تۇرعىن ءۇي ساياساتىنىڭ جاڭا ەرەجەسى 24-مامىردا كۇشىنە ەنەدى
استانا. KAZINFORM - ەرتەڭنەن باستاپ ەلىمىزدە تۇرعىن ءۇي ساياساتىنىڭ جاڭا ەرەجەسى كۇشىنە ەنەدى. وسىعان وراي ونەركاسىپ جانە قۇرىلىس مينيسترلىگى قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى كوميتەتىنىڭ ءتوراعاسى باقىتجان جۇنىسبەكوۆ نەگىزگى وزگەرىستەردى اتادى.
باسپاناعا مۇقتاج ازاماتتاردىڭ ءتىزىمى KEZEKTE. KZ جۇيەسىنەن «وتباسى بانكى» ا ق- تىڭ اقپاراتتىق جۇيەسىنە اۋىستىرىلادى.
كەزەككە قويۋ جانە تۇرعىن ۇيلەردى ءبولۋ قىزمەتى ەندى اكىمدىكتەردەن «وتباسى بانككە» وتەدى؛
كەزەككە قويۋ الەۋمەتتىك ساناتقا قاراماستان جۇزەگە اسىرىلادى؛
باسپانا كەزەككە تۇرۋ كۇنىنە جانە ءوتىنىم بەرۋشىنىڭ تابىس دەڭگەيىنە قاراي ۇسىنىلادى.
وسىلايشا، باسپانا ءبىرىنشى كەزەكتە كەزەككە ەرتەرەك تۇرىپ ۇلگەرگەن ازاماتتار اراسىندا بولىنەدى.
كەزەكتە تۇرعاندار ۇنەمى تەكسەرىلەدى، 3 ايدا كەمىندە ءبىر رەت تۇگەندەۋ جۇرگىزىلەدى.
- وتكەن جىلدىڭ قاراشا ايىندا مەملەكەت باسشىسى وسى جىلدىڭ 24-مامىرىندا كۇشىنە ەنەتىن «تۇرعىن ءۇي ساياساتىن رەفورمالاۋ تۋرالى» زاڭعا قول قويدى. ەنگىزىلگەن تۇزەتۋلەر اياسىندا «وتباسى بانكى» تۇرعىن ءۇيدى ەسەپكە الۋدى، قويۋدى جانە ءبولۋدى جۇزەگە اسىراتىن ۇلتتىق دامۋ ينستيتۋتى بولىپ قايتا قۇرىلدى. كەزەكتىڭ اعىمداعى اقپاراتتىق جۇيەسى 24-مامىرعا دەيىن جۇمىس ىستەيدى. ودان كەيىن كەزەكتە تۇرعان بارلىق ازامات وتباسى بانكىنە بەرىلەدى، - دەدى كوميتەت باسشىسى.
بۇعان دەيىن باسپاناعا مۇقتاج جاندارعا قانداي مەملەكەتتىك كومەك كورسەتىلەتىنىن جازعان ەدىك.
