تەڭبىل دوپتىڭ كەسىرىنەن تۇتانعان قاندى سوعىس
استانا. قازاقپارات - فۋتبول دەسە، ىشكەن اسىن جەرگە قوياتىن ەركەك كوپ. تەڭبىل دوپتىڭ نە قۇدىرەتى بار دەرسىز؟ ايتەۋىر «ارباعان مەنى ءبىر سيقىر». قازاق سپورت جۋرناليستيكاسىنىڭ ارداگەرى، مارقۇم سەيداعاڭ، سەيداحمەت بەردىقۇلوۆ ايتقان وسى قاناتتى ءسوزدىڭ ءتىلسىمىن شىن جانكۇيەر بولعان ادام تۇسىنەدى. ال جانكۇيەر بولۋ...
فۋتبول فاناتتارى - قىزۋقاندىلار
جانكۇيەر بولۋ دەنەڭدەگى بار كۇشىڭدى سارقىپ جەڭىلدەپ قالۋ دەگەن ءسوز. تىرىسقان،سىرەسكەن ەركەكتىڭ قاباعى جاسىل الاڭعا قيقۋلاۋعا كەلگەندە جازىلادى. مەيلى، ءوزىڭ قولپاشتاپ وتىرعان كومانداڭ جەڭىلىپ قالسىن، ءبىراق سۇلۋ ويىن-ورنەگىن كورسەتسە، سونىڭ ءوزى جەتىستىك. فۋتبولعا جان كۇيەر بولۋ - بارلىق ەموسياڭدى شىعارۋ. ءبىز سپورت - بەيبىتشىلىك ەلشىسى دەيمىز، ءبىراق...
شىن مانىندە سولاي ما؟ كەيدە ءبىر فۋتبولدىڭ كەسىرىنەن مەملەكەت اراسىنا سىنا قاعىلىپ، ءدۇردارازدىققا ۇلاسقان ساتتەر دە بولعان. مىسالى، 1969 - جىل تاريحتا «فۋتبول سوعىسى» دەگەن اتپەن قالدى. 1970 - جىلى وتەتىن الەم چەمپيوناتىنا باراتىن جولدامانى ساراپقا سالۋ ءۇشىن گوندۋراس پەن سالۆادور قۇرامالارى كەزدەستى. العاشقى ويىن دا گوندۋراستىقتار شامالى ەسەپ ايىرماشىلىعىمەن ۇتتى. بۇل جەڭىلىستى «قورلىق» دەپ ۇققان سالۆادورلىق ءبىر جانكۇيەر تورەشىنىڭ ىسقىرىعى ەستىلە بەرە ءوز-ءوزىن اتىپ ءولتىردى. سىرتقا بەتتەپ بارا جاتقان ەكى ەل جانكۇيەرلەرىنىڭ اراسىندا قاقتىعىس تۋا جازداپ بارىپ باسىلدى. الايدا ەكىنشى جاۋاپتى ويىندا سالۆادورلىق جانكۇيەرلەر ءوز قۇراماسىنان تەك جەڭىس كۇتتى.
ءبىراق جەڭىستىڭ بۋى اۋىر قايعى الىپ كەلدى. ەكىنشى ويىندا الاڭ يەلەرى قارسىلاستارىن ايقىن باسىمدىلىقپەن ۇتتى. ويىننان سوڭ جەڭىسكە ماساتتانعان سالۆادورلىقتار گوندۋراستان كەلگەن جانكۇيەرلەردى ۇرىپ-سوقتى، گوندۋراس مەملەكەتىتىنىڭ تۋى، بارلىق مەملەكەتتىك سيمۆولدىق بەلگىلەرى ورتەلدى. ەلدە قىزمەت ەتەتىن گوندۋراستىقتار ءولتىرىلدى. وسىندا جۇمىس ىستەيتىن ونداعان مىڭ گوندۋراس ازاماتتارى ەلدەن قۋىلدى. بۇعان جاۋاپ رەتىندە گوندۋراس ەلىنىڭ بۇزىقتارى سالۆادورلىق بيزنەستى جويدى. ەكى ەلدىڭ بۇقارالىق اقپارات قۇرالدارى مەملەكەت اراسىنداعى دۇردارازدىقتى بارىنشا قوزدىرىپ، جاعداي ۋشىقتى.
