«تازا قالا» جوباسىنىڭ ەكىنشى ماۋسىمى باستالدى: مونوقالالارعا باسىمدىق بەرىلەدى
استانا. KAZINFORM - بىلتىر كوپشىلىكتىڭ كوڭىلىنەن شىققان «تازا قالا» تەلەجوباسى ەكىنشى ماۋسىمىمەن قايتا ورالدى. بۇل جولى ءتۇسىرىلىم توبى مونوقالالارعا باسا نازار اۋدارىپ، ەلىمىزدىڭ تۇكپىر- تۇكپىرىندەگى ەكولوگيالىق احۋالدى تەرەڭىرەك تالداماق. العاشقى شىعارىلىم 7-شىلدەدە استانا قالاسىنان باستاۋ الادى.
ايتا كەتەيىك، پرەزيدەنت تەلەراديوكەشەنى مەملەكەت باسشىسى قاسىم-جومارت توقايەۆتىڭ «تازا قازاقستان» جالپىۇلتتىق باستاماسىن جۇزەگە اسىرۋ ماقساتىندا «تازا قالا» اۋقىمدى ەكولوگيالىق جوباسىن باستاپ، ءبىرىنشى ماۋسىمىن ءساتتى اياقتادى.
ءتۇسىرىلىم توبى قازاقستاننىڭ وبلىس ورتالىقتارى مەن مەگاپوليستەرىن تۇگەل ارالاپ، قالالاردىڭ تازالىعى مەن كوركى تۋرالى اڭگىمەلەدى. جارتى جىلدا جۋرناليستەر 30 مىڭ شاقىرىم جول ءجۇرىپ، ايماقتىڭ ەكولوگيالىق ومىرىنە بەلسەندى قاتىساتىن 200 گە تارتا كەيىپكەرمەن تىلدەستى.
«تازا قالا» − ەلدەگى ەكولوگيالىق مادەنيەتتى قالىپتاستىرۋعا باعىتتالعان رەپورتاج جانرىنداعى 20 مينۋتتىق تەلەجوبا. ونى قوس جۇرگىزۋشى جۇرگىزەدى، ءبىرى باعدارلاما فورماتىنا سايكەس قالانىڭ جاقسى جاقتارىن كورسەتسە، ەكىنشىسى - جاعىمسىز تۇستارىن ايتادى. شىعارماشىلىق توپ قالالارداعى ەكولوگيالىق كەلەڭسىزدىكتەردى، تازالىق تالاپتارىنا ساي كەلمەيتىن تۇستارىن سىنعا الىپ، جاۋاپتىلاردان تالاپ ەتۋدى جانە ونىڭ ناتيجەسىن كورسەتۋدى كوزدەيدى.
جوبا جۇرگىزۋشىلەرى ءار قالادا ءبىرقاتار كريتەري بويىنشا زەرتتەۋ جۇرگىزەدى، تازالىققا جاۋاپتى ماماندارمەن، قالا تۇرعىندارىمەن، بەلسەندىلەرمەن سۇحبات جۇرگىزەدى. اۋدان ورتالىقتارى مەن مونوقالالارداعى كوشە تازالىعىنا، كوگالداندىرۋ، اباتتاندىرۋ بويىنشا كوممۋنالدىق قىزمەتتەردىڭ جۇمىسىنا باسا ءمان بەرىلەدى. سونداي-اق، قالا تۇرعىندارىنىڭ ەكولوگيالىق مادەنيەتى مەن جاۋاپكەرشىلىگى نازارعا الىنادى.
ال بيىل تەليەۆيزيالىق ەكوجوبا ەكىنشى ماۋسىمىن باستادى. جاڭا ماۋسىمدا ەلىمىزدەگى وبلىس ورتالىقتارى ەمەس، مونوقالالارعا باسىمدىق بەرىلەدى. وسىلايشا 3 مەگاپوليس، 20 مونوقالا جانە 1 قورىتىندى باعدارلاما كورسەتىلىمى جوسپارلانعان. اتاپ ايتقاندا، مونوقالالار اراسىندا اباي، اقساي، اقسۋ، التاي، بالقاش، جاڭاوزەن، جەتىقارا، ليساكوۆسك، قاراجال، كەنتاۋ، قۇلسارى، كۋرچاتوۆ، ريددەر، رۋدنىي، ساتپايەۆ، ستەپنوگورسك، تەمىرتاۋ، حرومتاۋ، شاحتينسك، ەكىباستۇز بار.
ءار شىعارىلىمدا تاۋەلسىز ساراپشىلار بەينەماتەريالدى قاراۋ ارقىلى پىكىر ءبىلدىرىپ، ءادىل باعاسىن بەرەدى. ساراپتاما ناتيجەسى 5 تالاپ بويىنشا 10 بالدىق جۇيەمەن باعالانادى. جوبانىڭ جىل سوڭىنداعى سوڭعى شىعارىلىمىندا ساراپشىلاردىڭ باعالاۋى بويىنشا قالالاردىڭ قورىتىندى ۇپايى كورسەتىلەدى.
تەلەجوبانىڭ العاشقى كورسەتىلىمى 7-شىلدە كۇنى استانا قالاسىنان باستاۋ الادى. ودان كەيىنگى ءار جاڭا شىعارىلىم اپتاسىنا 2 رەت - دۇيسەنبى جانە سارسەنبى كۇندەرى ساعات 19:30 دا كورەرمەن نازارىنا ۇسىنىلماق.
ەسكە سالا كەتەيىك «تازا قالا» جوباسى جاقىندا «ەڭ ۇزدىك الەۋمەتتىك تەلەجوبا» نوميناتسياسى بويىنشا «تۇمار-2025» ۇلتتىق تەليەۆيزيالىق سىيلىعىن جەڭىپ العان ەدى.
