ترامپ قازان ايىنىڭ سوڭىندا بيزنەسمەندەرمەن بىرگە قىتايعا بارۋى مۇمكىن
ۆاشينگتون. KAZINFORM - ا ق ش پرەزيدەنتى دونالد ترامپ وسى كۇزدە امەريكالىق كومپانيا باسشىلارىمەن بىرگە قىتايعا ساپارمەن بارۋى مۇمكىن. بۇل تۋرالى Bloomberg اگەنتتىگى دەرەككوزدەرگە سىلتەمە جاساپ مالىمدەدى، دەپ جازادى ت ا س س.
امەريكالىق اكىمشىلىك وكىلدەرى كەيبىر كومپانيا جەتەكشىلەرىنە حابارلاسىپ، 2025 -جىلى اق ءۇي باسشىسىن قىتاي حالىق رەسپۋبليكاسىنا ىقتيمال ساپارىندا بىرگە جۇرۋگە مۇددەلى مە، جوق پا - سونى انىقتاۋعا تىرىسقان.
قاراستىرىلىپ جاتقان ىقتيمال مەرزىمدەردىڭ ءبىرى - قازان ايىنىڭ سوڭى. بۇل كەزدە وڭتۇستىك كورەيادا ازيا-تىنىق مۇحيتى ەكونوميكالىق ىنتىماقتاستىعى ءسامميتى، ال مالايزيادا وڭتۇستىك-شىعىس ازيا ەلدەرى قاۋىمداستىعىنىڭ جوعارى دەڭگەيدەگى كەزدەسۋى وتەدى. ا ق ش پرەزيدەنتى ادەتتە وسى ەكى ءىس-شاراعا دا قاتىسادى.
ترامپ العاشقى شەتەلدىك ساپارىن پارسى شىعاناعىنداعى ەلدەرگە جاساعان بولاتىن. ول ساپارعا قارجى، تەحنولوگيا جانە ءوندىرىس سالالارىنداعى جەتەكشى كومپانيالاردىڭ باسشىلارىن ەرتىپ بارعان. سول كەزدە پرەزيدەنت ەنەرگەتيكا، جاساندى ينتەللەكت، چيپتەر، اەروعارىش ونەركاسىبى جانە باسقا دا سالالاردى قامتيتىن ميللياردتاعان دوللارلىق جاڭا كەلىسىمدەرگە قول جەتكىزگەنىن جاريالاپ، ا ق ش- تىڭ كورپوراتيۆتىك قۋاتىن پاش ەتكەن.
بۇل جاعدايعا بايلانىستى پىكىر ءبىلدىرۋدى سۇراعاندا، ا ق ش اكىمشىلىگىنىڭ باسپا ءسوز حاتشىسى كەرولاين ليۆيتت قىتايعا ساپار قازىرگى ۋاقىتتا جوسپارلانىپ وتىرماعانىن ايتتى. ساۋدا مينيسترلىگى بۇل ماسەلەگە قاتىستى تۇسىنىكتەمە بەرۋدەن باس تارتتى.
ايتا كەتەيىك، بۇعان دەيىن ا ق ش كونگرەسىنىڭ وكىلدەر پالاتاسى ترامپتىڭ سالىقتى ازايتۋ تۋرالى زاڭ جوباسىن ماقۇلداعانىن جازدىق.