اقىرى 1969 - جىلدىڭ 16 - شىلدەسى كۇنى مۇزداي قارۋلانعان 9 مىڭ ادامدىق سالۆادور ارمياسى گوندۋراس جەرىنە باسا كوكتەپ كىرىپ، ەلدىڭ ءبىراز بولىگىن جاۋلاپ الدى. جاۋلاپ الىنعان جەرلەردە سالۆادورلىقتار اسكەري گۋبەرناتورلار تاعايىندالدى. ەكى كۇننەن كەيىن گوندۋراس اسكەرى جاۋىنا سوققى بەرگەنمەن، قارسىلاسىن توقتاتا المادى. 17 - شىلدە كۇنى ەكى جاقتىڭ قيان-كەسكى ۇرىسىندا مىڭداعان مىڭ ادام قازا تاۋىپ، سالۆادور ارمياسى ەل ىشىنە 29 شاقىرىمعا دەيىن كىرىپ، ونداعان نىسانداردى باسىپ الدى.
بۇل ۇرىسقا سىرتقى كۇشتەر ارالاسقاننان كەيىن عانا با رىپ، سوعىس توقتاتىلدى. كەلىسسوزدەر باستالدى. بۇل تاريحتا «فۋتبول مايدانى» نەمەسە «100 ساعاتقا سوزىلعان سوعىس» دەگەن اتپەن قالدى. ءبىراق جاسىل الاڭداعى ءبىر جەڭىستىڭ بۋى ەكى ەلگە دە قىمباتقا ءتۇستى. «100 ساعاتتىق سوعىستا» ەكى ەلدەن 4 مىڭ ادام قازا تاپتى، ەل ەكونوميكاسى اۋىر زارداپقا ۇشىرادى. 50 ميلليون دوللار شىعىن اكەلگەن «جاسىل الاڭداعى» جەڭىستىڭ سالدارى وسىلاي قايعى مەن اياقتالدى.
جالپى، جەڭىسكە ماساتتانعان نەمەسە جەڭىلىسكە نامىستانعان جانكۇيەرلەر ەشكىمدى ايامايدى. 2002 - جىلى ماسكەۋدە ءوز قۇراماسى جاپونيادان ۇتىلعاننان كەيىن ورىس جانكۇيەرلەرى مانەج الاڭىندا تارتىپسىزدىك ورىن الدى. توپ-توبىمەن كوشەگە شىققان فۋتبول فاناتتارىنىڭ بۇزاقىلىعىنان 107 كولىكتىڭ بىت-شىتى شىعىپ، 8 تاكسوفون، 36 دۇكەن قيرادى، 7 كولىك ورتەلدى. پىشاق جاراقاتىنان 17 جاستاعى ماسكەۋلىك وقۋشى اندرەي ترۋجەن نيكوۆ تىلگە كەلمەي قايتىس بولدى. قاندى توبەلەستى ۇيىمداستىرعان 130 ادام ۇستالىپ، ايىپ تاعىلدى. ماسكەۋلىك پوليسيا وكىلدەرىنىڭ حابارلاۋىنشا، توپتىق توبەلەسكە 7-8 مىڭ ادام قاتىسقان. باسسىزدىقتىڭ سالدارىنان ماسكەۋدىڭ ءى ءى د-نىڭ باسشىسى مەنماردىڭ ورىنباسارى قىزمەتىنەن كەتتى.
فۋتبول فاناتتارىنىڭ توبەلەسى از ەمەس. 2012 - جىلدىڭ 1 - اقپانىندا «پورت سايد» ستاديونىندا بۇزاقىلىق ورىن الىپ، جانكۇيەرلەر ءبىر-ءبىرىن اياعان جوق. جەرگىلىكتى «ءال-ماسري» مەن «ءال-احلي» كلۋبى كەزدەسىپ، سوڭعىسى 3:1 ەسەبىمەن جەڭىسكە جەتتى. ويىن اياقتالا بەرە جانكۇيەرلەر الاڭعا جۇگىرىپ شىعىپ، جەڭىلگەن كوماندانىڭ فۋتبوليستەرىن تەپكىگە الادى. جان كۇيەرلەر اراسىندا جاعداي شيەلەنىسىپ، توپتىق توبەلەستىڭ سالدارىنان 73 ادام قازا تاپتى. مىڭداعان ادام جاراقات الدى، بىرنەشە ادام ارتىنان پىشاق جاراقاتىنان كوز جۇمدى. بولعان وقيعاعا وراي ەگيپەتتىڭ فۋتبول فەدەراسياسى ەلدىڭ پرەمەر-ليگاسىنداعى ماتچتى بىرنەشە ايعا توقتاتتى. 47 ادام قاماۋعا الىنىپ، 70 ادامعا ايىپ تاعىلدى.
