ترامپ: رافاحتاعى اتىستىڭ ارتىندا حاماس كوتەرىلىسشىلەرى تۇر

استانا. KAZINFORM - گازا سەكتورىنىڭ وڭتۇستىگىندەگى رافاح قالاسىندا اتىستى توقتاتۋ رەجيمىن بۇزۋدىڭ ارتىندا پالەستينالىق حاماس ۇيىمى تۇر. بۇل تۋرالى ا ق ش پرەزيدەنتى دونالد ترامپ جۋرناليستەرگە Air Force One بورتىندا مالىمدەدى، دەپ جازدى Report.

ول بۇل وقيعاعا حاماس قوزعالىسى باسشىلىعىنىڭ ەش قاتىسى جوق ەكەنىن ايتتى.

- ءبىز حاماس باسشىلىعىنىڭ قاتىسى جوق دەپ ەسەپتەيمىز. بۇل حاماس قوزعالىسى قۇرامىنداعى كوتەرىلىسشىلەر بولۋى مۇمكىن. قالاي بولعاندا دا، ءبىز وتە قاتال ارەكەت ەتەمىز، - دەدى امەريكالىق كوشباسشى.

بۇعان دەيىن يزرايل اسكەرى انكلاۆتىڭ وڭتۇستىگىندەگى رافاح قالاسىنىڭ ماڭىندا ساربازدارعا وق جاۋدىرعان وقيعا تۋرالى ايتىپ، پالەستينالىق راديكالداردىڭ اتىستى توقتاتۋ كەلىسىمىن بۇزعانىن حابارلادى. يزرايل پرەمەر-ءمينيسترى بينيامين نەتانياحۋ اتىستى توقتاتۋ رەجيمىن بۇزعانى ءۇشىن حاماس-تى ايىپتاپ، قارۋلى كۇشتەرگە راديكالدارعا قارسى شارا قولدانۋعا بۇيرىق بەردى. سودان كەيىن ارميا انكلاۆقا بىرنەشە سوققى جاساپ، ونداعان نىساناعا شابۋىلدادى. كەيىنىرەك اسكەريلەر ەكى ساربازدىڭ قازا تاۋىپ، تاعى بىرەۋى اۋىر جارالانعانىن جەتكىزدى.

ال حاماس وكىلدەرى رافاح وقيعاسىنا قاتىسى جوق ەكەنىن ايتتى.