تۇركى مەملەكەتتەرىنىڭ وداعى قازاقستانعا نە ءۇشىن ءتيىمدى؟ ساياسات تانۋشى جاۋاپ بەردى
باتىس پەن رەسەي اراسىنداعى ساياسي قاقتىعىس قازاقستانعا نەسىمەن ۇتىمدى؟ ەكونوميكالىق الىپتاردىڭ ورتاسىنداعى ەلىمىز ءوز مۇددەسىن قانداي جولمەن قورعاي الادى؟ بۇل تۋرالى ورتالىق ازيالىق دەموكراتيانى دامىتۋ قورىنىڭ باس ديرەكتورى، ساياساتتانۋشى تولعاناي ۇمبەتاليەۆا ايتىپ بەردى.
كەيىنگى ۋاقىتتا ەلىمىزدىڭ رەسەيدەن بولەك باتىس، قىتاي جانە تۇركيامەن ەكونوميكالىق بايلانىسى كۇشەيە ءتۇستى. ساراپشى مۇنىڭ اسەرىن ءتۇسىندىردى.
«قازاقستان - تاجىريبەسى از، جاس مەملەكەت. ەو، اقش، قىتاي جانە تۇركيا سياقتى ءارتۇرلى ەلدەرمەن تىعىز بايلانىس ساياسي ويىنداردىڭ ءارتۇرلى فورمالارى مەن ۇلگىلەرىن كورۋگە مۇمكىندىك بەرەدى. ءبىز سىرتقى ساياساتتاعى امبيتسيالارىمىزدى ناقتى بىلەمىز، ەندى بىرتىندەپ سول ماقساتقا جەتۋگە تىرىسامىز. قازاقستان حالىقارالىق ارەنادا ساياسي ىقپالعا يە بولۋ ءۇشىن كۇشتى ەكونوميكا، تاۋەلسىز ۇستانىم، ىشكى ساياسي تۇراقتىلىق قاجەت ەكەنىن، ونىمەن قوسا، ەل ىشىندەگى ساياسي قۇقىقتار مەن بوستاندىقتاردى ساقتاۋ كەرەگىن جاقسى تۇسىنەدى. ال حالىقارالىق ساياساتتىڭ بەيرەسمي ەرەجەلەرى بار، ونىڭ ءبىرى - ءىرى دەرجاۆالارمەن وداقتاس بولۋ.
قازاقستاننىڭ سىرتقى ساياساتتا ەكى باعىتى بار. ولار: حالىقارالىق ۇيىمدار اياسىندا ارەكەت ەتۋ، ەكىنشىسى - جەكە ەل رەتىندە كورىنۋ. بۇل ءبىر جاعىنان، رەسەي مەن قىتاي سياقتى ءىرى ويىنشىلار اراسىندا تەپە- تەڭدىكتى قۇرۋعا، ەكىنشىدەن، ىنتىماقتاستىقتى، ونىڭ ىشىندە ەكونوميكانى نىعايتۋ مەن ۇستانىمىمىزدى بەرىك قىلۋعا كومەكتەسپەك» - دەدى ساراپشى.
تولعاناي ۇمبەتاليەۆا تۇركى مەملەكەتتەرىنىڭ وداعى قازاقستانعا نە ءۇشىن ءتيىمدى ەكەنىن العا تارتتى.
«باتىس ەلدەرى ءبىزدى، ەڭ اۋەلى، رەسەيگە تاۋەلدى ەل رەتىندە قارايدى. بۇل راس، ءبىراق ءبىز ماسكەۋمەن قارىم-قاتىناسىمىزدى ساقتاي وتىرىپ، دەربەستىككە ۇمتىلعىمىز كەلەدى. بۇل تاراپتا تۇركى مەملەكەتتەرىنىڭ وداعى دا قازاقستان ءۇشىن ءتيىمدى، ويتكەنى قىتاي مەن رەسەي سياقتى ءىرى دەرجاۆالاردىڭ ىقپالىنان ساقتايدى.
ءبىز ە و-نىڭ رەسەيگە باعىتتالعان ساياسي كۇن ءتارتىبىن كەيبىر ازيا ەلدەرى مەن لاتىن امەريكا مەملەكەتتەرىنىڭ قولدامايتىنىن كورىپ وتىرمىز. ەۋرووداق ەلدەردىڭ قىزعۋشىلىقتارىمەن ساناسۋعا ءماجبۇر. قازاقستان حالىقارالىق نورمالاردى ساقتاۋعا، سانكتسيالاردى ساقتاۋعا، سونىمەن قاتار، قىتاي جانە رەسەي سياقتى ەلدەرمەن ەكونوميكالىق جانە قاۋىپسىزدىك مۇددەلەرىن ەسكەرە وتىرىپ، قارىم- قاتىناس ورناتۋعا نيەتتى ەكەنىن ايتتى»، - دەدى ول.
مامان سىرتقى ساياساتتا ەلىمىزدىڭ ەڭ ءالسىز تۇسىن اتادى.
«ءبىزدىڭ ءالسىز ءارى وسال تۇسىمىز - رەسەي مەن قىتاي سياقتى ءىرى دەرجاۆالاردىڭ ورتاسىندا بولۋ. مۇنى ءوز مۇددەمىزگە ءتيىمدى ەتۋگە ارەكەت جاساۋىمىز كەرەك. سوندىقتان حالىقارالىق كەزدەسۋلەردە مۇددەمىزگە ساي ناقتى ۇسىنىستار مەن تالاپتارعا قول جەتكىزسەك، قازاقستاننىڭ ۇستانىمى قالىپتاسادى دەپ ويلايمىن»، - دەدى ول.
ماسساگەت
