ترامپ زاڭسىز ميگرانتتاردى «ءوز ەركىمەن ەلدەن شىعارۋ» باعدارلاماسىن ىسكە قوستى
استانا. KAZINFORM - ا ق ش پرەزيدەنتىنىڭ ايتۋىنشا، كەز كەلگەن زاڭسىز ميگرانت اۋەجايعا كەلىپ، تەگىن بيلەت الا الادى، دەپ حابارلايدى DW.
- بۇگىن مەن زاڭسىز ميگرانتتارعا ارنالعان تاريحتاعى العاشقى «ءوز ەركىمەن ەلدەن كەتۋ» باعدارلاماسىن ىسكە قوسۋ تۋرالى جارلىققا قول قويدىم. ءبىز زاڭسىز ميگرانتتاردىڭ امەريكادان كەتۋىن بارىنشا جەڭىلدەتىپ وتىرمىز. كەز كەلگەن زاڭسىز ميگرانت جاي عانا اۋەجايعا كەلىپ، ەلىمىزدەن شىعۋعا ارنالعان تەگىن بيلەت الا الادى، - دەپ مالىمدەدى ا ق ش پرەزيدەنتى Truth Social الەۋمەتتىك جەلىسىندە.
ونىڭ ايتۋىنشا، بۇل ءۇشىن ارنايى موبيلدى قوسىمشا ىسكە قوسىلعان، وندا وتانىنا بيلەتكە الدىن الا تاپسىرىس بەرۋگە بولادى.
ول ميگرانتتارعا «وتە ماڭىزدى شىعۋ بونۋسىن» دا ۋادە ەتتى. دونالد ترامپ ونىڭ ناقتى مولشەرىن اتامادى، ءبىراق زاڭسىز ميگرانتتاردىڭ ەلدەن كەتۋى ا ق ش بيۋجەتىنە «تريلليونداعان دوللار» ۇنەمدەيتىنىن ايتتى. بۇعان دەيىن ا ق ش- تىڭ ىشكى قاۋىپسىزدىك مينيسترلىگى ەرىكتى تۇردە كەتەتىندەرگە 1000 دوللار تولەنەتىنىن حابارلاعان.
ال ا ق ش- تان ءوز ەركىمەن شىقپايتىندارعا پرەزيدەنت «قاتاڭ سالدار» مەن «ۇزاق مەرزىمدى تۇرمە جازاسىن» قوسا العاندا، ايىپپۇل، مۇلىك پەن تابىستى تاركىلەۋ سەكىلدى جازا قولدانىلاتىنىن ەسكەرتتى. ترامپ ولار كەز كەلگەن ەلگە «ءبىزدىڭ قالاۋىمىز بويىنشا» ءماجبۇرلى تۇردە «كۇتپەگەن دەپورتاتسياعا» ۇشىراۋى مۇمكىن ەكەنىن ايتتى.
- بارلىق زاڭسىز ميگرانت: تەگىن بيلەتتەرىڭىزگە ءدال قازىر تاپسىرىس بەرىڭىزدەر. ءبىز سىزدەردىڭ امەريكادان كەتكەندەرىڭىزدى قالايمىز، - دەپ تۇيىندەدى ا ق ش پرەزيدەنتى.
بۇعان دەيىن قازاقستان رەسپۋبليكاسىنىڭ ەلشىلىگى ا ق ش- تا جۇرگەن وتانداستارعا ەلدەن ەرىكتى تۇردە شىعۋعا بايلانىستى ۇندەۋ جاساعان بولاتىن.
ا ق ش- تان وزبەكستان ارقىلى دەپورتاتسيالانعان ميگرانتتار اراسىندا قازاقستاندىقتار بار ەكەنى تۋرالى جازعان ەدىك.
