تۇشكىرۋ ماۋسىمى باستالدى: اللەرگياعا قارسى ۆاكسينا بار ما؟
استانا. KAZINFORM - كوكتەم - كوپتەگەن ادام ءۇشىن جاي عانا تابيعاتتىڭ جاڭارۋى ەمەس، سونىمەن بىرگە اللەرگيانىڭ كۇشەيۋ كەزەڭى. اسىرەسە ەلىمىزدىڭ وڭتۇستىك وڭىرلەرىندە جەمىس اعاشتارىنىڭ گۇلدەۋ كەزەڭى شارىقتاۋ شەگىنە جەتكەن.
ال وزگە وبلىستاردا ەندى باستالادى، تيىسىنشە «كوكتەمگى اللەرگياعا» بەيىم ادامدار تىنىس الۋدىڭ قيىنداۋى، جيى تۇشكىرۋ، مۇرىننىڭ بىتەلۋى، كوزدىڭ جاساۋراۋى سياقتى جاعىمسىز بەلگىلەرگە تاپ بولادى.
مۇنداي كەزەڭدى قالاي جەڭىل وتكەرۋگە بولادى جانە انتيگيستاميندىك دارىلەردەن بولەك قانداي تاسىلدەر بار - وسى ماتەريالدا كەڭىنەن قاراستىرامىز.
ماڭىزدى ەسكەرتۋ: ءوزىن-ءوزى ەمدەۋمەن اينالىسپاڭىز. بۇل ماتەريالدا سوڭعى عىلىمي دەرەكتەر مەن ماماندار پىكىرى جيناقتالعانىمەن، ناقتى دياگنوز قويىپ، ەم تاعايىندايتىن تەك دارىگەر ەكەنىن ۇمىتپاعان ءجون.
الەمدىك ستاتيستيكاعا سۇيەنسەك، جەر شارىنداعى ادامداردىڭ شامامەن 30 پايىزى توزاڭ اللەرگياسىنان زارداپ شەگەدى. ونىڭ ۇستىنە بۇل كورسەتكىش ءار ونجىلدىق سايىن ءوسىپ كەلەدى. كوبىنە بۇل دەرت 10 مەن 40 جاس ارالىعىنداعى ادامداردا كەزدەسەدى. مەديتسينالىق تۇرعىدان العاندا، مۇنداي جاعداي «ماۋسىمدىق اللەرگيالىق رينوكونيۋنكتيۆيت» نەمەسە كەڭ تارالعان اتاۋىمەن پوللينوز (ءشوپ بەزگەگى) دەپ اتالادى. بۇل - وسىمدىك توزاڭىمەن بايلانىس كەزىندە اعزانىڭ پاتولوگيالىق رەاكسياسى.
اعزا اللەرگەنگە تۇرلىشە جاۋاپ بەرەدى: باس اۋرۋى، تۇشكىرۋ، قۇرعاق جوتەل، تەرىنىڭ قىشۋى، كوزدىڭ قىزارىپ جاساۋراۋى، مۇرىننىڭ بىتەلۋى، ءىسىنۋ، ۇيقىشىلدىق، ءتىپتى جۇرەك اينۋ بەلگىلەرى بايقالۋى مۇمكىن. كەيبىر ادامداردا اللەرگيا ودان دا كۇردەلى اسقىنۋلارعا، سونىڭ ىشىندە استما ۇستامالارىنا الىپ كەلەدى. اسىرەسە قۇرعاق ءارى جىلى اۋا رايىندا، كۇننىڭ ەكىنشى جارتىسىنا قاراي سيمپتومدار كۇشەيە تۇسەدى.
دارىگەرلەردىڭ سوزىنشە، اللەرگيا بەلگىلەرىن اجىراتۋ كەيدە قيىن سوعۋى مۇمكىن. سەبەبى ول تۇماۋ سەكىلدى باستالىپ، مۇرىننىڭ بىتەلۋى، تۇشكىرۋ، باس اۋرۋى سەكىلدى سيمپتومدارمەن قاتار جۇرەدى. ال قىشىنۋ پايدا بولعان كەزدە اللەرگيانى كۇدىكتەنۋ وڭايىراق. سونىمەن قاتار بۇل بەلگىلەر سىرتتا كۇشەيىپ، جىل سايىن ءبىر مەزگىلدە قايتالانىپ وتىرادى. ناقتى دياگنوزدى اللەرگولوگ قويادى.
