ترامپ: «Trump card» الۋعا 15 مىڭنان اسا شەتەلدىك ءوتىنىش بەردى
استانا. KAZINFORM - ا ق ش- تىڭ جاڭا تۇرعىلىقتى تۇرۋ رۇقساتى - «Trump card» دەپ اتالاتىن كارتانى الۋعا 15 مىڭنان اسا شەتەل ازاماتى نيەت ءبىلدىردى، دەپ جازادى تاسس.
ا ق ش بيلىگى ولاردىڭ ەسەبىنەن بيۋدجەتكە 75 ميلليارد دوللار تۇسىرەمىز دەپ ۇمىتتەنىپ وتىر. بۇل تۋرالى ا ق ش پرەزيدەنتى دونالد ترامپ مالىمدەدى.
- كەشە كەشكىسىن Trump card الۋ ءۇشىن ءوتىنىش بەرۋ سايتى ىسكە قوسىلعاننان كەيىن 15 مىڭنان استام ادام تىركەلىپ، كۇتۋ تىزىمىنە قوسىلدى. بۇل - بيۋدجەتىمىزدى تەڭگەرىپ، امەريكانى نىعايتۋعا جۇمسالاتىن 75 ميلليارد دوللار، - دەدى ا ق ش پرەزيدەنتى Truth Social جەلىسىندە.
Trump card الۋ جۇيەسى ءالى جۇمىس ىستەمەيدى. تيىسىنشە، ا ق ش ۇكىمەتى ازىرگە مۇنداي تولەمدەردى قابىلداپ جاتقان جوق.
ا ق ش پرەزيدەنتى ناۋرىز ايىندا Fox News تەلەارناسىنا بەرگەن سۇحباتىندا بۇل جاڭا تۇرۋ رۇقساتى ءتۇرىنىڭ «Trump card» دەپ اتالۋى مۇمكىن ەكەنىن ايتقان بولاتىن (اعىلشىن تىلىندەگى «trump card» تىركەسى كارتا ويىندارىندا «كوزىر كارتا» دەگەندى بىلدىرەدى). ا ق ش اكىمشىلىگىنىڭ باسشىسى بۇل كارتالاردى ساتۋدان تۇسەتىن بارلىق قاراجات ا ق ش- تىڭ 36 تريلليون دوللاردان اسقان استرونوميالىق مەملەكەتتىك قارىزىن ازايتۋعا جۇمسالاتىنىن اتاپ ءوتتى.
پرەزيدەنتتىڭ ايتۋىنشا، بۇل تۇرۋ رۇقساتى 5 ميلليون دوللارعا ساتىلماق.
- ايتالىق، ءبىز ولاردى 1 ميلليون دانا ساتتىق دەلىك. بۇل - 5 تريلليون دوللار، - دەدى اق ءۇي يەسى.
سونداي-اق، ترامپ ا ق ش بيلىگى بۇل كارتالاردى ساتىپ الاتىن شەتەلدىكتەرگە قاتىستى قانداي دا ءبىر ەلەۋلى شاعىم ايتسا، اقشالارى قايتارىلىپ، ولاردىڭ ءوز ەلىنە دەپورتاتسيالاناتىنىن ەسكەرتتى. ارينە، بۇل كارتانى ساتىپ العىسى كەلەتىندەر ا ق ش ارنايى قىزمەتتەرى تاراپىنان «ءتيىستى تەكسەرىستەن» وتەتىنىن دە ايتتى.
بۇل جاڭا كارتا شەتەلدىك ينۆەستورلارعا ا ق ش-تا تۇرۋعا رۇقسات بەرەتىن EB-5 باعدارلاماسىنىڭ ورنىن باسپاق.
