ترامپ ۋكراين بوسقىندارىنا ا ق ش-تا قالۋىنا رۇقسات بەرۋى مۇمكىن
استانا. KAZINFORM - ا ق ش پرەزيدەنتى دونالد ترامپ ۋكراين بوسقىندارىنا ەلدە سوعىس بىتكەنشە قالۋعا رۇقسات بەرۋى مۇمكىن ەكەنىن ايتتى. بۇل بوسقىندار «ۋكراينامەن ىنتىماقتاستىق» (Uniting for Ukraine) باعدارلاماسى اياسىندا ا ق ش-تا تۇرىپ جاتىر، دەپ جازدى DW.
ا ق ش پرەزيدەنتى دونالد ترامپ رەسەيدىڭ ۋكرايناعا قارسى باستاعان سوعىسى اياقتالعانعا دەيىن ۋكراين بوسقىندارىنىڭ ا ق ش- تا قالۋىنا رۇقسات بەرۋى مۇمكىن ەكەنىن مالىمدەدى.
- ءبىز سولاي ىستەيمىز. بىزگە ۋكراينادان كوپتەگەن ادام كەلدى، جانە ءبىز ولارعا كومەكتەسىپ جاتىرمىز، - دەدى ترامپ 30 -شىلدە كۇنى بەيسەنبىدە ۆاشينگتوندا DW ءتىلشىسىنىڭ سۇراعىنا جاۋاپ بەرە وتىرىپ.
رەسەيدىڭ ۋكرايناعا باسىپ كىرۋى 2022 -جىلعى اقپاندا باستالعان سوڭ، ا ق ش «ۋكراينامەن ىنتىماقتاستىق» (Uniting for Ukraine / U4U) باعدارلاماسى اياسىندا ۋكراين ازاماتتارىنا ەلگە كىرۋگە مۇمكىندىك بەردى. بۇل باعدارلاما بويىنشا ۋكراين ازاماتتارىنا ا ق ش- تا دەمەۋشىلەرى (سپونسورلارى) بولعان جاعدايدا كىرۋگە جانە ۋاقىتشا تۇرۋعا رۇقسات بەرىلەدى.
Forbes جۋرنالى ماۋسىم ايىندا حابارلاعانداي، وسى باعدارلاما اياسىندا 236 مىڭنان استام دەمەۋشىلىك ءوتىنىم ماقۇلدانعان، ال 187 مىڭنان استام ۋكراين ازاماتى ا ق ش- قا كەلگەن.
الايدا ترامپتىڭ ەكىنشى پرەزيدەنتتىك مەرزىمى باستالعاندا، 2025 -جىلعى ناۋرىزدا، Reuters اگەنتتىگىنە سىلتەمە جاساعان دەرەككوزدەر ا ق ش بيلىگى 2022 -جىلدان كەيىن ەلگە كەلگەن 240 مىڭ ۋكراين بوسقىندى زاڭدى مارتەبەسىنەن ايىرۋدى جوسپارلاپ وتىرعانىن حابارلادى. بۇل اقپاراتتى اق ءۇي جالعان دەپ اتادى.
2025 -جىلعى ساۋىردە كەيبىر ۋكراين بوسقىندارىنا ا ق ش ىشكى قاۋىپسىزدىك مينيسترلىگىنەن ەلدەن شىعۋدى سۇراعان ەلەكتروندى حات كەلگەن. كەيىن مينيسترلىك بۇل حاتتاردىڭ قاتەلىكپەن جىبەرىلگەنىن مالىمدەدى.
