تەمىردەن ءتۇيىن تۇيگەن شەبەر

«تەنسەگريتي» تەحنولوگياسى تۋرالى نە بىلەسىز؟ ينجەنەريا مەن ساۋلەت، ونەر مەن عارىش سالاسىندا كەيىنگى جىلدارى كەڭىنەن قولدانىسقا ەنگەن يننوۆاتسيالىق تەحنولوگيا كۇندەلىكتى تۇرمىستا كەزدەسەدى.

زاماناۋي ديزايننىڭ قىر- سىرىن اقتوبە وبلىسىنىڭ تۇرعىنى مارات ۇمبەتوۆ مەڭگەرىپ العان. تەمىردەن ءتۇيىن تۇيگەن شەبەردىڭ تۋىندىلارى پوستمودەرندىك، كينەتيكالىق قولونەر كورمەلەرىنە لايىق-دەيدى باعا بەرگەندەر. قىرىق جىل تىنىم تاپپاي ەڭبەك ەتكەن جان اپاتقا ۇشىراپ مۇگەدەك ارباسىنا تاڭىلعانىنا قاراماستان كاسىبىن تاستامادى.

مارات ۇمبەتوۆ، مارتوك اۋدانىنىڭ تۇرعىنى:

- بۇل تارتىلۋ جانە سىعىلۋ جۇيەسى دەپ اتالادى. ءتورت بۇرىشىنداعى شىنجىر تارتىپ تۇرسا، ورتاداعى شىنجىر ورىندىقتى ۇستاپ تۇر. ەگەر تەپە- تەڭدىكتى ساقتاي وتىرا بۇرانداسىن بوساتسا تەڭسەلىپ تۇرادى. ورىندىق قالىقتاپ تۇرعانداي اسەر قالدىرادى. ليەۆيتاتسيا ءستيلى دەگەن وسى. ورىندىق تەڭسەلىپ تۇرعانىمەن بەرىكتىگىنە ءشۇبا جوق. فيزيكانىڭ تەپە- تەڭدىك زاڭىنا باعىنادى.

مەحانيكا مەن كينەتيكانى بالا كۇنىنەن يگەرگەن مارات ۇمبەتوۆكە تەنسەگريتي تەحنولوگياسىن ۇيرەنۋ قيىنعا سوقپاعان. ورىنداقتار مەن ۇستەلدەر، قانشا تەڭسەلسە دە تۇعىرىنان تۇسپەيتىن ماياتنيك ويىنشىقتار جاساعان. مارات ۇمبەتوۆ ءومىر بويى دانەكەرلەۋشى بولعان. ءۇش جىل بۇرىن كولىك اپاتىنا ۇشىراپ، مۇگەدەك ارباسىنا تاڭىلدى. الايدا بىلىكتى مامان كاسىبىنەن قول ۇزگەن جوق. اۋىل تۇرعىندارى ءتۇرلى بۇيىمداردى جوندەتۋگە ءجيى باس سۇعادى. قارا تەمىرگە جان بىتىرەتىن حاس شەبەر بوس ۋاقىتىندا ءۇيىنىڭ اينالاسىن بەزەندىرۋگە دە كىرىسكەن.

مارات ۇمبەتوۆ، مارتوك اۋدانىنىڭ تۇرعىنى

: - ەسىكتىڭ الدىنا ءداۋ ايداھار جاساعىم كەلەدى. قازىر قاجەتتى تەمىر- تەرسەكتى جيىپ ءجۇرمىن. اۋقىمدى ءمۇسىن بولۋى ءتيىس. سوندىقتان ءبىراز ۋاقىت كەتەدى.

 دانەكەرلەۋ ءىسىنىڭ قىر سىرىن مارات ۇمبەتوۆ ۇلى ساناتقا ۇيرەتتى. جوعارى وقۋ ورنىندا تۋريزم مەنەدجەرى ماماندىعى بويىنشا ءبىلىم العان ول اكە جولىن قۋىپ جۇمىسشى ماماندىق يەسى اتاندى.

 سانات ۇمبەتوۆ، مارتوك اۋدانىنىڭ تۇرعىنى:

- بالا كۇنىمدە قاسىندا ويناپ ءجۇرىپ، تەمىر بالقىتقاندى قىزىق كورىپ تاماشالايتىنمىن. ەس بىلگەلى قاسىندامىن عوي. ءبىرىنشى ەلەكتر دانەكەرلەۋشىنى ۇيرەتتى. كەيىن اۆتوگەندى كورسەتتى. باستىسى قولىمدى قاققان جوق. ءوز بەتىممەن ۇيرەنىپ، تاجىريبە جيناعانىمدى قولدادى. ءاردايىم اقىل- كەڭەسىن ايتادى. ناتيجەسىندە قازىر ۇلكەن زاۋىتتا ەڭبەك ەتىپ ءجۇرمىن.

 قولونەر شەبەرى جاساعان بۇيىمدارعا قىزىعۋشىلار از ەمەس. الايدا ونەرپاز ەرەكشە جيھازدارى مەن ەستەلىك- سىي بولاتىن ويىنشىقتاردى ساتقىسى جوق.

مانسۇر ەسقوجين، بولاتبەك مولداعاليەۆ

 https://24.kz