ترامپ پەن پۋتين زەلەنسكيمەن كەلىسسوزدەن كەيىن نە تۋرالى سويلەستى
استانا. KAZINFORM - رەسەي جانە ا ق ش پرەزيدەنتتەرى ۆلاديمير پۋتين مەن دونالد ترامپ شامامەن 40 مينۋتقا سوزىلعان تەلەفون اڭگىمەسىن جۇرگىزدى، دەپ حابارلايدى ت ا س س اقپارات اگەنتتىگى.
امەريكا پرەزيدەنتى پۋتينگە ۆلاديمير زەلەنسكيمەن جانە ءبىرقاتار ەۋروپالىق ەلدىڭ جەتەكشىلەرىمەن كەلىسسوز اياقتالعانى تۋرالى اقپاراتتاندىردى، دەپ حابارلادى رەسەي پرەزيدەنتىنىڭ كومەكشىسى يۋري ۋشاكوۆ بريفينگتە.
ر ف مەن ا ق ش پرەزيدەنتتەرىنىڭ اڭگىمەسى اشىق جانە سىندارلى سيپاتتا بولدى:
- اڭگىمە شامامەن 40 مينۋتقا سوزىلدى.
رەسەي پرەزيدەنتى ترامپتىڭ ۋكرايناداعى ۇزاق مەرزىمدى رەتتەۋگە اكەلەتىن شەشىمدەردى ىزدەۋدەگى جەكە كۇش-جىگەرىنىڭ ماڭىزدىلىعىن تاعى دا اتاپ ءوتتى.
الياسكاداعى كەزدەسۋ دە تالقىلاندى.
- ءبىزدىڭ پرەزيدەنت امەريكالىق ارىپتەسىنە قوناقجايلىلىعى، الياسكاداعى كەزدەسۋدى جاقسى ۇيىمداستىرعانى جانە ۋكراينا داعدارىسىن بەيبىت جولمەن شەشۋ جولىنداعى كەزدەسۋ بارىسىندا قول جەتكىزىلگەن ىلگەرىلەۋشىلىك ءۇشىن جىلى لەبىزىن ءبىلدىردى، - دەپ اتاپ ءوتتى ۋشاكوۆ.
اڭگىمەلەسۋ قورىتىندىسى
پۋتين مەن ترامپ ر ف مەن ۋكراينا دەلەگاتسيالارى اراسىنداعى تىكەلەي كەلىسسوزدى جالعاستىرۋدى قولدايتىنىن ءبىلدىردى.
- ۋكراين جانە رەسەيلىك تاراپ وكىلدەرىنىڭ، ياعني جوعارىدا اتالعان تىكەلەي كەلىسسوزگە قاتىساتىن وكىلدەردىڭ دەڭگەيىن كوتەرۋ مۇمكىندىگىن زەردەلەۋ كەرەك دەگەن يدەيا تالقىلاندى.
ەل باسشىلارى «ۋكراين جانە حالىقارالىق جانە ەكىجاقتى كۇن تارتىبىندەگى باسقا دا وزەكتى ماسەلەلەر بويىنشا ءبىر-بىرىمەن تىعىز بايلانىستا بولۋدى جالعاستىرۋعا كەلىستى».
بۇعان دەيىن ۋكراينا پرەزيدەنتى ۆلاديمير زەلەنسكي مەن ا ق ش پرەزيدەنتى دونالد ترامپ اق ۇيدەگى جابىق كەلىسسوزدى اياقتاپ، ەۋروپالىق كوشباسشىلارمەن كەزدەسۋگە كىرىسكەنىن جازعان ەدىك.
