ترامپ: TikTok ءۇشىن باج سالىعىن جەڭىلدەتۋگە دايىنمىن
استانا. KAZINFORM - ا ق ش پرەزيدەنتى دونالد ترامپ 26-ناۋرىز كۇنى ByteDance كومپانياسىمەن TikTok تى ساتۋ تۋرالى كەلىسىمگە كەلۋ ءۇشىن قىتايعا قارسى ەنگىزىلگەن قوسىمشا باج سالىعىن تومەندەتۋگە دايىن ەكەنىن مالىمدەدى. بۇل تۋرالى Lianhe Zaobao باسىلىمى حابارلادى.
تالاپ بويىنشا، ByteDance كومپانياسى TikTok تى 5-ساۋىرگە دەيىن قىتايلىق ەمەس ساتىپ الۋشىعا وتكىزۋى شارت. ەگەر بۇل شارت ورىندالماسا، ۇلتتىق قاۋىپسىزدىككە قاتەر ءتوندىرۋى مۇمكىن دەگەن ايىپپەن پلاتفورماعا تىيىم سالىنۋعا ءتيىس.
انىعىندا بۇل تىيىم 2024 -جىلى قابىلدانعان شەشىمگە سايكەس، بيىلعى قاڭتاردا كۇشىنە ەنۋگە ءتيىس بولاتىن.
سارسەنبى كۇنى ترامپ جۋرناليستەرگە TikTok قا قاتىستى كەلىسىمگە قول جەتپەسە، بۇل مەرزىمدى كەيىنگە شەگەرۋگە دايىن ەكەنىن ايتتى.
TikTok بۇل مالىمدەمەگە قاتىستى ءالى پىكىر بىلدىرگەن جوق.
وتكەن جىلى قابىلدانعان نورماتيۆتىك قۇجاتقا سايكەس، ByteDance 2025 -جىلدىڭ 19-قاڭتارىنا دەيىن TikTok تان باس تارتۋعا ءتيىس بولاتىن. ا ق ش جوعارعى سوتى بۇل تالاپتى ورىنداۋ تۋرالى ۇكىم شىعارعاننان كەيىن، TikTok قاڭتار ايىندا ا ق ش- تا جۇمىسىن ۋاقىتشا توقتاتقان. الايدا، ترامپ بيلىككە ورالعان سوڭ، پلاتفورما قايتا ىسكە قوسىلدى.
ترامپ پرەزيدەنت بول سالا جارلىققا قول قويىپ، ءتيىستى تالاپتىڭ ورىندالۋ مەرزىمىن 5-ساۋىرگە دەيىن كەرى شەگەرگەن. ال وتكەن ايدا ول كەلىسىمگە قول جەتكىزۋ ءۇشىن بۇل مەرزىمدى ودان ءارى ۇزارتۋى مۇمكىن ەكەنىن ەسكەرتكەن.
ەسكە سالا كەتەيىك، بۇعان دەيىن ترامپ microsoft TikTok تى ساتىپ الۋعا قىزىعۋشىلىق تانىتىپ وتىرعانىن ايتقانىن جازعان بولاتىنبىز.
