ترامپ UFC جەكپە-جەگى اق ءۇي اۋماعىندا وتەتىنىن حابارلادى
استانا. KAZINFORM – ا ق ش پرەزيدەنتى دونالد ترامپ UFC جەكپە-جەگى اق ءۇي الاڭىندا وتەتىنىن ايتتى، دەپ حابارلايدى ت ا س س.
2026-جىلى ا ق ش- تىڭ تاۋەلسىزدىك دەكلاراتسياسىنىڭ قابىلدانعانىنا 250 جىل تولاتىنىنا بايلانىستى ايوۆادا سويلەگەن سوزىندە ترامپ بۇل داتاعا ارنالعان مەرەكەلىك شارالار بۇكىل ەلدە بولاتىنىن جەتكىزدى.
- ءبىز ءتىپتى UFC جەكپە-جەگىن ۇيىمداستىرامىز دەپ ويلايمىن، - دەدى امەريكا كوشباسشىسى.
ول سونداي-اق UFC پرەزيدەنتى دانا ۋايتتى ەرەكشە اتاپ ءوتتى.
- UFC جەكپە-جەگىن اق ءۇيدىڭ اۋماعىندا وتكىزەمىز. ەلەستەتىپ كورىڭىزشى. وندا بىزدە كوپ ورىن بار، - دەدى ترامپ.
ونىڭ ايتۋىنشا، اتالعان جەكپە-جەكتى تاماشالاۋعا 20-25 مىڭ كورەرمەن كەلەدى.
ترامپ جەكپە-جەك ناقتى قاشان ءوتۋى مۇمكىن ەكەنىن جانە وعان كىم قاتىساتىنىن ايتپادى. اق ءۇيدىڭ باسپا ءسوز پۋلىنداعى جۋرناليستەر امەريكا اكىمشىلىگىنىڭ باسپا ءسوز حاتشىسى كەرولاين ليۆيتتىڭ سوزدەرىنە سىلتەمە جاساپ، ترامپتىڭ شىنىمەن سولاي ايتقانىن حابارلادى.
