تۇركيا اۋىل شارۋاشىلىعىن جاڭعىرتۋعا تاعى 757 ميلليون ەۋرو تارتادى
استانا. KAZINFORM - تۇركيا سۋارۋ جۇيەسىن جاڭعىرتۋ ءۇشىن دۇنيەجۇزىلىك بانكتەن 1 ميلليارد ەۋرودان استام قاراجات تارتتى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
تۇركيا قازىنا جانە قارجى مينيسترلىگى «سۋلاندىرۋدى جاڭعىرتۋ - 2» ۇلتتىق جوباسىنىڭ ەكىنشى كەزەڭى اياسىندا دۇنيەجۇزىلىك بانكپەن 757,1 ميلليون ەۋرو كولەمىندە نەسيە ءبولۋ تۋرالى جاڭا كەلىسىمگە قول قويدى.
بۇل قاراجات ەلدىڭ اگرارلىق وڭىرلەرىندەگى سۋ تاراتۋ جۇيەلەرىن جەتىلدىرۋگە، سۋ رەسۋرستارىن پايدالانۋدىڭ تيىمدىلىگىن ارتتىرۋعا جانە اۋىل شارۋاشىلىعىن سۋلاندىرۋدى جاڭعىرتۋدىڭ ۇزاقمەرزىمدى باعدارلاماسىن ازىرلەۋگە باعىتتالماق.
جوبانى تۇركيانىڭ مەملەكەتتىك سۋ رەسۋرستارى باسقارماسى جۇزەگە اسىرادى. ول بۇعان دەيىن 317 ميلليون ەۋرودان استام قارجى بولىنگەن ءبىرىنشى كەزەڭنىڭ جالعاسى سانالادى.
وسىلايشا، تۇركيانىڭ سۋارۋ جۇيەلەرىن جاڭعىرتۋعا دۇنيەجۇزىلىك بانكتەن تارتقان قارجىسىنىڭ جالپى كولەمى 1 ميلليارد ەۋرودان استى.
سۋلاندىرۋ ينفراقۇرىلىمىن جاڭعىرتۋ - كليماتتىق قاۋىپتەردىڭ ارتۋى، اگروونەركاسىپتىك كەشەننىڭ سۇرانىسىنىڭ ءوسۋى جانە سۋ رەسۋرستارىن ۇتىمدى پايدالانۋ قاجەتتىلىگى جاعدايىندا تۇركيا ۇكىمەتى ءۇشىن باستى مىندەتتەردىڭ ءبىرى سانالادى.
جوبا اۋىل شارۋاشىلىعى ونىمدىلىگىن ارتتىرىپ قانا قويماي، اۋىلدىق اۋماقتاردىڭ تۇراقتى دامۋىنا ۇلەس قوسادى دەپ كۇتىلۋدە.
دۇنيەجۇزىلىك بانكپەن ىنتىماقتاستىق تۇركيا ءۇشىن سۋ رەسۋرستارىنىڭ ەكونوميكالىق ءوسۋ جولىنداعى ستراتەگيالىق ماڭىزىن كورسەتەدى جانە انكارانىڭ ينفراقۇرىلىمدىق جۇيەلى ماسەلەلەردى شەشۋ ءۇشىن حالىقارالىق قارجىلاندىرۋ تارتۋعا مۇددەلىلىگىن ايعاقتايدى.
بۇعان دەيىن ءبىز كليماتتىڭ ەلەۋلى وزگەرۋى مەن سۋ قويمالارىنىڭ تارتىلۋىنا بايلانىستى تۇركيا ماماندارى ازاماتتاردىڭ سۋعا ۇقىپتى قاراۋىنا باعىتتالعان اقپاراتتىق ناۋقاندار وتكىزۋدى جوسپارلاپ وتىرعانىن حابارلاعانبىز.
سونىمەن قاتار، تۇركيادا رەكوردتىق اياز اۋىل شارۋاشىلىعىنا كەرى اسەرىن تيگىزدى. بيىلعى ءساۋىر ايىندا ەل سوڭعى ونجىلدىقتاعى ەڭ قاتتى سۋىققا تاپ بولدى.
ايتا كەتەلىك تۇركيادا قارجىلىق قيىندىقتار «اككۋيۋ» ا ە س- ءنىڭ جاڭا بلوكتارىن سالۋ قارقىنىن باسەڭدەتتى.
