تۇركى تانۋشى عالىمدار ماحمۇد قاشقاري مۇراسى تۋرالى جيناق شىعارادى
استانا. KAZINFORM - بىشكەكتە «تۇركى الەمىنىڭ ورتاق مۇراسى «ديۋاني لۇعات-ات-تۇركتىڭ» 950 جىلدىعى» اتتى حالىقارالىق كونفەرەنسيا ءوتىپ جاتىر.

قىرعىزستان، قازاقستان، وزبەكستان، ازەربايجان جانە تۇركيا ەلدەرىنەن كەلگەن تۇركىتانۋشىلار اۆتوردىڭ ءومىربايانى، «ديۋاني لۇعات-ات-تۇرك» تۋىندىسىنىڭ جازىلۋ ماقساتى، شىعارمانىڭ ءتىلى، سونىمەن قاتار ەڭبەكتە قامتىلعان تاريحي-ەتنوگرافيالىق مالىمەتتەر مەن ادەبي ماتەريالدار سەكىلدى عىلىمي ماسەلەلەردى تالقىلادى.
اسىرەسە شىعارمانىڭ اۋدارمالارى مەن زەرتتەۋلەرىنە جانە ونىڭ تۇركى تىلدەرىنىڭ تاريحىن، قازىرگى ديالەكتىلەردى، ادەبيەتتى، ەتنوگرافيانى، سالىستىرمالى ءتىل ءبىلىمىن زەرتتەۋدەگى ماڭىزدىلىعىنا ەرەكشە نازار اۋدارىلدى.

جيىننىڭ اشىلۋىندا ءسوز سويلەگەن تۇركى اكادەمياسىنىڭ پرەزيدەنتى شاھين مۇستافايەۆ XI عاسىردا جازىلعان ماحمۇد قاشقاريدىڭ شىعارماسى تۇركى حالىقتارى مەن تايپالارىنىڭ الەۋمەتتىك قۇرىلىمىن، گەوگرافياسىن، تۇرمىس-تىرشىلىگىن، نانىم-سەنىمدەرىن، ميفولوگياسىن جانە حالىق ادەبيەتىن قامتيتىن تۇركى ەنتسيكلوپەدياسى ەكەنىن اتاپ ءوتتى.
«ديۋاني لۇعات-ات-تۇركتىڭ» تۇركى حالىقتارى ينتەگراتسياسىنىڭ عىلىمي-مادەني نەگىزىن قامتاماسىز ەتۋدەگى ماڭىزى زور. بۇل جيىن وسى سالاداعى جاڭا زەرتتەۋلەردىڭ كوكجيەگىن كەڭەيتەرىنە سەنىم بىلدىرەمىن. بۇگىنگى جيىندا وقىلعان باياندامالار ارنايى جيناق بولىپ شىعارىلادى»، - دەدى ش. مۇستافايەۆ.

ايتا كەتەيىك، كونفەرەنتسيانىڭ اشىلۋ سالتاناتىنا قىرعىز رەسپۋبليكاسى ءبىلىم جانە عىلىم ءمينيسترىنىڭ ءبىرىنشى ورىنباسارى بەكجان سۋپانالييەۆ، تۇركى مەملەكەتتەرى ۇيىمىنىڭ باس حاتشىسى كۋبانىچبەك ومۋرالييەۆ، قىرعىز رەسپۋبليكاسى پرەزيدەنتىنىڭ كەڭەسشىسى ارسلان كويچيەۆ، تۇرىك لينگۆيستيكالىق قوعامىنىڭ پرەزيدەنتى وسمان مەرت، تۇركيانىڭ يۋنەسكو ىستەرى جونىندەگى ۇلتتىق كوميسسياسىنىڭ ءتوراعاسى ءودجال وعىز جانە قىرعىز-تۇرىك «ماناس» ۋنيۆەرسيتەتىنىڭ رەكتورى الپاسلان دجەيلان قاتىستى. قاتىسۋشىلار باسقوسۋدىڭ تۇركى مەملەكەتتەرىنىڭ عىلىم مەن مادەنيەت سالاسىنداعى ىنتىماقتاستىعىن نىعايتۋداعى ماڭىزدىلىعىن ەسكەردى.