تۇركيا شەكارادا قاۋىپسىزدىك شارالارىن كۇشەيتتى
استانا. KAZINFORM - تاياۋ شىعىس ايماعىنداعى شيەلەنىسكە بايلانىستى تۇركيا مەملەكەتتىك شەكارادا بارلىق قاۋىپسىزدىك شارالارىن قابىلداپ جاتىر، دەپ حابارلايدى انادولى.
يزرايل مەن يران اراسىنداعى قاقتىعىس اياسىندا تۇركيا شەكاراسىن زاڭسىز كەسىپ ءوتۋ ارەكەتتەرىنىڭ ارتقانى ازىرگە بايقالمايدى. بۇل تۋرالى تۇركيا ۇلتتىق قورعانىس مينيسترلىگىنىڭ رەسمي وكىلى زەكي اكتيۋرك اپتا سايىنعى بريفينگتە مالىمدەدى.
ول تۇركيا قارۋلى كۇشتەرى كوشى-قون قوزعالىستارى بولۋى مۇمكىن دەگەن قاۋىپكە بايلانىستى بارلىق قاجەتتى قاۋىپسىزدىك شارالارىن قابىلداپ جاتقانىن اتاپ ءوتتى.
سپيكەردىڭ ايتۋىنشا، سوڭعى ءبىر اپتادا تۇركيا شەكاراشىلارى 122 ادامدى ۇستاعان، ولاردىڭ ىشىندە تەرروريستىك ۇيىمدارعا قاتىسى بار 2 ادام انىقتالعان. ال جىل باسىنان بەرى ۇستالعاندار سانى 2681 ادامعا جەتكەن.
وسىدان بۇرىن يزرايلدىڭ يرانعا سوققىسىنان كەيىن تۇركيا قاۋىپتى ايماقتاردى اينالىپ وتەتىن جاڭا ۇشۋ باعىتتارىن ەنگىزگەنىن جازعان ەدىك.
ەسكە سالايىق، 13-ماۋسىمعا قاراعان ءتۇنى يزرايل يران اۋماعىنا جاپپاي سوققى جاسادى. بۇل شابۋىلدىڭ سالدارىنان يسلام ريەۆوليۋتسياسى ساقشىلار كورپۋسىنىڭ ءبىرقاتار جوعارى لاۋازىمدى كومانديرلەرى مەن يادرولىق فيزيكا سالاسىنداعى عالىمدار قازا تاپتى. يران سونداي-اق ناتانز قالاسىنداعى يادرولىق نىساننىڭ زاقىمدانعانىن راستادى، ءبىراق رادياتسيانىڭ تارالۋ فاكتىسىن جوققا شىعاردى.
