ترامپقا يلونا ماسكتى ا ق ش- تان شىعارىپ جىبەرۋگە كەڭەس بەرىلدى

استانا. KAZINFORM - دونالد ترامپتىڭ ءبىرىنشى پرەزيدەنتتىك مەرزىمىندە اق ۇيدە اعا كەڭەسشى بولعان ستيۆ بەننون سوڭعى ايلاردا ماسكپەن قاقتىعىسىپ قالعان ەدى. ول بەيسەنبى كۇنى ماسكقا قاتىستى ءبىرقاتار ماسەلەلەر بويىنشا تەرگەۋ جۇرگىزۋدى جانە ونىڭ بارلىق مەملەكەتتىك كەلىسىمشارتتارىن توقتاتۋدى ۇسىندى.

- ونىڭ يمميگراتسيالىق مارتەبەسىن رەسمي تەكسەرۋ كەرەك، ويتكەنى مەن ونى زاڭسىز ميگرانت دەپ سانايمىن جانە ونى ەلدەن دەرەۋ دەپورتاتسيالاۋ قاجەت دەپ ەسەپتەيمىن، - دەدى بەننون The New York Times گازەتىنە بەرگەن سۇحباتىندا.

NBC News اتاپ وتكەندەي، دونالد ترامپ پەن يلون ماسك اراسىنداعى شيەلەنىس جەكە ايىپتاۋلار مەن قوقان-لوقىلارعا ۇلاستى.

قاقتىعىس ا ق ش پرەزيدەنتىنىڭ Tesla كومپانياسىنىڭ باس ديرەكتورى كونگرەستەگى رەسپۋبليكاشىلاردىڭ زاڭ جوباسىن سىناعانىنا جاۋاپ رەتىندە باستالىپ، كەيىن الەۋمەتتىك جەلىلەردەگى ايىپتاۋلار لەگىنە اينالدى.

- مەن قاتتى رەنجىدىم، ويتكەنى يلون بۇل زاڭ جوباسىنىڭ ىشكى مەحانيزمدەرىن جاقسى بىلەتىن. مەن وعان كوپ قولداۋ كورسەتتىم، سوندىقتان ونىڭ بۇل ارەكەتى كوڭىلىمدى قاتتى قالدىردى، - دەدى دونالد ترامپ.

ترامپتىڭ ايتۋىنشا، ماسكتىڭ اشۋ-ىزاسى زاڭ جوباسىندا ەلەكتروموبيلدەر ساتىپ الۋدى ىنتالاندىرۋعا ارنالعان سالىقتىق جەڭىلدىكتەردىڭ قىسقارتىلۋىنا بايلانىستى تۋىنداعان.

- يلون رەنجىدى، ويتكەنى ءبىز ەلەكتروموبيلدەرگە سۋبسيديالاردى شەكتەيتىن تالاپ ەنگىزدىك. بۇل ەلەكتروموبيلدەر وندىرۋشىلەرى ءۇشىن ۇلكەن سوققى بولدى. ولار بىزدەن ميللياردتاعان دوللار كولەمىندە سۋبسيديا تالاپ ەتەدى. يلون مۇنى ءاۋ باستان ءبىلدى، - دەدى ترامپ.

Tesla - ا ق ش- تاعى ەڭ ءىرى ەلەكتروموبيل ءوندىرۋشى كومپانيا. سوڭعى ايلاردا كومپانيانىڭ ساتىلىمى تومەندەدى، بۇل جاھاندىق باسەكەلەستىكتىڭ كۇشەيۋى مەن ماسكتىڭ ساياسي بەلسەندىلىگىنە بايلانىستى كەرى اسەردىڭ بەلگىسى. جىلدىڭ باسىنان بەرى Tesla اكسيالارى 20 پايىزدان استام ارزاندادى.

- ەگەر مەن بولماسام، ترامپ سايلاۋدا جەڭىلەر ەدى، دەموكراتتار وكىلدەر پالاتاسىن باقىلاۋعا الار ەدى، ال سەناتتا رەسپۋبليكاشىلاردىڭ ارتىقشىلىعى 51-49 بولار ەدى. بۇل - ناعىز راقمەتسىزدىك، - دەدى يلون ماسك.

ترامپ بولسا Truth Social جەلىسىندە ماسكتى «ەسى اۋىسقان» دەپ اتاپ، فەدەرالدى ۇكىمەت ماسكتىڭ كومپانيالارىمەن جاسالعان ميللياردتاعان دوللارلىق كەلىسىمشارتتاردى بۇزۋ ماسەلەسىن قاراستىرىپ جاتقانىن ايتتى.

قاقتىعىس بارىسىندا ترامپ: «مەن يلوننىڭ مەنەن تەرىس اينالعانىنا رەنجىمەيمىن، ءبىراق ول مۇنى الدەقاشان جاساۋى كەرەك ەدى»، - دەدى.

كوپ ۇزاماي ماسك الەۋمەتتىك جەلىدە ترامپپەن كۇرەستە جەڭىسكە جەتەتىنىن جانە پرەزيدەنتكە يمپيچمەنت جاريالاپ، ونىڭ ورنىنا دجەي دي ۆەنستى قويۋ كەرەك ەكەنىن جازدى.

بۇعان دەيىن يلون ماسك دونالد ترامپتىڭ زاڭ جوباسىن اشىق سىنعا العان بولاتىن.

ترامپ پەن ماسكتىڭ جاريا قاقتىعىسىنان كەيىن ولاردىڭ اكسيالارى قۇنسىزداندى.