2012 - جىلدىڭ 12 - ماۋسىمىندا پولشانىڭ فۋتبول فاناتتارى دا ۇلتتىق ورتالىق ستاديونعا توپ-توبىمەن كەلە جاتقان ورىس جانكۇيەرلەرىنە ءتيىسىپ، توبەلەستىڭ سالدارىنان 184 ادام ۇستالدى. 25 ادامعا مەديسينالىق جاردەم كورسەتىلدى. ونداعان ادام جاراقات الدى. ىسكە جەدەل پوليسيا ارالاسپاعاندا، بۇزاقىلىقتان ادام ءولىمى ورىن الاتىن ەدى...
جاسىل الاڭ قىزىقتارى
قالاي ايتقاندا دا كەيبىر جاعدايدا سپورت - بەيبىتشىلىك ەلشىسى قىزمەتىن اتقارماي تۇر. ارينە، جانكۇيەر بولا بىلۋدە -مادەنيەتتىلىك. ءبىراق ادامنىڭ ءبارى بىردەي ەمەس قوي. توبەلەسپەي-اق جانكۇيەر بولۋعا بولادى. ماسەلە ادامنىڭ مادەنيەتتىلىگى مەن ىشكى تارتىبىنە بارىپ تىرەلەدى عوي. ارينە، ىزا مەن اشۋىڭدى ايقايلاپ-اق شىعارۋعا بولادى. ءبىراق دۇكەن قيراتىپ، ادام ۇرىپ قاجەتى نە؟ ادامزاتقا ءتان ورتاق زاڭدىلىق بار. ول - قوعامدىق تارتىپكە باعىنۋ. ءبىراق ادام تەمىر ەمەس. ءبىز جانكۇيەردىڭ كىناسىنەن بولعان قاقتىعىستاردى، زارداپ كەلگەن شىعىنداردى كورەمىز. ءبىراق ءبىز بىلمەيتىن، ءبىز نازار اۋدارا قويمايتىن نارسە دە بار. ول - جاسىل الاڭداعى بولاتىن جايتتار. توبەلەسپەي-اق جانكۇيەرلەردى شوشىتاتىن وقيعالار بولىپ جاتادى كەيدە جاسىل الاڭدا.
وسىدان بىرەر جىل بۇرىن رۋمىنيانىڭ ءتورتىنشى ديۆيزيونىندا وينايتىن «چيسودا» جانە «ۋنيرەي» كوماندالارىنىڭ اراسىندا ويىن ءوتىپ جاتقان تۇستا پوليسيا ارناۋلى ءبولىمىنىڭ جاساقتارى كولىكپەن دابىلداتىپ، الاڭعا باسا-كوكتەپ كىرگەن. ويناپ جاتقان بۇكىل فۋتبولشىلاردى جەرگە جاتقىزىپ، ءارقايسىسىن تەكسەرگەن. الايدا قىلمىسكەر ولاردىڭ اراسىندا بولماي شىقتى. كەيىننەن انىقتالعانداي، پوليسيا «چيسودا» كلۋبىنىڭ ويىنشىسى سورينا ۋدرانى ىزدەگەن كورىنەدى. ال ول بۇل ۋاقىتتا تريبۋنادا ءوز كلۋبىنا جانكۇيەر بولىپ وتىرعان. سويتسە، فۋتبولشىنىڭ ۇرلىق جاساپ، كونترابانداعى قاتىسى بولىپ شىققان. جالپى، الاڭدا جانكۇيەردى دۇرلىكتىرەتىن وسىنداي وقيعالار دا اراكىدىك كەزدەسىپ تۇرادى.
يزرايلدىڭ «اپوەل» كلۋ بىنىڭ قاقپاشىسى ليوراسۋليندى دە سوت ورىنداۋشىلارى ويىن كەزىندە تۇتقىندادى. بىلايعى كەزدە ونى تابا الماي شارشاعان پوليسيا قىزمەتكەرلەرى اسۋليندى وسىلاي قۇرىققا تۇسىرگەن. سويتسە، ول بۇرىنعى ايەلىنە 4 مىڭ دوللار كولەمىندە اليمەنت تولەمەگەن كورىنەدى.
