ترامپ ۆاشينگتوندا توتەنشە جاعداي ەنگىزەمىن دەپ قورقىتتى
استانا. KAZINFORM – ا ق ش پرەزيدەنتى دونالد ترامپ قاجەت بولعان جاعدايدا ەل استاناسى ۆاشينگتوندا توتەنشە جاعداي رەجيمىن ەنگىزەتىنىن ايتتى، دەپ حابارلايدى انادولى.
بۇل مالىمدەمەنى ا ق ش پرەزيدەنتى استانا مەرى ميۋريەل بوۋزەردىڭ ا ق ش-تىڭ يمميگراتسيا جانە كەدەن پوليتسياسىمەن ىنتىماقتاستىقتا جۇمىس ىستەۋدەن باس تارتقانىنان كەيىن جاسادى.
اق ءۇي باسشىسى Truth Social الەۋمەتتىك جەلىسىندە ءوزىنىڭ جەتەكشىلىگىمەن فەدەرالدى ۇكىمەت ەل استاناسىن جايلاعان قىلمىستىق تارتىپسىزدىككە ارالاسىپ، سونىڭ سالدارىنان كولۋمبيا وكرۋگى بىرنەشە اپتانىڭ كولەمىندە ا ق ش- تىڭ، ءتىپتى الەمنىڭ ەڭ قاۋىپتى جانە كىسى ءولىمى كوپ بولاتىن ايماقتارىنىڭ بىرىنەن ەڭ ءاۋىپسىز جەرگە اينالىپ شىعا كەلگەنىن جەتكىزدى.
- جىلدار بويى وسى زورلىق-زومبىلىق پەن قىلمىسقا ءتوزىپ وتىرعان قالا مەرى ميۋريەل بوۋزەر بولسا، فەدەرالدى ۇكىمەتكە استانا پوليتسياسىنىڭ قاۋىپتى، زاڭسىز شەتەلدىكتەردى ەلدەن شىعارۋ ىسىندە يمميگراتسيا جانە كەدەن قىزمەتىمەن بىرلەسىپ جۇمىس ىستەمەيتىنىن ايتادى. ەگەر مەن بۇعان جول بەرەتىن بولسام، وندا قىلمىستىق الەم كۇش الىپ، جاڭا قارقىنمەن قايتا كەلەدى. مەن بۇعان جول بەرە المايمىن. ەگەر قاجەت بولسا مەن توتەنشە جاعداي رەجيمىن جاريالايمىن، - دەدى ترامپ.
