تايلاندتان كەلگەن جاس كەلىن جۇبايىمەن بىرگە رەفەرەندۋمدا داۋىس بەردى

استانا. KAZINFORM - تايلاندتان كەلگەن جاس كەلىن جۇبايىمەن بىرگە رەفەرەندۋمعا قاتىستى، - دەپ حابارلايدى Massaget.kz ءتىلشىسى.

تايلاندتان ماڭعىستاۋعا كەلىن بولىپ تۇسكەن سۋفافون حونگچەتحەم اقتاۋداعى 247-سايلاۋ ۋچاسكەسىنە جۇبايىمەن جانە ەنەسىمەن ەرىپ كەلدى.

23 جاستاعى جاس كەلىن قازاقستان ازاماتتىعىن الىپ ۇلگەرمەگەندىكتەن بۇل جولى داۋىس بەرە العان جوق. جولداسى ميراس ارسلانعا قولداۋ ءبىلدىردى.

«بۇگىن ەلىمىزدە ماڭىزدى كۇن. مەن دە ەل بولاشاعى ءۇشىن تاڭداۋىمدى جاسادىم. كەلىنشەگىم قازاقستاننىڭ سايلاۋىن كورسىن دەپ ەرتە كەلدىم. بارشا جەرلەستەرىمدى رەفەرەندۋمعا قاتىسۋعا شاقىرامىن»، - دەدى ميراس ارسلان.

سۋفافون حونگچەتحەم ماڭعىستاۋعا بيىل ساۋىردە كەلدى. تايلاندتا وقىپ جۇرگەن اقتاۋلىق ميراس ەسىمدى جىگىت سول ەلدىڭ ارۋىن ۇزاتىپ اكەلىپ، توي جاسادى. قازنەتتە شەتەلدىك قىز بەن وتباسىن قۇرعان جەرلەسىمىزدىڭ تويى كوپشىلىكتىڭ تالقىسىنا تۇسكەن ەدى.

جاس كەلىن بىردەن قازاق حالقىنىڭ ءداستۇرى مەن ۇلتتىق تاعامدارىنا قىزىققانىن ايتادى. ونىڭ سوزىنشە، قازاقتىڭ ۇلتتىق كيىمدەرى مەن تاعامدارى، ادامداردىڭ قارىم-قاتىناسى زەرتتەۋگە تۇرارلىق.

«بولاشاقتا قازاقستان الەمگە تانىلا ءتۇسىپ، جاھاننىڭ ءتورت بۇرىشىنان كەلەتىن تۋريستەردىڭ تاڭدايىن قاقتىرار ولكەگە اينالادى. بارلىعى قازاقستان تۋرالى كوبىرەك بىلەتىن بولادى. سەبەبى قازاقتىڭ ءداستۇرى، ءومىر ءسۇرۋ سالتى دا، ەلدىڭ تابيعاتى دا كەز كەلگەن ادامدى باۋراپ الاتىنداي»، - دەيدى سۋفافون حونگچەتحەم.

ەنەسى گۇلسىم قازىر كەلىنى قازاقشا ەركىن سويلەسە الماسا دا، سالت-ءداستۇردى تەز ۇيرەنىپ العانىن ايتادى. كۇيەۋى ميراستىڭ سوزىنشە، تابيعاتى تىمىق تايلاندتان كەلگەن سۋفافونعا ماڭعىستاۋدا ءبارى ۇناعان، الايدا شاڭى مەن جەلىنە ءالى ۇيرەنىسە قويماپتى.

سۋفافوننىڭ قازىرگى ەسىمى - ءىنجۋ. ءىنجۋ قازىر قىز-كەلىنشەكتەردىڭ بەتىن ارلەپ، شاشىن ساندەۋمەن اينالىسادى.