جالپى، جاسىل الاڭدا قىزىقتى ارەكەتتەرىمەن ەستە قالاتىن فۋتبولشىلار جەتىپ ارتىلادى. ءبىرى دوپ سوققاننان كەيىن ەكى قولىن سوزىپ، قۇدايعا قۇلشىلىق جاساپ، راقمەتىن ايتسا، ەكىنشىلەرى ساۋساعىنداعى جۇزىگىن سۇيەدى. ءتىپتى بيلەپ، ەلدىڭ ەسىندە قالاتىن فۋتبولشىلار دا جەتەرلىك. ارينە، قۋانىشتىڭ كوز جاسى تالاي ارەكەتكە الىپ بارار. دەسەك تە، يسلانديانىڭ «ستيارنان» كلۋبىنىڭ فۋتبولشىلارى الدىن الا ارنايى دايىندالىپ، جاسىل الاڭدا ءارتۇرلى «وپەراسيالار» جۇزەگە اسىرۋعا قۇشتار. ولار ءار سوعىلعان دوپقا وسىلاي شىعارماشىلىقپەن كەلەدى. وتكەن جىلى اق كوگىلدىر فورماداعى «ستيارنان» فۋتبولشىلارىنىڭ تاعى ءبىر سپەكتاكلى بۇكىل ينتەرنەتتى شارلاپ كەتتى. ءبىر فۋتبولشى كەزەكتى گولدان كەيىن جاتاعاپ، «دۇنيەگە ءسابي اكەلەدى.» شاقالاق ءسابيدى كوتەرىپ العان ەكى فۋتبولشى ونى تەربەتە وتىرىپ كوككە كوتەرەدى. ولار وسى ارەكەتىمەن الاڭداعى ارىپتەسىن ۇلدى بولۋى مەن قۇتتىقتاعان.
ءتىپتى «ستيارناندىق» ءۇش فۋتبولشى ۋنيتازدا ۇلكەن دارەتتە وتىرعان ادامنىڭ سۇلباسىن جاساپ، جانكۇيەرلەردى ءبىر قيقۋلاتقانى بار. تاعى ءبىر قىزىعى، ۇلكەن دارەتتە وتىرعان ادام «تىرلىگىن ءبىتىرىپ»، ۋنيتازدىڭ قاقپاعىن جاۋىپ كەتەدى. بىرنەشە سەكۋندتاردى الاتىن بۇل كورىنىس، ارينە، كۇلكى تۋدىرار. ءبىراق جانكۇيەرلەر ءۇشىن جاسالاتىن بۇل قىلىقتىڭ ءبارى قىزعىلىقتى كورىنەرى ءسوزسىز. ال «ستيارنان» كلۋبى يسلانديا چەمپيوناتىندا جۇلدەگەرلەر قاتارىندا جۇرمەسە دە، جاتتىعۋ كەزىندە وسىنداي ارنايى وپرەراسيالار جاساپ، ويىن كەزىندە ونى كورسەتۋدىڭ شەبەرى» دەيدى بۇكىل الەمدىك ب ا ق.
جالپى، الاڭدا ءارتۇرلى قويىلىمدا ويناۋ ونەرى 1990 - جىلى كامەرۋندىق فۋتبولشى روجەميللانىڭ اتاقتى بيىنەن باستاۋ الدى دەسەك قاتەلەسپەسپىز. 38 جاسىندا يتالياداعى الەم بىرىنشىلىگىندە بۇرىشتاما دوبىنىڭ تۇسىندا ىلىنگەن تۋدى ۇستاپ تۇرىپ، ول افريكالىق ۇلتتىق ءبيدى بيلەپ جۇرتشىلىقتىڭ ەسىندە قالدى. مىنە سودان بەرى 20 جىلدان استام ۋاقىت ءوتتى.
دەسەك تە، جان بەرىپ، جان الىسقان قىزۋ قاندى ويىننىڭ ءبارى دە ءساتتى اياقتالا بەرمەيدى. جەڭىستىڭ ءبارى قۋانىش ەمەس. ونىڭ اۋىر زاردابى بولادى. شۆەيساريانىڭ «سەرۆەتت» كلۋبىنىڭ شابۋىلشىسى پاۋلۋديوگۋ كەزەكتى دوپ سوعىپ، قۋانىشتان قاقپانىڭ ارتىنداعى شارباقتان سەكىرىپ، وتپەك بولعاندا، ساۋساعى تەمىردىڭ تەسىگىنە كىرىپ كەتىپ، شىقپاي قالعان. ساۋساعىنىڭ سۇيەگى سىنعان ويىنشى وپەراسيادان كەيىن ءبىراز ۋاقىت تريبۋنادا وتىردى. ءتىپتى جەڭىس دوبىنا شەكتەن تىس ەموسياسىن بىلدىرگەن ويىنشىعا تورەشى سارى قاعاز دا كورسەتكەن.
