ترامپ يزرايل مەن يران اراسىندا بەيبىتشىلىك ورناتۋعا ۋادە بەردى
استانا. KAZINFORM - ا ق ش پرەزيدەنتى دونالد ترامپ Truth الەۋمەتتىك جەلىسىندە قاقتىعىسۋشى تاراپتاردى بىتىمگە كەلۋگە شاقىرىپ، يزرايل مەن يران اراسىندا بەيبىتشىلىك ورناتۋعا ۋادە بەردى، دەپ حابارلايدى Kazinform مەنشىكتى ءتىلشىسى.
- يران مەن يزرايل مامىلە جاساۋى كەرەك، مەن ءۇندىستان مەن پاكىستاندى مامىلە جاساتقانىمداي ولار دا كەلىسىم جاسايدى، - دەپ جازدى دونالد ترامپ TruthSocial الەۋمەتتىك جەلىسىندە.
ترامپ پرەزيدەنت رەتىندەگى ءبىرىنشى مەرزىمىندە سەربيا مەن كوسوۆو اراسىندا، سونداي-اق مىسىر مەن ەفيوپيا اراسىنداعى قاقتىعىستى توقتاتقانىن اتاپ ءوتتى.
- ءدال وسىلاي بىزدە جاقىن ارادا يزرايل مەن يران اراسىندا بەيبىتشىلىك ورنايدى! قازىر كوپتەگەن قوڭىراۋ مەن كەزدەسۋ بولىپ جاتىر، - دەپ قوستى ا ق ش پرەزيدەنتى.
ترامپ يزرايلدىڭ يراننىڭ رۋحاني كوسەمى اياتوللا ءالي حامەنەيدى ءولتىرۋ تۋرالى ۇسىنىسىن قابىلداعان جوق، دەپ حابارلادى امەريكالىق شەنەۋنىك NBC News ارناسىنا.
كاليفورنيالىق دەموكرات سەناتور ادام شيفف پەن كەنتۋككي شتاتىنان رەسپۋبليكاشىل سەناتور رەند پول «باسپاسوزبەن كەزدەسۋ» باعدارلاماسىنىڭ جۇرگىزۋشىسى كريستەن ۋەلكەرگە ا ق ش يرانمەن اسكەري قاقتىعىسقا بارۋدان ساق بولۋى كەرەك ەكەنىن مالىمدەدى.
ءوز كەزەگىندە يزرايل دەلدال رەتىندە ارەكەت ەتەتىن باتىس ەلدەرى ارقىلى يراننان شابۋىلداردى توقتاتىپ، يادرولىق كەلىسسوزگە قايتا ورالۋىن سۇرادى، دەپ حابارلادى تەگەرانداعى جوعارى لاۋازىمدى يراندىق دەرەككوز NBC News كە.
بۇعان دەيىن يزرايل پرەمەر-ءمينيسترى نەتانياحۋ يراننىڭ يزرايلگە قاتىستى مالىمدەمەسىن كۇمانمەن قابىلداعانىن جازعان بولاتىنبىز.
