ترامپ 12 ەلدىڭ ازاماتتارىنا ا ق ش-قا كىرۋگە تىيىم سالدى
استانا. KAZINFORM - ا ق ش پرەزيدەنتى دونالد ترامپ ازيا، افريكا مەن لاتىن امەريكاسىنىڭ 12 ەلىنىڭ ازاماتتارىنىڭ ەلگە كىرۋىنە تىيىم سالاتىن جانە تاعى 7 ەلدىڭ ازاماتتارىنا شەكتەۋ قوياتىن جارلىققا قول قويدى، دەپ حابارلايدى BBC.
اق ءۇيدىڭ حابارلاۋىنشا، اۋعانستان، ميانما، چاد، كونگو رەسپۋبليكاسى، ەكۆاتوريالدى گۆينەيا، ەريترەيا، گايتي، يران، ليۆيا، سومالي، سۋدان مەن يەمەن ازاماتتارىنا ا ق ش-قا كىرۋگە تىيىم سالىنعان.
بۇل تىيىم 9-ماۋسىم كۇنى كۇشىنە ەنەدى.
سونداي-اق بۋرۋندي، كۋبا، لاوس، سەررا-لەونە، توگو، ۆەنەسۋەلا مەن تۇرىكمەنستان ازاماتتارىنا ءىشىنارا كىرۋگە تىيىم سالىندى.
دونالد ترامپ كەيبىر مەملەكەتتەردىڭ ازاماتتارىنا ەلگە كىرۋىنە ءبىرىنشى پرەزيدەنتتىك مەرزىمىندە-اق تىيىم سالعان ەدى. بۇل ونىڭ 2017 -جىلعى پرەزيدەنت لاۋازىمىندا قابىلداعان العاشقى شەشىمى بولاتىن.
ترامپ ول كەزدە ليۆيا، سيريا، يەمەن مەن سومالي ازاماتتارىن شەكارادان وتكىزبەيتىن بولدى. كەيىنىرەك تىزىمگە سولتۇستىك كورەيا، ۆەنەسۋەلا مەن چاد ازاماتتارى دا قوسىلدى.
تىيىم سالۋعا قاتىستى شەشىم سوتتاردا بىرنەشە مارتە قارالىپ، وزگەرتىلدى. الايدا ا ق ش جوعارعى سوتى ونى كونستيتۋتسياعا ساي دەپ تاپتى.
بۇعان دەيىن ا ق ش-تىڭ سيرياداعى اسكەري قاتىسۋىن قىسقارتىپ، ءبىر عانا بازانى قالدىراتىنى تۋرالى ايتىلعان بولاتىن.