ارينە، الاڭدا ءارتۇرلى جاعدايلار بولادى. قۋلىق تا، سۇمدىق تا، قاساقانا ارەكەت تە. شۆەسيا چەمپيوناتىندا «گەتە بورگ» پەن «ەرەبرۋ» كلۋبتارى ويناپ جاتقان ساتتە، سوڭعى كوماندا فۋتبولشىلارىنىڭ تالاپ ەتۋىمەن اياق استىنان العاشقى تايمنىڭ 30 مينۋتىندا ويىن توقتاتىلعان. سويتسە، «گەتەبورگتىڭ» قاقپاشىسى ءوزىنىڭ قاقپاسىن بىرنەشە سانتيمەترگە ارتقا قاراي جىلجىتىپ قويعان كورىنەدى. تورەشىلەر كەلىپ انىقتاعاندا، شىن مانىندە سولاي بولىپ شىققان. كريستەنسەن وسى ارەكەتى ءۇشىن سارى قاعاز، ەسكەرتۋ الدى. كەيىن شۆەسيا فۋتبول فەدەراسياسىنىڭ ساراپشىلارى بەينەجازبادان قاقپاشىنىڭ ارەكەتىن باقىلاعاندا، كريستەنسەننىڭ قاقپانىڭ ەكى جاقتاعى تىك باعاناسىن تەپكىلەپ تۇرعانىن كورگەن.
قازاقتا ءبىر ماقال بار: «اياق كيىمىڭ تار بولسا، دۇنيەنىڭ كەڭدىگىنەن نە پايدا؟» دەگەن. ال قاقپاشىنى... دارەت قىسسا شە؟! جانىن قويارعا جەر تاپپاس. نەمىستىڭ «شتۋتگارت» كلۋبىنىڭ قاقپاشىسى يەنس لەماننىڭ باسىنان وسىنداي جاعداي وتكەن. ءوز كومانداسى شابۋىلعا شىققان ساتتە ول كىشى دارەت قىسىپ، قاقپا جانىنداعى جارنامانىڭ شيتىنىڭ ارتىنا «تىرلىگىن تەز ءبىتىرىپ الايىن» دەپ جاتقان ساتتە قارسىلاستار دوپتى تارتىپ الىپ، لەماننىڭ قاقپاسىنا قاراي قۇلديلاعان. ءبىراق ءبارى ءساتتى اياقتالدى. دوپ سوعىلعان جوق. ويىننان سوڭ ساۋال قويعان جۋرناليستەرگە ول «قاتتى اشۋلانعانىن ايتىپ»، اقتالعان. 1998، 2002 جانە 2006 - جىلعى ءۇش الەم بىرىنشىلىگىنەن قاتىسقان قاقپاشى گەرمانيا قۇراماسى ءۇشىن 61 ويىن وتكىزگەن ەكەن.
ارينە، فۋتبولدىڭ ءوز ءتارتىبى، ءوز ەرەجەسى بار. جەڭىس ەموسيالىق كوڭىل-كۇيدىڭ ەڭ بيىك شىڭى بولعانىمەن قۋانىشقا دا سابىرمەن قاراۋ قاجەت. ريو-دە-جانەيرودا «بوتوفاگو» كلۋبىمەن كەزدەسىپ جاتقان «كابوفريەنسە» كومانداسىنىڭ ويىنشىسى كلەبەرسون جەڭىس دوبىن سوققاننان كەيىن قۋانعاننان جاسىل الاڭداعى تورەشىنىڭ ماڭدايىنان ءسۇيىپ الادى. ءبىراق... سۇيگەنى ءۇشىن ول سارى قاعاز الدى. ويىننان سوڭ، جۋرناليستەرگە بەرگەن سۇحباتىندا «مەن مۇنداي ەرەجەنىڭ بارىن بىلمەپپىن. سول ءۇشىن ەسكەرتۋ الدىم» دەگەن ەكەن. كەيىننەن تەلەۆيزياداعىلار تورەشىنىڭ ەرنىن قيمىلىن اڭعارعان كەزدە، «ول فۋتبولشىعا» «مەنى سۇيۋگە بولمايدى» دەپ ايتىپ، ەسكەرتۋ جاساعانىن كورەدى.