ەلىمىزدە اللەرگيانىڭ العاشقى بەلگىلەرى كوكتەمنىڭ العاشقى ايىنان باستاپ بايقالادى. جازعا قاراي اللەرگەندەر قاتارىنا تەرەك، قاراعاي، ءتۇرلى ارامشوپتەر، استىق تۇقىمداستار، امبروزيا مەن جۋسان قوسىلادى.
قازاقستانداعى اللەرگەن وسىمدىكتەردىڭ گۇلدەۋ كۇنتىزبەسى شامامەن مىناداي:
ناۋرىز-ءساۋىر: قاندىاعاش، ءسامبى تال، ورمان جاڭعاعى، قاراعاش، كوكتەرەك؛
ءساۋىر-مامىر: قايىڭ، شاعان، تەرەك، ۇيەڭكى، ەمەن، شىرشا، قاراعاي، سيرەن؛
مامىر-ماۋسىم: قىلقان جاپىراقتىلار، جوكە، باقباق، ءتۇرلى شوپتەر؛
ماۋسىم-شىلدە: جوكە، تەرەك، جۋسان، قالاقاي، امبروزيا جانە باسقا وسىمدىكتەر؛
تامىز: امبروزيا، جۋسان جانە ارامشوپتەردىڭ كەيبىر تۇرلەرى.
اللەرگياعا قارسى ۆاكسينا بار ما؟
كوپشىلىكتى مازالايتىن باستى سۇراق تا وسى. شىن مانىندە، مۇنداي پرەپاراتتار ازىرلەنىپ جاتىر. دارىگەرلەردىڭ ايتۋىنشا، ءتيىمدى ناتيجە الۋ ءۇشىن 3-5 ينەكسيا جەتكىلىكتى بولۋى مۇمكىن. قازىرگى تاڭدا ۆاكسينا كلينيكاعا دەيىنگى سىناقتاردان وتكەن، ال تولىق كلينيكالىق زەرتتەۋلەر اياقتالعان سوڭ مەديتسينالىق تاجىريبەگە ەنگىزىلۋى ىقتيمال. الايدا بۇل كەم دەگەندە 2026-جىلدان كەيىن عانا جۇزەگە اسۋى مۇمكىن.
اللەرگيانى انىقتاۋ ءۇشىن دارىگەرلەر قوسىمشا تەكسەرۋلەر تاعايىندايدى. ونىڭ ىشىندە تەرىگە جاسالاتىن سىنامالار (پريك-تەست) نەمەسە قان سارىسۋىنداعى ارنايى IgE انتيدەنەلەرىن انىقتاۋ تالداۋى بار.
سونىمەن قاتار بۇگىنگى مەديتسينادا اللەرگيامەن كۇرەستىڭ تاعى ءبىر ءتيىمدى جولى بار - اللەرگەن-سپەتسيفيكالىق يممۋنوتەراپيا (اسيت). بۇل ءادىستىڭ ءمانى - اللەرگەندى وتە از مولشەردەن باستاپ، بىرتىندەپ اعزاعا ەنگىزۋ ارقىلى يممۋندىق جۇيەنى وعان «ۇيرەتۋ». ناتيجەسىندە اعزا اللەرگەنمەن قايتا كەزدەسكەندە وعان الدەقايدا ءالسىز رەاكسيا بەرەدى نەمەسە مۇلدە جاۋاپ قايتارماۋى مۇمكىن.
قورىتىندىلاي كەلە، ماۋسىمدىق اللەرگيا دەگەنىمىز - جەڭىل-جەلپى قارايتىن ماسەلە ەمەس، ءبىراق ونى باقىلاۋدا ۇستاۋعا دا بولادى. ەڭ باستىسى - ءوز بەتىڭىزشە ەمدەلمەي، ۋاقىتىندا مامانعا جۇگىنىپ، الدىن الۋ شارالارىن ساقتاعان ءجون.
el.kz
