تۇركيا جاڭا كونستيتۋتسيا ازىرلەۋگە كىرىستى

استانا. قازاقپارات - تۇركيا پرەزيدەنتى رەجەپ تايىپ ەردوعان جاڭا كونستيتۋتسيا ازىرلەۋگە تاپسىرما بەردى. ول جاڭا اتا زاڭ ەلدى اسكەري كەزەڭنىڭ مۇراسىنان تولىق ارىلتادى دەپ سەنەدى. ونىڭ سوزىنشە، 1982 -جىلى قابىلدانعان كونستيتۋتسيا بىرنەشە مارتە وزگەرتىلگەنىمەن، قازىرگى قوعام تالابىنا ساي كەلمەيدى.

سوندىقتان پرەزيدەنت 10 زاڭگەردەن قۇرالعان ارنايى توپتى جاڭا كونستيتۋتسيا دايىنداۋعا جۇمىلدىرعان.

رەجەپ تايپ ەردوعان، تۇركيا پرەزيدەنتى:

- جاڭا ءارى ازاماتتىق كونستيتۋتسيا بىزگە وسى سارقىنشاقتاردان تۇبەگەيلى ارىلۋعا، بويىمىزداعى ەنجارلىقتى سىلكىپ تاستاۋعا مۇمكىندىك بەرەدى. بۇل كونستيتۋتسيا تۇرىك ساياساتىنىڭ كەمەلدەنگەنىن دالەلدەيتىن ماڭىزدى قادام بولماق. ءبىز جاڭا اتا زاڭدى بوستاندىقتاردىڭ تولىق ءتىزىمى قامتىلعان جانە امبەباپ قۇندىلىقتارعا نەگىزدەلگەن قۇجات رەتىندە كورگىمىز كەلەدى.

پرەزيدەنت جاڭا زاڭ جوباسى ۇلتتىق بىرلىكتى نىعايتىپ، تەرروريزم مەن ەكسترەميزم ماسەلەسىن بەيبىت جولمەن شەشۋگە ىقپال ەتەدى دەپ سەنەدى. ەردوعان پارتيالار اراسىنداعى ديالوگ پەن كەڭ اۋقىمدى قوعامدىق كونسەنسۋس قاجەتتىگىن باسا ايتتى. ال كەي ساراپشىلار: «كونستيتۋتسياداعى وزگەرىستەر ونىڭ قايتا سايلانۋىنا جول اشۋى مۇمكىن»، - دەيدى.

24.kz