تۇركپا-عا مۇشە ەلدەردىڭ ءوزارا تاۋار اينالىمى 42 ميلليارد دوللاردان اسقان
استانا. KAZINFORM - تۇركى مەملەكەتتەردىڭ پارلامەنتتىك اسسامبلەياسىنا مۇشە ەلدەردىڭ جيىنتىق جالپى ىشكى ءونىمى 1,5 تريلليون دوللاردان اسادى. بۇل تۋرالى پارلامەنت سەناتىنىڭ ءتوراعاسى ماۋلەن اشىمبايەۆ تۇركپا- نىڭ استاناداعى پلەنارلىق وتىرىسىندا ايتتى.
ونىڭ سوزىنشە، تۇركى مەملەكەتتەرى پارلامەنتتىك اسسامبلەياسىنىڭ ماڭىزى ارتىپ كەلە جاتىر.
- قازىرگى تاڭدا ءبىزدىڭ ەلدەرىمىزدە 160 ميلليوننان استام حالىق بار. ال، بارلىق جالپى ىشكى ءونىم 1,5 تريلليون دوللاردان اسادى. بىلتىر ءوزارا تاۋار اينالىمى 42 ميلليارد دوللاردان استى. سىرتقى ساۋدانىڭ جالپى كولەمى شامامەن 1,3 تريلليون دوللارعا جەتتى. بۇل كورسەتكىشتەر ەلدەرىمىزدىڭ ەكونوميكالىق بايلانىسى جانە رەسۋرستىق تۇرعىدان ءوزىن-ءوزى قامتاماسىز ەتۋ دەڭگەيى ارتىپ كەلە جاتقانىن بىلدىرەدى، - دەدى ماۋلەن اشىمبايەۆ.
بۇعان دەيىن قازاقستان، ازەربايجان، قىرعىزستان جانە وزبەكستان جانە سولتۇستىك كيپر تۇرىك رەسپۋبليكاسى پارلامەنتتەرىنىڭ سپيكەرلەرى ۇلتتىق عارىش ورتالىعىنا بارىپ، عارىش اپپاراتتارىن قۇراستىرۋ-سىناۋ كەشەنىنىڭ جۇمىسىمەن تانىسقانىن جازعان ەدىك.
اۆتور
ەسىمجان ناقتىباي
