تۇركى مەملەكەتتەرى ۇيىمىنىڭ مەملەكەت باسشىلارىنىڭ بەيرەسمي سامميتى بۋداپەشتە وتەدى
استانا. KAZINFORM - تۇركى مەملەكەتتەرى ۇيىمىنىڭ (ت م ۇ) بەيرەسمي ءسامميتى بيىل 20-21- مامىردا ماجارستان استاناسى بۋداپەشتە وتەدى.
سامميت ماجارستان پرەمەر-ءمينيسترى ۆيكتور ورباننىڭ شاقىرۋىمەن وتكەلى جاتىر. جيىنعا ت م ۇ- عا مۇشە ازەربايجان، قازاقستان، قىرعىزستان، تۇركيا مەن وزبەكستان سياقتى مەملەكەتتەردىڭ پرەزيدەنتتەرى قاتىسادى.
سونىمەن قاتار سامميتكە ت م ۇ جانىنداعى باقىلاۋشى ەلدەردىڭ وكىلدەرى مەن ۇيىمنىڭ باس حاتشىسى كەلەدى.
ت م ۇ بەيرەسمي ءسامميتى تاريحتا العاش رەت باقىلاۋشى مەملەكەت اۋماعىندا بولعالى وتىر.
«شىعىس، باتىس پەن ءتۇيىسۋ نۇكتەسى» تاقىرىبىندا وتەتىن ءىس- شارا مەملەكەت باسشىلارىنا باسىم باعىتتار بويىنشا ىقپالداسۋ جانە دامىتۋ ماسەلەلەرىن تالقىلاپ، وڭىرلىك جانە جاھاندىق وزەكتى ماسەلەلەر بويىنشا پىكىر الماسۋعا مۇمكىندىك بەرەدى.
سامميت قورىتىندىسى بويىنشا، ت م ۇ- نىڭ ورتاق بولاشاعى مەن ستراتەگيالىق باعىتىن راستايتىن بۋداپەشت دەكلاراتسياسىن قابىلداپ، وزگە دە ءبىرقاتار ماڭىزدى شەشىمدەر مەن باستامالاردى ماقۇلداۋ كوزدەلىپ وتىر.
بۋداپەشتە وتەتىن بەيرەسمي سامميتتىڭ الدىندا ساميتتىڭ كۇن ءتارتىبى مەن مەملەكەت باسشىلارىنا قول قويۋعا ۇسىنىلاتىن قۇجاتتاردى پىسىقتاۋ ءۇشىن ت م ۇ سىرتقى ىستەر مينيسترلەرىنىڭ كەڭەسى وتەدى.
