ترامپ دىبىستان جىلدام اۆياتسيانى دامىتۋ تۋرالى جارلىققا قول قويدى
استانا. KAZINFORM - ا ق ش پرەزيدەنتى امەريكا بۇل سالادا ءبىر كەزدەرى الەمدىك كوشباسشى بولعانىن اتاپ ءوتتى، دەپ حابارلايدى تاسس.
ا ق ش پرەزيدەنتى دونالد ترامپ دىبىستان جىلدام اۆياتسيانى دامىتۋدى قايتا جانداندىرۋعا جاردەمدەسۋگە باعىتتالعان اتقارۋشىلىق جارلىققا قول قويدى. بۇل تۋرالى اق ءۇيدىڭ باسپا ءسوز قىزمەتى حابارلادى.
- امەريكا ءبىر كەزدەرى دىبىستان جىلدام اۆياتسيا سالاسىندا الەمدىك كوشباسشى بولعان، الايدا بىرنەشە ونجىلدىقتار بويى قويىلعان قاتاڭ شەكتەۋلەر بۇل باعىتتاعى پروگرەستى توقتاتتى. بۇل جارلىق نورماتيۆتىك كەدەرگىلەردى جويا وتىرىپ، امەريكالىق كومپانيالاردىڭ دىبىستان جىلدام ۇشۋلار سالاسىندا قايتادان كوش باستاۋىنا مۇمكىندىك بەرەدى، - دەلىنگەن اق ءۇي مالىمدەمەسىندە.
حابارلاما ماتىنىنە سايكەس، جارلىق ا ق ش- تىڭ ازاماتتىق اۆياتسيا فەدەرالدى باسقارماسىنا دىبىستان جىلدام ۇشاقتارعا قاتىستى ۇشۋ شەكتەۋلەرىن الىپ تاستاۋدى جانە وسىنداي اۋە كەمەلەرىنە ارنالعان مەملەكەتتىك سەرتيفيكاتتاۋ ستاندارتتارىن بەكىتۋدى تاپسىردى. سونداي-اق قۇجاتتا ا ق ش پەن باسقا ەلدەر اراسىندا حالىقارالىق دىبىستان جىلدام اۋە قاتىناستارىن ۇيىمداستىرۋ ءۇشىن كەلىسىمدەر جاساسۋ قاراستىرىلعان.
سوڭعى رەت ازاماتتىق دىبىستان جىلدام ۇشاق رەتىندە قىزمەت كورسەتكەن اۋە كەمەسى — Concorde بولدى. ول ۇلى بريتانيا مەن فرانسيا ۇكىمەتتەرىنىڭ بىرلەسكەن جوباسى نەگىزىندە جاسالعان. بۇل ۇشاقتىڭ كوممەرتسيالىق قولدانىسى 2003 -جىلى توقتاتىلدى. بۇعان 2000 -جىلى بولعان اپات سەبەپ بولدى، ونىڭ سالدارىنان 203 جولاۋشى قازا تاپقان. ازاماتتىق اۆياتسيا تاريحىندا جولاۋشىلاردى دىبىستان جىلدام اۋە لاينەرىمەن تاسىمالداۋ تەك ەكى ۇشاقپەن جۇزەگە اسىرىلدى: كەڭەستىك تۋ-144 جانە Concorde.
ايتا كەتەلىك دونالد ترامپ پەن يلون ماسك اراسىنداعى شيەلەنىس جەكە ايىپتاۋلار مەن قوقان-لوقىلارعا ۇلاستى.
