تۇركى مەملەكەتتەرى ۇيىمى سىرتقى ساياسي ۆەدومستۆو جەتەكشىلەرى باس قوستى
شۋشا. KAZINFORM - قازاقستان رەسپۋبليكاسى پرەمەر-ءمينيسترىنىڭ ورىنباسارى - سىرتقى ىستەر ءمينيسترى مۇرات نۇرتىلەۋ تۇركى مەملەكەتتەرى ۇيىمى (ت م ۇ) بەيرەسمي سامميتى قارساڭىندا وتكەن ت م ۇ سىرتقى ىستەر مينيسترلەرى كەڭەسىنىڭ وتىرىسىنا قاتىستى.
ءىس-شاراعا قاتىسۋشىلار ۇيىمنىڭ قىزمەتىن جەتىلدىرۋ جانە حالىقارالىق كۇن تارتىبىندەگى وزەكتى ماسەلەلەر بويىنشا پىكىر الماستى.
كولىك، لوگيستيكا، كوممۋنيكاتسيا جانە كليماتتىق وزگەرىستەرگە قارسى كۇرەس سياقتى سالالارداعى ىنتىماقتاستىقتى ودان ءارى نىعايتۋدىڭ ماڭىزى اتالىپ ءوتتى.
ق ر سىرتقى ساياسي ۆەدومستۆوسىنىڭ باسشىسى م. نۇرتىلەۋ ءوز سوزىندە قازاقستاننىڭ «TURKTIME» ۇرانىمەن ءوتىپ جاتقان 2023-2024 -جىلدارداعى ت م ۇ-داعى ءتوراعالىعى تۋرالى ايتىپ بەردى.
ول سونداي-اق ءبىزدىڭ ەلىمىزدىڭ ۇيىمدى ودان ءارى دامىتۋ جانە ونىڭ الەمدىك ارەناداعى بەدەلىن نىعايتۋ جونىندەگى كوزقاراسىن بەلگىلەدى.
وتىرىس قورىتىندىسى بويىنشا ماجارستانداعى ت م ۇ وكىلدىك كەڭسەسىنىڭ اتقارۋشى ديرەكتورىن تاعايىنداۋ جونىندە شەشىم قابىلداندى، سونداي-اق ت م ۇ مەملەكەت باسشىلارى كەڭەسىنىڭ الداعى وتىرىسى بارىسىندا قول قويىلاتىن قۇجاتتار بەكىتىلدى.
ايتا كەتەيىك، تۇركى مەملەكەتتەرىنىڭ ۇيىمى قازاقستاننىڭ باستاماسىمەن 2009 -جىلى ناحچىۆان قالاسىندا (ازەربايجان) قۇرىلدى.
ت م ۇ حاتشىلىعى ىستانبۇل قالاسىندا (تۇركيا) ورنالاسقان.
قازىرگى ۋاقىتتا ۇيىمعا ازەربايجان، قازاقستان، قىرعىزستان، تۇركيا جانە وزبەكستان كىرەدى.
ماجارستان مەن تۇرىكمەنستاننىڭ باقىلاۋشى مارتەبەسى بار.
اۆتور
جانات قاپالبايەۆا
