تۇركيا كريپتوۆاليۋتالارعا باقىلاۋدى كۇشەيتەدى

استانا. KAZINFORM - تۇركيا بيلىگى زاڭسىز ءباس تىگۋ، الاياقتىق جانە زاڭسىز اقشانىڭ شەتەلگە شىعارىلۋىن توقتاتۋ ماقساتىندا سيفرلىق اكتيۆتەرگە باقىلاۋدى كۇشەيتىپ جاتىر، دەپ حابارلايدى Kazinform اگەنتتىگىنىڭ مەنشىكتى ءتىلشىسى.

تۇركيانىڭ قارجى ءمينيسترى مەحمەت شيمشەك كريپتوۆاليۋتا پلاتفورمالارى ارقىلى اقشانى جىلىستاتۋعا قارسى باعىتتالعان جاڭا ەرەجەلەردىڭ ەنگىزىلگەنىن حابارلادى.

باستى وزگەرىستەر مىنالاردى قامتيدى:

كريپتوبيرجالارعا قاتاڭ باقىلاۋ. ەل اۋماعىندا جۇمىس ىستەيتىن بارلىق پلاتفورمالار قارجى كوزدەرى مەن اۋدارىم ماقساتى تۋرالى اقپاراتتى جيناپ، تەكسەرۋگە مىندەتتى. بۇل تالاپتى ورىنداماعان جاعدايدا ليتسەنزيادان ايىرىلادى.

قاراجاتتى شىعارۋ مەرزىمىنە شەكتەۋ. كريپتوۆاليۋتانى اۋدارۋ كەزىندە مىندەتتى كىدىرىس ەنگىزىلەدى: جاڭا اككاۋنتتار ءۇشىن كەمىندە 72 ساعات، قالعاندارى ءۇشىن ساتىپ الۋ نەمەسە قاراجاتتىڭ تۇسكەن ۋاقىتىنان باستاپ 48 ساعاتتان ەرتە ەمەس.

ستەيبلكويندەرگە ليميت. دوللارعا بايلانعان كريپتوۆاليۋتالارعا (مىسالى، USDT نەمەسە USDC) تاۋلىكتىك ليميت - $3000، ايلىق ليميت — $50000 كولەمىندە بەلگىلەندى.

ليميتتەن اساتىن اۋدارىم جاساۋ ءۇشىن پايدالانۋشى ءوزى جانە قاراجات الۋشى تۋرالى تولىق اقپارات - اتى- ءجونى، مەكەنجايى، تۋعان كۇنى جانە باسقا دەرەكتەردى ۇسىنۋى ءتيىس.

رۇقسات ەتىلگەن ەرەكشەلىكتەر: ليسەنزيالانعان ترەيدەرلەرگە قولدانىلادى. رەسمي پلاتفورمالاردا جۇمىس ىستەيتىن كاسىبي پايدالانۋشىلار مەن ترەيدەرلەر قاراجات كوزى راستالعان جاعدايدا شەكتەۋسىز وپەراتسيالار جۇرگىزە الادى.

مينيستر شيمشەكتىڭ ايتۋىنشا، بۇل شارالار ادال پايدالانۋشىلارعا كەدەرگى كەلتىرۋ ماقساتىندا ەمەس.

- ءبىز ادال قولدانۋشىلارعا توسقاۋىل قويۋدى كوزدەمەيمىز. ءبىراق زاڭسىز تابىسىن جاسىرعىسى كەلەتىندەرگە جول بەرمەۋىمىز كەرەك. بۇل قارجى جۇيەسىن قورعاۋعا باعىتتالعان شارا، - دەدى مينيستر.

اتالعان تالاپتار ەل ەكونوميكاسىنىڭ تۇراقتىلىعىن نىعايتۋ، قارجىلىق اشىقتىقتى كۇشەيتۋ جانە اقشانى جىلىستاتۋعا قارسى حالىقارالىق ستاندارتتارعا بەيىمدەلۋ اياسىندا قابىلدانعان.

سونىمەن قاتار، تۇركيا ەكونوميكاسى بىرنەشە جىلدىق جوعارى ينفلياتسيا مەن ۇلتتىق ۆاليۋتانىڭ قۇنسىزدانۋىنان كەيىن بىرتىندەپ تەڭگەرىمدى ءوسۋ مودەلىنە كوشە باستاعانىن كورسەتىپ وتىر.

بۇعان قوسا، تۇركياداعى داتا-ورتالىقتار نارىعى پارسى شىعاناعى ەلدەرى مەن باسقا دا مەملەكەتتەردەن كەلىپ جاتقان ينۆەستيتسيالار اياسىندا بەلسەندى دامۋ كەزەڭىنە ءوتتى.

ايتا كەتەلىك تۇركيانىڭ مەديتسينالىق تۋريزم سالاسىنداعى تابىسى ارتىپ كەلە جاتقانى تۋرالى جازعان ەدىك.