ترامپ يراننىڭ يادرولىق نىساندارىن جوياتىنىن ەسكەرتتى
استانا. KAZINFORM - ەگەر يران يادرولىق نىساندارىن قايتا قالپىنا كەلتىرگىسى كەلسە، ولار جويىلادى. بۇل تۋرالى ا ق ش پرەزيدەنتى دونالد ترامپ Truth Social جەلىسىندە جازدى.
- يرانداعى ءۇش يادرولىق نىسان تولىعىمەن جويىلدى جانە/نەمەسە ىستەن شىعارىلدى. ولاردى قايتا ىسكە قوسۋعا بىرنەشە جىل قاجەت بولار ەدى. ەگەر يران ولاردى قايتا جانداندىرۋدى قالاسا، بۇل وعان ءتيىمسىز بولماق. ودان دا ءۇش جاڭا جەردە جاڭادان باستاۋ تيىمدىرەك بولار ەدى - ويتكەنى ولار قايتادان جويىلادى، - دەپ جازدى اق ءۇي باسشىسى.
بۇعان دەيىن يران بيلىگى سانكتسيالىق قىسىم كۇشەيسە، يادرولىق قارۋدى تاراتپاۋ تۋرالى شارتتان شىعۋى مۇمكىن ەكەنىن ەسكەرتكەن. سونداي-اق ۋراندى %60 دان جوعارى دەڭگەيدە بايىتۋ، زاماناۋي تسەنتريفۋگالار ءوندىرىسى مەن ەكسپورتىن ۇلعايتۋ جوسپارلارى بار ەكەنىن ايتقان. بۇل تۋرالى يران پارلامەنتىنىڭ ۇلتتىق قاۋىپسىزدىك جانە سىرتقى ساياسات جونىندەگى كوميسسياسىنىڭ وكىلى ەبراحيم رەزاي Tasnim اگەنتتىگىنە مالىمدەگەن.
سونىمەن قاتار يران بيلىگى ماگاتە-مەن (اتوم ەنەرگياسى جونىندەگى حالىقارالىق اگەنتتىك) ىنتىماقتاستىقتى تولىق توقتاتپاعانىن، ءبىراق الداعى ۋاقىتتا ونى جاڭا فورماتتا جالعاستىراتىنىن حابارلاعان.
