تۇركى مەملەكەتتەرى ەڭبەك ميگراتسياسىن بىرلەسىپ رەتتەمەك
تۇركى ينۆەستيتسيالىق قورىنىڭ قاراجاتى باۋىرلاس ەلدەر اراسىنداعى ەڭبەك ميگراتسياسىن رەتتەۋگە دە باعىتتالماق.
بۇل تۋرالى ۇلتتىق ەكونوميكا ءمينيسترى الىبەك قۋانتىروۆ ءماجىلىس وتىرىسىنان كەيىن ب ا ق وكىلدەرىنىڭ سۇراعىنا بەرگەن جاۋابىندا ايتتى، دەپ حابارلايدى قازاقپارات ءتىلشىسى.
«تۇركى ينۆەستيتسيالىق قورى تۇركى مەملەكەتتەرى ۇيىمىنا مۇشە 5 مەملەكەتتىڭ ءارقايسىسىنداعى جوبالاردى قارجىلاندىرۋعا دا باعىتتالادى. مۇشەلەردەن بولەك باقىلاۋشى ەكى ەل بار. بۇل قور كوشى-قونعا قالاي اسەر ەتەدى دەسەك، جوبالاردى ىسكە اسىرۋ ارقىلى اسەر ەتەدى. مىسالى، جاسىل ەكونوميكا، ەنەرگەتيكا، تۋريزم، اگروونەركاسىپ كەشەنى جانە باسقا دا جوبالار قولعا الىنادى. وسىنداي جوبالار قارجىلاندىرىلسا، ادامدار ءوز مەكەنىندە قالادى نەمەسە شوعىرلانىپ جۇمىس ىستەيدى. وسىلايشا تۇركى مەملەكەتتەرى ۇيىمىنىڭ اراسىندا تەحنيكالىق كاسىبي باعىتتاعى جاعىمدى كوشى-قون قالىپتاسادى»، - دەيدى الىبەك قۋانتىروۆ.
سونداي-اق ول تۇركى ينۆەستيتسيالىق قورىنىڭ قاراجاتى تۇركى مەملەكەتتەرى ۇيىمىنا مۇشە ەلدەردىڭ اۋماعىنداعى جوبالاردى عانا قارجىلاندىراتىنىن اتاپ ءوتتى.
«ياعني، ۇيىمنىڭ ىشىندەگى ەلدەردىڭ اراسىنداعى ەڭبەك كوشى-قونى جاقسارادى. ويتكەنى ازىرگە ۇيىمعا 5 مەملەكەت قانا مۇشە. جوبالار وسى ەلدەردە عانا جۇزەگە اسادى. تۇركى ينۆەستيتسيالىق قورىنا كىم جارنا تولەيدى، كىم ينۆەستيتسيا سالادى، سول ەلدەردە جوبالار ىسكە اسادى»، - دەدى مينيستر.
ايتا كەتەيىك، حالىقارالىق قوردىڭ باستاپقى جارعىلىق كاپيتالى 500 ميلليون دوللار بولماق.
