگى كومانديرلەرگە تىكەلەي اسەر ەتۋى مۇمكىن.
بەلگىلى بولعانداي، تۇرىك ارمياسىنىڭ كەيبىر جەتەكشىلەرى 64 جاستان اسقان:
* قۇرلىق اسكەرلەرىنىڭ قولباسشىسى سەلچۋك بايراكتاروعلى- 64 جاستا؛
* اسكەري-اۋە كۇشتەرىنىڭ باستىعى زيا دجەمال كادىوعلى - 64 جاستا؛
* اسكەري- تەڭىز كۇشتەرىنىڭ باسشىسى ەردجيۋمەنت تاتلىوعلى - 65 جاستا.
زاڭ جوباسىندا كورسەتىلگەن تاعى ءبىر ماڭىزدى تۇزەتۋ - قىزمەتتە جوعارىلاتۋ شارتتارىن وزگەرتۋ. اتاپ ايتقاندا، كورپۋس گەنەرالى نەمەسە ۆيتسە-ادميرالى اتاعىن بەرۋ ءۇشىن بۇدان بىلاي اسكەري اكادەميانىڭ تۇلەگى بولۋ جانە «كۋرماي» (شتاب وفيتسەرى) مارتەبەسىن يەلەنۋ قاجەت ەمەس.
وسى تۇرعىدا ساراپشىلار مۇنداي باستامالاردىڭ تۇرىك قارۋلى كۇشتەرىندەگى كادرلىق قۇرىلىمدى ايتارلىقتاي وزگەرتىپ، اتقارۋشى بيلىكتىڭ جوعارعى اسكەري باسشىلىققا ىقپالىن ارتتىرا الاتىنىن اتاپ ءوتتى.
جالپى، تۇركيا ارمياسى پرەزيدەنتتىڭ اسكەري سالاداعى وكىلەتتىگىن كەڭەيتەتىن زاڭنامالىق باستامالار اياسىندا نىعايۋدا. سونىمەن قاتار، تۇرىك قارۋلى كۇشتەرى تەك جەكە قۇراممەن عانا ەمەس، سونىمەن قاتار قارۋ-جاراق جاعىنان دا نىعايىپ، ناتوداعى ۇستانىمدارىن كۇشەيتىپ جاتىر. زاماناۋي تەحنيكا ساتىپ الۋ جانە وداقتاس وقۋ- جاتتىعۋلارعا بەلسەندى قاتىسۋ تۇرىك ارمياسىنىڭ جاۋىنگەرلىك ازىرلىگىن ارتتىرۋعا جانە اليانسپەن ستراتەگيالىق ىنتىماقتاستىقتى نىعايتۋعا مۇمكىندىك بەرەدى.
ەسكە سالا كەتەيىك، بۇعان دەيىن تۇركيا پرەزيدەنتى رەجەپ تايىپ ەردوعاننىڭ 2026-جىلى ناتو مەملەكەت جانە ۇكىمەت باسشىلارىنىڭ ءسامميتى انكارا قالاسىندا ۇيىمداستىرىلاتىنىن ايتقان ەدى.
