تەكەلى قالاسىندا اۆتوبۋس جۇرگىزۋشىلەرى جۇمىسسىز قالدى
تەكەلى. KAZINFORM - جەتىسۋ وبلىسىنداعى «تەكەلى» اۆتوپاركىنىڭ جۇمىسشىلارى ءبىر-اق كۇندە جۇمىسسىز قالدى. ويتكەنى، شەنەۋنىكتەر كومپانيامەن كەلىسىمشارتتى بۇزعان. اۆتوپارك ۇجىمى قالالىق جولاۋشىلار كولىگى جانە اۆتوموبيل جولدارى ءبولىمى باسشىسىنىڭ بۇل شەشىمىنە نارازى.
اۆتوپارك اكىمشىلىگى اراداعى كەلىسىم بۇزىلعاندىعى تۋرالى حابارلامانى 28-تامىز كۇنى العان. حابارلامادا «تەكەلى قالاسى بويىنشا جولاۋشى تاسىمالى قىزمەتىنە بايقاۋ وتكىزىلگەنى» جازىلعان. سونداي-اق، حاتتا تەندەردى وزگە كومپانيا ۇتىپ الۋىنا بايلانىستى «تەكەلى» اۆتوپاركىنە 31-تامىز كۇنى جۇمىستى توقتاتۋ ەسكەرتىلگەن.
«بىزگە كەلىسىمشارت ۇزىلگەنى تۋرالى 28-تامىزدا ساعات 16:00-دە عانا ەسكەرتىلدى. تەندەر ويناتىلعانى تۋرالى سول كۇنى عانا ەستىدىك. بايقاۋدى جاسىرىن وتكىزگەن. وعان دەيىن اكىمدىك قىزمەتكەرلەرىنەن ءبىزدىڭ تاراپىمىزدان كەمشىلىكتەر بولعانى تۋرالى ەشبىر رەسمي حات المادىق. جۇمىسىمىزدى ءمىنسىز اتقاردىق دەۋگە بولادى، 70 جىلدان بەرى جولاۋشى تاسىمالىمەن اينالىسىپ كەلەمىز. بۇل شەشىم ادىلەتسىز دەپ سانايمىز»، - دەيدى اۆتوپارك مەنەدجەرى ينگا بايكەنجەنوۆا.
70 جىلدىق تاريحى بار كاسىپورىننىڭ 25 قىزمەتكەرى تۇگەل جۇمىسسىز قالدى. ولاردىڭ كوبى - تاجىريبەلى جۇرگىزۋشىلەر.
«ەڭ از دەگەنى وسىندا 9 جىل جۇمىس ىستەگەن. ايتپەسە 40 جىل جۇمىس ىستەگەندەر بار، مەن ءوزىم 13 جىل جۇمىس ىستەدىم وسى اۆتوپاركتە. بالا-شاعانى اسىراپ، وسىمەن كۇن كورىپ ءجۇرمىز»، - دەيدى بولاتبەك كوبەيەۆ.
«جۇرگىزۋشىلەردىڭ ءبارى اۆتوبۋستى كەلىسىمشارت بويىنشا ساتىپ الۋ قۇقىعىمەن العان ەدى. ەندى ءبىراز ىستەسەك اۆتوبۋس جەكەمەنشىگىمىزگە وتەر ەدى. ەندى جۇمىس قالاي بولاتىنى بەلگىسىز بولىپ تۇر، اۆتوبۋستىڭ دا جاعدايى بەلگىسىز بولىپ تۇر»، - دەيدى سىرىمبەك مۇراتبەك.
ال، شەنەۋنىكتەر بۇل شەشىم قىزمەت كورسەتۋ ساپاسىن ارتتىرۋ ماقساتىندا جاسالعانىن جەتكىزدى. قالا اكىمىنىڭ ورىنباسارى ەرلان جەتىبايەۆ اۆتوپارك قىزمەتىن دۇرىس اتقارماعاندىقتان، قايتا بايقاۋ جاريالانىپ، جاڭا كومپانيامەن كەلىسىمشارت جاسالعانىن ايتتى.
«تۇرعىنداردان شاعىم ءتۇستى، سەبەبى اۆتوبۋس توقتاپ قالادى، سىنىپ قالادى. اقپان ايىندا اۆتوبۋس جۇرگىزۋشىلەرى قوعامدىق كولىكتى توقتاتىپ تاستادى. ءبىز بىرنەشە مارتە بۇل كىسىلەرگە جۇرمەگەنى ءۇشىن، تۇرعىنداردى دۇرىس تاسىماعانى ءۇشىن ۇيعارىم بەردىك. سول سەبەپتەن كونكۋرس جاريالادىق»، - دەيدى تەكەلى قالاسى اكىمىنىڭ ورىنباسارى ەرلان جەتىبايەۆ.
ال اۆتوپارك باسشىسى پروكۋراتۋراعا شەنەۋنىكتەردىڭ ۇستىنەن شاعىم ءتۇسىرىپتى. ەندى بۇل ىسپەن قۇزىرلى ورگان اينالىسپاق.
ايبەك قۇتتىبەك
