تۇركى تورىندە الەمنىڭ جاس تاريحشىلارى باس قوستى
استانا. KAZINFORM - انكارا قالاسىنداعى اتاتۇرىك اتىنداعى مادەنيەت، ءتىل جانە تاريح جوعارى ينستيتۋتىنىڭ (Bilkent كامپۋسى) بازاسىندا «تۇركى الەمى جاس تاريحشىلارىنىڭ سەمينارى» ءوتتى.
عىلىمي ماجىلىسكە ەلىمىزبەن قاتار تۇركيا، قىرعىزستان، ماجارستان، وزبەكستان، ءازىربايجان، تاتارستان جانە كوسوۆا مەملەكەتىنەن كەلگەن تاريحشى عالىمدارى قاتىستى.
سەمينار جۇمىسى ءتۇرلى تاقىرىپتىق باعىتتار اياسىندا ۇيىمداستىرىلدى. «ارحەولوگيا جانە ونەر تاريحى»، «يسلامعا دەيىنگى ورتالىق ازيا تاريحى»، «يسلام ءدىنىن قابىلداۋدان وسمان مەملەكەتىنىڭ قۇرىلۋىنا دەيىنگى كەزەڭ» سياقتى ماڭىزدى تاريحي كەزەڭدەردى قامتىدى.
حالىقارالىق جيىننىڭ اشىلۋ سالتاناتى ءۇشىنشى شىلدە كۇنى ءوتىپ، العاشقى ءسوزدى تۇرىك تاريح قوعامىنىڭ ءتوراعاسى، پروفەسسور-دوكتور يۋكسەل وزگەن الىپ، سەمينار جۇمىسىنا ساتتىلىك تىلەدى. سونىمەن قاتار تۇركيا ىنتىماقتاستىق جانە ۇيلەستىرۋ اگەنتتىگىنىڭ (TİKA) پرەزيدەنتى سەركان كايالار مەن اتاتۇرىك اتىنداعى مادەنيەت، ءتىل جانە تاريح جوعارى ينستيتۋتىنىڭ پرەزيدەنتى، پروفەسسور-دوكتور دەريا ءورس اتىنان قۇتتىقتاۋ حات وقىلدى.
ءتورتىنشى شىلدە كۇنى سەمينار جۇمىسى «وسمان داۋىرىندەگى تۇركى الەمى»، «جاڭا داۋىردەگى وسمان جانە تۇركى الەمى»، «XX عاسىر مەن قازىرگى تۇركى الەمى» تاقىرىپتارىمەن جالعاستى. بۇل كۇنگى بايانداماشىلار قاتارىندا پروفەسسور-دوكتور يۋنۋس كوچ، پروفەسسور-دوكتور دينچەر كوچ، پروفەسسور-دوكتور احمەت ءوزدجان، پروفەسسور-دوكتور ابدۋللاح گيۋندوگدۋ، پروفەسسور- دوكتور حاليۋك سەلۆي جانە پروفەسسور-دوكتور حيكمەت وكسيۋز قاتىسىپ، تاقىرىپتار بويىنشا قىزىقتى دارىستەر وقىدى.
سەمينار سوڭىندا بارلىق قاتىسۋشىلاردىڭ قاتىسۋىمەن قورىتىندى وتىرىس وتكىزىلىپ، جاس تاريحشىلار اراسىندا بولاشاقتاعى عىلىمي بايلانىستار مەن بىرلەسكەن جوبالار تۋرالى ۇسىنىستار ايتىلدى. قازاقستان، تۇركيا، ماجارستان، وزبەكستان، قىرعىزستان، ءازىربايجان، تاتارستان جانە كوسوۆو مەملەكەتتەرىنەن كەلگەن جاس تاريحشىلار قاتىسقان بۇل جيىن - تۇركى دۇنيەسىنىڭ رۋحاني تۇتاستىعى مەن تاريحي جادىنى قايتا جاڭعىرتۋعا باعىتتالعان ماڭىزدى الاڭ رەتىندە باعالاندى.
اتالعان سەمينارعا الماتى قالاسىنداعى ش. ءۋاليحانوۆ اتىنداعى تاريح جانە ەتنولوگيا ينستيتۋتىنىڭ جاس عالىمدار مۋرزاحودجايەۆ قۋانىش، دوسىمبەتوۆ نۇرلىبەك، لەبايەۆ فارحات، كۋركەيەۆ ەرجان، جۇماتاي سامات قاتىستى. ولار سەمينار اياسىندا وتكەن باياندامالار مەن پىكىرتالاستارعا بەلسەندى تۇردە اتسالىسىپ، ءوز سالالارى بويىنشا عىلىمي وي-پىكىرلەرىن ورتاعا سالدى.
سونىمەن قاتار، تۇركى الەمى جاستارى اراسىنداعى بايلانىستاردى نىعايتۋ باعىتىندا ءبىرقاتار شەتەلدىك ارىپتەستەرىمەن عىلىمي بايلانىستار ورناتتى.
سەمينار جاس زەرتتەۋشىلەرگە تەك تىڭ تاريحي اقپارات الۋعا عانا ەمەس، سونىمەن قاتار ءوز عىلىمي باعىتىن جەتىلدىرۋگە، جاڭا يدەيالارمەن قارۋلانۋعا مۇمكىندىك بەردى. پلاتفورما رەتىندە بۇل جيىن تۇركى حالىقتارىنىڭ ورتاق تاريحىن جاڭا كوزقاراسپەن سارالاپ، كەلەشەك زەرتتەۋلەرگە نەگىز قالاۋىمەن دە ەرەكشەلەندى.
باياندامالار بارىسىندا تۇركى حالىقتارىنىڭ ەرتە كەزەڭدەگى وركەنيەتتەرى، يسلامدى قابىلداۋ داۋىرىندەگى ساياسي جانە مادەني وزگەرىستەر، وسمان كەزەڭىندەگى تۇركى بىرلىگى، سونداي-اق كەڭەستىك ءداۋىر مەن تاۋەلسىزدىك كەزەڭىنەن كەيىنگى تۇركى مەملەكەتتەرىنىڭ ىنتىماقتاستىعى ماسەلەلەرى جان-جاقتى تالقىلاندى.
بۇل تۇرعىدا جاس تاريحشىلارعا قويىلعان مىندەت - بۇگىنگى زامان تالابىنا ساي تىڭ كوزقاراستار مەن دەرەككوزدەر نەگىزىندە زەرتتەۋ جۇرگىزۋ قاجەتتىلىگى باسا ايتىلدى.
جالپى، سەمينار تۇركى الەمىندەگى جاس بۋىن تاريحشىلاردىڭ ءوزارا تانىسۋى مەن عىلىمي بايلانىس ورناتۋىنا، پىكىر الماسۋىنا ۇلكەن سەپتىگىن تيگىزدى. تۇركيا رەسپۋبليكاسىنىڭ بەدەلدى عىلىمي مەكەمەلەرى ۇيىمداستىرعان بۇل شارا - عىلىمي الەۋەتى جوعارى، بولاشاقتا تۇركى ەلدەرىنىڭ اكادەميالىق ىنتىماقتاستىعىن تەرەڭدەتەتىن ماڭىزدى باستامالاردىڭ ءبىرى رەتىندە باعالاندى.
E-history.kz