جالپى، تورەشىلەرگە قاتىستى قىزىقتار دا از ەمەس. برازيليانىڭ فۋتبول بىرىنشىلىگىگىنە قازىلىق ەتىپ جاتقان تورەشى ەرەجە بۇزعان ويىنشىعا ەسكەرتۋ جاساۋ ءۇشىن، ءتوس قالتاسىنان سارى قاعازدى سۋىرىپ الماق بولعاندا... ونىڭ ورنىنا ايەلدىڭ قىزىل ءتۇستى ىشكى كيىمى شىققان. قولىمەن جوعارى كوتەرگەن ءىش كيىم كەيىننەن بۇكىل ينتەرنەتپەن ب ا ق-تى شارلاپ كەتكەن. ارتىنان Terra باسىلىمىنا سۇحبات بەرگەن تورەشى ايەلدىڭ ءىش كيىمىنىڭ ءوزىنىڭ ءتوس قالتاسىنا قالاي تاپ بولعانىن بىلمەي دال بولعان. ابىرويدى توگەر وسىنداي كورىنىستى تريبۋنادا وتىرعان ايەلى دە كورگەن. ىڭعايسىز وقيعادان كەيىن ەكەۋى ۇزاماي اجىراسقانىن جازادى ينتەرنەت.
تەڭبىل دوپقا قاتىستى قىزعىلىقتى دەرەكتەر وتە كوپ. 1986 - جىلدىڭ 22 - ماۋسىمىندا مەحيكونىڭ «استەكا» ستاديونىندا ۆالدانونىڭ بيىكتەپ بەرگەن پاسىن باسپەن ەمەس، سول قولىنىڭ جۇدىرىعىمەن قاقپاعا سوعىپ كەتكەن مارادونانىڭ گولىن بۇكىل جانكۇيەر قاۋىم ۇمىتقان جوق. اشۋلانعان اعىلشىندىق ويىنشىلاردىڭ پىكىرىن ەلەڭ قىلماعان تورەشى بۇل دوپتى ساناپ جىبەرگەنى دە ەستە. «مەنىڭ ەمەس، ول - قۇدايدىڭ قولى ەدى» دەپ ۋاجبەن جاۋاپ قايتارعان مارادونا ۋاقىت وتە كەلە دوپتى سول قولىنىڭ جۇدىرىعىمەن سوققانىن دا مويىنداعان. ءبىراق تاريحتا ول كورىنىس «مارودونانىڭ قۇداي بەرگەن قولى » دەگەن اتپەن قالدى.
الەمدەگى ءبىرىنشى سپورت فۋتبولدىڭ سيقىرى كۇشتى. تەڭبىل دوپتىڭ قۇدىرەتى جاستى دا، كارىنى دە ارباعان. اۆستريالىق عالىمدار ماتتياس زۋتتەر مەن مارتين كوحەر ۇزاق جىلعى ويىنداردى زەرتتەي وتىرىپ، كوپ جاعدايدا تورەشىلەردىڭ الاڭ يەلەرىنە بۇيرەگى بۇراتىنىن انىقتاعان. قوس عالىم الاڭدا قارسىلاستارىن قابىلداپ جاتقان كوماندا ۇتىلىپ تۇرسا، ونداي جاعدايدا نەمىس تورەشىلەرى قوسىمشا ۋاقىتتى سوزۋعا تىرىساتىنىن دالەلدەپ شىعارعان. سونىمەن قاتار ولار قارسىلاس كومانداعا دا سارى قاعازدى كوبىرەك كورسەتەتىنىن انىقتاعان. ءبىراق ۋاقىت وتە كەلە ەكى عالىم دا ءوز زەرتتەۋلەرىن كۇرت توقتاتقان. ال اقيقات ماتتياس زۋتتەر مەن مارتين كوحەر زەرتتەگەندەي مە؟ ەندى ول جاعى بەلگىسىز. ءبىراق ...
... تەڭبىل دوپتا سيقىر بار.
بەرىك بەيسەن ۇلى
«ايقىن» گازەتى. 2013-جىل
