ترامپ ناتو سامميتىنە قاتىسۋ ءۇشىن گااگاعا كەلدى
استانا. KAZINFORM - سەيسەنبى كۇنى كۇننىڭ ەكىنشى جارتىسىندا ا ق ش پرەزيدەنتى دونالد ترامپ مىنگەن ۇشاق نيدەرلاندتىڭ گااگا قالاسىنداعى اۋەجايعا كەلىپ قوندى.
اق ءۇي باسشىسى سولتۇستىك اتلانتيكالىق ىنتىماقتاستىق ۇيىمى (ناتو) سامميتىنە قاتىسادى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
نيدەرلاندتا ناتو- عا مۇشە ەلدەردىڭ مەملەكەت جانە ۇكىمەت باسشىلارى ەكى كۇندىك سامميتكە جينالىپ جاتىر. بۇل جيىن اليانستىڭ جاڭادان تاعايىندالعان باس حاتشىسى مارك ريۋتتە ءۇشىن العاشقى جوعارى دەڭگەيدەگى ءىس-شارا بولماق.
سامميتتىڭ نەگىزگى تاقىرىپتارى - مۇشە ەلدەردىڭ قورعانىس شىعىندارىن ۇلتتىق ىشكى جالپى ءونىمنىڭ (ءى ج ءو) %5 نا دەيىن ارتتىرۋ جانە قازىرگى جاعدايداعى ناتو- نىڭ قورعانىس قابىلەتىن كۇشەيتۋ.
الەمدەگى ەڭ ءىرى اسكەري بلوكتىڭ كوشباسشىلارى يران توڭىرەگىندەگى احۋالدى جانە جالپى تاياۋ شىعىستاعى جاعدايدى دا تالقىلاۋى مۇمكىن. سونىمەن قاتار گااگاعا ۋكراينا پرەزيدەنتى ۆلاديمير زەلەنسكي دە كەلدى.
باتىس باسىلىمدارىنىڭ جازۋىنشا، دونالد ترامپ پەن ۆلاديمير زەلەنسكي اراسىندا جەكە كەزدەسۋ 24- ماۋسىم كەشكىسىن سامميت قوناقتارىنا ارنالعان نيدەرلاند كورولىنىڭ قابىلداۋى كەزىندە نەمەسە 25 -ماۋسىم كۇنى كۇندىز «ءىس- شارا شەڭبەرىندە» ءوتۋى مۇمكىن.
ا ق ش پرەزيدەنتى دونالد ترامپتىڭ اكىمشىلىگى ۋكرايناعا ءداستۇرلى اسكەري كومەكتى قىسقارتىپ، ناتو- داعى وداقتاستاردىڭ قورعانىس شىعىندارىن ارتتىرۋعا باسىمدىق بەرىپ وتىر. ال ەۋروپالىق وداق ەلدەرى مەن كانادا كەلەسى جىلى ۋكرايناعا 35 ميلليارد ەۋرودان استام قوسىمشا اسكەري كومەك بولۋگە ۋادە بەرگەن.
