ترامپ Coca-Cola-نى ا ق ش- تاعى سۋسىن قۇرامىن وزگەرتۋگە كوندىردى
استانا. KAZINFORM – ا ق ش پرەزيدەنتى دونالد ترامپ Coca-Cola كومپانياسى ەلدە ساتىلاتىن سۋسىنداردا جۇگەرى ءشارباتىنىڭ ورنىنا قامىس قانتىن قولدانۋعا كەلىسكەنىن مالىمدەدى.
- Coca-Cola-مەن سويلەسىپ، ا ق ش- تاعى سۋسىندارىنا تەك قامىس قانتىن قوسۋ تۋرالى ۇسىنىس جاسادىم. ولار كەلىستى. بۇل - وتە دۇرىس شەشىم. جاقىن ارادا ناتيجەسىن كورەسىزدەر، - دەپ جازدى ترامپ Truth Social پلاتفورماسىندا.
كومپانيا بۇل شەشىمدى ناقتى راستاعان جوق. الايدا Coca-Cola وكىلى پرەزيدەنت ترامپتىڭ قىزىعۋشىلىعىنا ريزاشىلىق ءبىلدىرىپ، جاقىن ۋاقىتتا ءونىم جەلىسىندەگى جاڭا يننوۆاتسيالار تۋرالى مالىمەت تاراتىلاتىنىن حابارلادى.
ايتا كەتەيىك، ا ق ش- تا ساتىلاتىن Coca-Cola ونىمدەرى كوبىنە جۇگەرى شارباتىمەن تاتتىلەندىرىلسە، مەكسيكا، ۇلى بريتانيا جانە اۆستراليا سياقتى ەلدەردە قامىس قانتى جيى قولدانىلادى.
ا ق ش دەنساۋلىق ساقتاۋ ءمينيسترى روبەرت كەننەدي جۇگەرى ءشارباتى، جاساندى بوياعىشتار مەن وسىمدىك مايلارى سياقتى ينگرەديەنتتەردىڭ زيانى تۋرالى بىرنەشە رەت مالىمدەگەن. ونىڭ «Make America Healthy Again» قوزعالىسى ازىق-تۇلىك ونىمدەرىنىڭ قۇرامىن جاقسارتۋدى كوزدەيدى. مينيستر بيىلعى جازدا ەلدەگى تاعامدىق ستاندارتتاردى جاڭارتۋدى جوسپارلاپ وتىر.
ترامپتىڭ باستاماسى ا ق ش- تاعى جۇگەرى وندىرۋشىلەرىنىڭ قارسىلىعىن تۋدىردى. جۇگەرى وڭدەۋشىلەر قاۋىمداستىعىنىڭ باسشىسى دجون بوۋدتىڭ ايتۋىنشا، مۇنداي وزگەرىس مىڭداعان جۇمىس ورنىنىڭ قىسقارۋىنا، فەرمەرلەر تابىسىنىڭ تومەندەۋىنە جانە شەتەلدىك قانت يمپورتىنىڭ ارتۋىنا الىپ كەلۋى مۇمكىن.
2024-جىلدىڭ كوكتەمىندە Coca-Cola باس ديرەكتورى دجەيمس كۋينسي ينۆەستورلارمەن كەزدەسۋدە كومپانيانىڭ قانت مولشەرىن ازايتۋ جانە ءونىم اسسورتيمەنتىن جاڭارتۋ باعىتىنداعى جۇمىستارى جالعاسىپ جاتقانىن ايتقان بولاتىن.
ايتا كەتەيىك، ترامپ 150 دەن استام ەلگە 10-15 پايىز باج سالىعىن سالماق.
