تەڭگەنىڭ نىعايۋى ازىق-تۇلىك باعاسىن تومەندەتۋگە اسەر ەتە مە
استانا. KAZINFORNM - اۋىل شارۋاشىلىعى مينيسترلىگى ۇلتتىق ۆاليۋتانىڭ نىعايۋى ازىق-تۇلىك باعاسىنا اسەر ەتۋى مۇمكىندىگىنە قاتىستى پىكىر ءبىلدىردى.
ۆيتسە-مينيستر ازات سۇلتانوۆتىڭ ايتۋىنشا، كەيىنگى كەزدە ءبىرقاتار پوزيتسيا بويىنشا باعانىڭ ءوسۋى تىركەلدى.
- كۇنباعىس مايى مەن كوكونىستەرگە، ياعني كارتوپتىڭ، ءسابىزدىڭ جانە پيازدىڭ قىمباتتاۋى بايقالدى. ءبىراق بۇل ءوسىم %1 دەيىنگى ارالىقتا بولدى جانە مۇنى ماۋسىمدىق سيپاتپەن بايلانىستىرامىز، - دەدى ا. سۇلتانوۆ پارلامەنت ماجىلىسىندە تىلشىلەر سۇراعىنا جاۋاپ بەرە وتىرىپ.
سونداي-اق ول تەڭگەنىڭ نىعايۋى ازىق-تۇلىك باعاسىنا ۇزاق مەرزىمدى اسەر ەتپەيتىنىن ايتتى.
- يمپورت تۋرالى ايتاتىن بولساق، ولار سيكلدىك سيپاتتا بولادى. دوللار باعامى السىرەگەن كەزدە، ولار ەسكى باعاممەن جەتكىزىلگەن، ياعني بۇرىنعى قالدىقتاردى ساتۋى مۇمكىن. باعاعا ساتىپ الۋ جانە ساقتاۋ شىعىندارى كىرەدى. ۆاليۋتا نارىعىنداعى قىسقا مەرزىمدى وزگەرىستەر يمپورتتىق تاۋارلاردىڭ قۇنىن تومەندەتۋدە ەلەۋلى اسەر ەتپەيدى، - دەدى سۇلتانوۆ.
بۇگىن قازاقستان قور بيرجاسىنداعى (KASE) ساۋدا-ساتتىق قورىتىندىسى بويىنشا دوللار باعامى ارزاندادى.
ايتا كەتەيىك، جاقىندا پرەمەر-ءمينيستردىڭ ورىنباسارى - ۇلتتىق ەكونوميكا ءمينيسترى سەرىك جۇمانعاريننىڭ توراعالىعىمەن وتكەن ينفلياتسيانى تۇراقتاندىرۋ جونىندەگى كەزەكتى كەڭەستە ءبىرىنشى توقساننىڭ الدىن الا قورىتىندىلارى قارالدى.
