TikTok كونتەنتى بالالارعا قاۋىپتى بولا باستادى - سەناتور
استانا. KAZINFORM - سەناتور گەننادي شيپوۆسكيح ۇكىمەت باسشىسى ولجاس بەكتەنوۆكە جولداعان دەپۋتاتتىق ساۋالىندا قازاقستانداعى TikTok الەۋمەتتىك جەلىسىن رەتتەۋدى كۇشەيتۋ كەرەكتىگى تۋرالى ماسەلە كوتەردى.
دەپۋتات اتالعان پلاتفورمانى پايدالاناتىندار كوبەيىپ بارا جاتقانىن جانە ونىڭ ىشىندە جاسوسپىرىمدەردىڭ كوپ ەكەنىن ايتىپ، بۇل پلاتفورما مازمۇنىنىڭ تەرىس اسەرىنە الاڭداپ وتىرعانىن جەتكىزدى. كەيبىرى TikTok-تى جاقسى ماقساتتا پايدالانىپ جاتسا دا، ول شولگە تامعان تامشىداي بولىپ وتىر. ياعني ءبىلىم دەڭگەيىن كوتەرۋ مەن تاريحتى زەردەلەۋ جانە باسقا دا كەرەك تاقىرىپتا پايدالانىپ جۇرگەندەر جالپى مازمۇننىڭ از عانا بولىگىن الىپ جاتىر.
سەناتوردىڭ پىكىرىنشە، بالالاردىڭ پسيحيكاسى مەن جالپى دەنساۋلىعىنا تەرىس اسەر ەتەتىن، سونداي-اق كيبەرقاۋىپسىزدىك پەن دەرەكتەردىڭ قۇپيالىلىعىنا قاۋىپ توندىرەتىن بەينە كورىنىستەر پلاتفورمادا كەڭىنەن تارالىپ كەلەدى.
بۇل تۇرعىدا گ. شيپوۆسكيح فرانسيا، كانادا، قىرعىزستان سياقتى ءبىراز مەملەكەت TikTok تى پايدالانۋدى شەكتەۋ جونىندە شارالار قابىلداعانىن اتاپ ءوتتى. سوندىقتان وسىعان بايلانىستى بالالاردى قورعاۋ جانە ۇلتتىق قاۋىپسىزدىكتى نىعايتۋ ماقساتىندا ءبىرقاتار قادامدار ۇسىنىلدى.
«TikTok پلاتفورماسى ەكسترەميزمدى، راديكاليزمدى، سەپاراتيزمدى، شەكتەن تىس قاۋىپتى جانە مورالدىق قۇندىلىقتارعا قايشى كونتەنتتەردى انىقتاۋ ءارى شەكتەۋ بويىنشا ناقتى الگوريتمدى ۇسىنۋى كەرەك. سونداي-اق TikTok پلاتفورماسى جاس بالالاردى ونلاين قاۋىپتى كونتەنتتەن قورعاۋ ماقساتىندا YouTube Kids سەكىلدى بالالارعا ارنالعان ارنايى جەلى ۇسىنۋى ءتيىس. 13 جاسقا تولماعان بالالاردىڭ TikTok-قا اتا- اناسىنىڭ تەلەفونىنان كىرگەن جاعدايدا، Face ID تەحنولوگياسى ارقىلى بۇعاتتاۋ مەحانيزمىن قاراستىرۋ كەرەك. ولاي بولماعان جاعدايدا، ەلىمىزدە TikTok پلاتفورماسىن بۇعاتتاۋدى سۇرايمىز. بۇل ماسەلەلەردىڭ شەشىمىن تابۋ ەل ازاماتتارىنىڭ دەنساۋلىعىن جانە مورالدىق قۇندىلىقتارىن ساقتاپ قالۋعا، سونداي- اق جاستار اراسىندا تارالىپ جاتقان قاۋىپتى ادەتتەردى ازايتۋعا باعىتتالعان قادام بولماق»، - دەدى گەننادي شيپوۆسكيح.
