تۇكىر دەسە، تۇكىرە سالامىن، پروبلەما جوق - اسقار جۇمادىلدايەۆ

 «مەن ءويتىپ تۇكىرمەيمىن، «ءتىفاي» دەيمىن دە، قويا سالامىن». اتاقتى ماتەماتيك «تۇركىستان» تىلشىسىنە بەرگەن سۇحباتىندا بالانىڭ اۋزىنا تۇكىرگەننەن ەشتەڭە شىقپايتىنىن ايتتى. 

Асқар
Фото: ozgeris.info

«كوپ قازاق قيالي عوي، بىرەۋمەن كەزدەسسە، «اۋزىنا تۇكىر، بىردەڭە بولادى» دەيدى. انشەيىن شارتتى ۇعىم عوي. تۇكىر دەسە، تۇكىرە سالامىن، پروبلەما جوق. نۇرعيسا اعامىز ەمەسپىن عوي، ول تۇكىر دەسە، كادىمگىدەي اۋزىنا تۇكىرگەن عوي، مەن ءويتىپ تۇكىرمەيمىن، «ءتىفاي» دەيمىن دە، قويا سالامىن»، - دەدى ا. جۇمادىلدايەۆ.

اكادەميك بالالارىنىڭ اۋزىنا تۇكىرۋىن سۇراعان ادامداردىڭ ءوتىنىشىن كوڭىلجىقپاستىقپەن ورىندايتىنىن جەتكىزدى.

«ويباي، بولمايدى دەپ تۇرام با، «پوزا» ۇستاپ؟ قالىپتى قابىلدايمىن. ءبىراق بۇدان ەشتەڭە شىقپايتىنىن بىلەمىن»، - دەدى ول.

ا. جۇمادىلدايەۆ اتا-انالاردىڭ سۇراۋى بويىنشا بالالاردىڭ تۇساۋىن دا كەسەتىنىن ايتتى.

«مەن تۇساۋ كەسەمىن. مۇنى قۇپتايمىن، قۇپتامايمىن، ول ارتىق اڭگىمە. قۇپتايتىنىمدى نەمەسە قۇپتامايتىنىمدى بىلمەيمىن. ءبىراق جۇرت ۇستاپ الىپ، «تۇساۋ كەس» دەيدى. كەتىپ بارا جاتىپ تا تۇساۋ كەسۋىم مۇمكىن. تالاي بولدى. ءوتىنىپ تۇرسا، پرينسيپ ۇستاپ كەتەم بە؟ كەيدە كۇنى بۇرىن شاقىرادى. جارتى ساعاتقا كىرىپ شىعامىن. سونىمەن شارۋانىڭ بارلىعىن بىتىرەمىز»، - دەدى اكادەميك.

ا. جۇمادىلدايەۆ تۇساۋ كەسكەنى ءۇشىن ەشكىمنەن، ەشتەڭە دامەتپەيتىن مالىمدەدى.

«مەندە ەشقانداي «ستاۆكا» جوق. ءبىراق كەيدە كويلەك، شاپان كيگىزەدى. ونى جاسىرمايمىن...»، - دەدى ماتەماتيك.

ايتا كەتەيىك، وسىدان ءبىراز بۇرىن قوعامدا تانىمال انشىلەر مەن بلوگەرلەردىڭ تۇساۋ كەسۋدى كاسىپكە اينالدىرىپ العانى قىزۋ تالقىلانعان. بۇعان قوسا ەسترادا ءانشىسىنىڭ ساحنادا ءبىر ەمەس، بىرنەشە بالانىڭ اۋزىنا تۇكىرگەنى سىنالعان.

سوڭعى جاڭالىقتار