تۇركيا عارىشقا العاشقى بايلانىس جەرسەرىگىن ۇشىردى
استانا. قازاقپارات - تۇركيا العاشقى بايلانىس جەرسەرىگىن ۇشىرىپ، وربيتاعا شىعاردى. «تۇركسات 6A» جوباسى - تۇرىك ماماندارىنىڭ جيىرما جىلدىق عىلىمي- زەرتتەۋى مەن ينجەنەرلىك ەڭبەگىنىڭ جەمىسى.
باۋىرلاس ەل وسى جەتىستىگى ارقىلى جەرسەرىگى تەحنولوگياسىن تولىق مەڭگەرگەن مەملەكەتتەر قاتارىنا ەندى. تۇركيا وتاندىق «Türksat 6A» اپپاراتى ارقىلى عالامدىق بايلانىس نارىعىندا جاڭا بەلەسكە شىقتى. ەل پرەزيدەنتى رەجەپ تايپ ەردوعاننىڭ ايتۋىنشا، بۇل - ەلدىڭ عىلىمي جانە وندىرىستىك الەۋەتىنىڭ ارتا تۇسكەندىگىنىڭ بەلگىسى. ەندى انكارا جەر سەرىكتەرىن ءوز بازاسىندا جاساپ، دەربەس عارىشتىق پلاتفورما قۇرۋدى قولعا الماق.
رەجەپ تايپ ەردوعان، تۇركيا پرەزيدەنتى:
- بۇل تابىس ءبىزدىڭ جەرسەرىگىن جاساۋ مەن ونى ۇلتتىق دەڭگەيدە برەندكە اينالدىرۋ بويىنشا باعدارلامامىزدى جاڭا دەڭگەيگە كوتەردى. حالىقارالىق ساحنادا بەدەلىمىزدى نىعايتا ءتۇستى. ەلىمىزدىڭ بايلانىس، تەحنولوگيا جانە تاعى باسقا سالالاردا مۇمكىندىكتەرى ارتتى.
جاڭا اپپاراتتىڭ قىزمەت ەتۋ مەرزىمى 15 جىلدان اسادى. ونىڭ ارقاسىندا تۇركيانىڭ بايلانىس كورسەتۋ قىزمەتىنىڭ قامتۋ ايماعى 3,5 ميللياردتان 5 ميلليارد ادامعا دەيىن ۇلعايادى. بۇل ينفراقۇرىلىم ساپاسىن جاقسارتىپ، تەلەكوممۋنيكاتسيا الەۋەتىن ەسەلەي تۇسپەك.
ءابدۋلقادىر ۋرالوعلۋ، تۇركيا كولىك جانە ينفراقۇرىلىم ءمينيسترى:
- Türksat 6A - وتاندىق تەحنولوگيا جەتىستىگىنىڭ ناقتى مىسالى. ونىڭ 80 پايىزدان استام بولىگى ءوز ەلىمىزدە جاساپ شىعارىلدى. بۇل كورسەتكىش ۇلتتىق عارىش سالاسىنىڭ الەۋەتىن ايقىندايدى. سالماعى 4 توننا 229 كەلى بولاتىن جەرسەرىگى گەوستاتسيونارلىق وربيتادا، ياعني 36 مىڭداي شاقىرىم بيىكتىكتە جۇمىس ىستەيتىن بولادى. تۇركيانىڭ وزىنەن بولەك ءۇندىستان، مالايزيا، تايلاند جانە يندونەزيا ەلدەرىنە بايلانىس قىزمەتىن كورسەتە الادى.
24.kz
