تەلەفون الاياقتىعىنا قارسى قانداي جۇمىستار جۇرگىزىلىپ جاتىر - مينيستر جاۋابى

استانا. KAZINFORM - ۇكىمەت وتىرىسىندا ەلىمىزدە تەلەفون الاياقتىعىنا قارسى قانداي ءىس-شارالار اتقارىلىپ جاتقانى ايتىلدى.

- ونلاين الاياقتىققا قارسى ءىس-قيمىلعا بارلىق مۇددەلى مەملەكەتتىك جانە قۇقىق قورعاۋ ورگاندارى تارتىلدى. مينيسترلىك تاراپىنان ءبىرقاتار شارا قابىلداندى. مالىمەتتەرگە قولجەتىمدىلىكتى باقىلايتىن سەرۆيس ىسكە قوسىلدى. وسى سەرۆيسكە مەملەكەتتىك اقپاراتتىق جۇيەنىڭ 70 پايىزدان استامى قوسىلدى. ول جەكە دەرەكتەرگە قول جەتكىزۋ كەلىسىمدەرىن جيناپ، حابارلاما بەرەدى. كيبەرقاۋىپسىزدىك سالاسىنداعى كومپانيالارمەن بىرىگىپ citizensec.kz جانە nomadguard.kz ينتەرنەت رەسۋرستارى ىسكە قوسىلدى. بۇلار ازاماتتاردى حابارلاندىرۋدى ارتتىرۋعا باعىتتالعان، - دەدى ق ر سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ.

سپيكەر سونداي-اق بايلانىس وپەراتورلارىنىڭ جۇمىسى ۇيلەستىرىلىپ جاتقانىن اتاپ ءوتتى.

- الاياقتىق قوڭىراۋلاردى انىقتاپ، بۇعاتتاۋعا ارنالعان انتيفرود ورتالىقتار قۇرىلدى. ولار ۇلتتىق بانكتىڭ انتيفرود ورتالىقتارىمەن بىرىكتىرىلگەن، - دەدى ول.

وسىعان دەيىن پوليتسيا الاياقتىق قوڭىراۋلاردىڭ الدىن الۋ باعىتىندا 24 مىڭنان استام sim كارتا تاركىلەگەنى تۋرالى جازدىق.